Matulu-fali esa no esa
6
Tolanoo nggala ei! Mete ma hataholi kamahelek esa tao salak, na, ei mana malelak tebe-tebe Manetualain Dulan hihiin, miu kokolak mian minik dale malole. Boe ma mia falik kana, fo ana tungga Manetualain dala teteben. Tehuu manea ei aom fo boso tuda tungga ndia salan. 2 Mete ma hataholi hambu toto'ak, na, ei fe'ek tulu-falin. No leo ndiak, na ei tao tungga Karistus heti-heun. 3 Mete ma hambu hataholi soso'uk aon nae, ana lena hataholi fe'ek, naa te ta leo ndiak, na, ana pepeko seluk ao-inan so. 4 De hataholi esa-esak musi palisak hata fo ana taok, mete ma hata fo ana taok ndia malole so, dei fo nameda dai. Boso makasasaman mua hataholi fe'ek. 5 Au kokolak leo ndiak, huu hataholi esa-esak musi mesak kana tanggon hata fo ndia taok. 6 Tehuu hataholi fo mana simbo nala Manetualain nanonolin, musi ba'e ndia uen buna-boan, fo tulu-fali hataholi mana manoli ndia.7 Masanenedak baa! Manetualain bubuluk basan. De boso kedi ei ao-ina hehelim, ma boso soba-soba kedi Ndia. Te hata fo hataholi sele-nggalin nai osin, neu ko ana hambu falik ndia buna-boan. 8 Leo ndiak boe, mete ma hataholi tao dede'a manggalauk tungga ndia hihiin, na, dei fo ndia hambu falik sodak fo makalulutuk. Tehuu mete ma hataholi tao dede'a malole tungga Dula-dale Malalaok hihiin, na dei fo ndia hambu falik sodak tetebes fo ta mana ketuk. 9 Huu ndia de ei boso mbela tao dede'a malole. Te nandaa no fain, ita hambu falik buna-boa malole boe, sadi ita takatataka takandoo. 10 De mete ma ita hambu lelak, na, ita tao dede'a malole memak fee basa hataholi, nakalenak fee ita tolanoo kamahelen nala.
Paulus nate'e susulan
11 Hatematak ia au mesa nggau sulak susulak ia, pake huruf ina-huuk kala. 12 Masaneda baa! Mana masapepekok kala sila boe oo, lamahele Yesus Karistus maten nai ai ngganggek. Tehuu ala lakaseti ei, fo simbok sunat, huu ala bii hataholi Yahudi fe'ek kala tao doidoso sala, mete ma fee nanonolik lae, Manetualain boe oo, simbok no malole hataholi fo ta mana tungga heti-heu sunat. Huu ndia de, ala sangga matak neu hataholi Yahudi la. 13 Tehuu mae ala sunat boe oo, sila mesak kasa ta tungga basa anggama heti-heun. Ala nau fo ei simbok sunat, fo dadik sila hataholin. No leo ndiak, sila paltein soso'uk sila.
14 Tehuu au ia, kada nau soso'uk ita Lamatuan Yesus Karistus. Ana mate nai ai ngganggek, fo tao nisa dede'a manggalauk kala, fo hataholi taon tungga dae-bafok hihiin. Huu ndia de au ta mbali dae-bafok hihiin so bali. Ma dae-bafok hihiin ta hengge au bali. 15 Sunat do ta sunat, ndia ta penting. Tehuu penting ndia, ita simbok soda beuk neme Manetualain mai. 16 Au hule, fo Manetualain natudu susuen neu basa hataholi fo mana tungga au nanonoling ia, suek ala bisa lasoda no sodak, mole ma ndoo-ndoo, boe ma latudu namemeda kasian esa no esa. Te ala dadik Manetualain hataholi nusa beun so.
17 Tungga ndoon, na au ta nau hataholi babalik au no dede'ak ia bali. Au aong mbiik so, huu au ono-lau Yesus Karistus.
18 Tolanoo nggala ei! Au oke fo ita Lamatuan Yesus Karistus natudu dale malolen neu ei basa nggei.
Leo ndiak leo!
Soda-molek neme au mai,
Paulus