2 Mamanene baa! Au ia Paulus, fo mana kokolak ia. Mete ma ei simbo sunat, fo tungga hataholi Yahudi la heti-heun, na, Karistus mamaten fo nakambo'ik ei ndia, sosoan taa so. 3 Mete ma hataholi simbok sunat, na ndia boe oo, musi lemba seluk basa heti-heuk sila bali. Ei masaneda, do taa? Makahulun, au afada memak ei so. 4 Hataholi fo mana nau pake heti-heuk, fo tao Manetualain simbok ndia no malole, na ana naelak dook neme Karistus mai. Huu no leo ndiak, na ana timba heni Manetualain dale malolen so. 5 Tehuu Manetualain Dula-dale Malalaon soi dalak, fo ita tamahele neu Yesus Karistus losa fai babasan. Huu ndia de ita tahani taa-taa tae, neu ko Manetualain kee-dede nala ita nae, ita hataholi dale ndoos. 6 Mae hataholi sunat do taa, ndia sosoan taa. Tehuu kasosoak, ndia hataholi namahele neu Karistus ma sue hataholi fe'ek boe.

7 Makahulun, ei masoda tungga dala teteben so. Tehuu hatematak ia, see ndia pepeko nala ei, losa ei ta tungga dalak ndia so bali? 8 Nanonoli pepekok fo ei mamanenek ndia, ta neme Manetualain mai. Naa te Ndia ndia noke nala ei so, fo dadik Ndia hataholin. 9 Nanonolik fo ala feek ndia, sososan kada dede'a de'ek esa do dua. Tehuu doo-doo dei fo nanonolik ndia tao nala ei dudu'am nakalulutuk. Sama leo lalu teik faa, fo seseok kana no hade uu, fo tao loti. Doo-doo boe ma, lalu teik ma hade uu nana seseok ndia natafuu.^a 10 Huu ita dadik esa to ita Lamatuan Yesus Karistus so, de au amahele tebe-tebe, dei fo Ana tao nala ei mamahele masafali hata fo au fee nanonolik ndia so. Ma dei fo Manetualain mesak kana huku sudi see, fo mana tao nakalulutu ei namahehelem so.

11 Leo iak tolanoo nggala ei! Mete ma au fee nanonolik ae, hataholi musi sunat, na, neu ko au ta hambu doidosok bali sama leo hatematak ia. Ma hataholi Yahudi la, ta timba heni au nanonoling bali, la'e-neu Yesus mamaten neme ai ngganggek. 12 Tehuu hataholi fo mana tao nakandaa ei la'e-neu sunat ndia, elan neme naa, suek mesak kasa leu kee heni basa sila ‘mamaen’!

13 Tolanoo nggala ei! Manetualain nakambo'ik heni ei so, fo ei boso masoda nana mba'ak mia anggama heti-heun hihiin. Boso mae hetuk ei makambo'ik so, de masoda tungga ei hihiim! Teteben, na ei musi masoda masue ao, ma ei musi ono-lau esa no esa, sama leo ata ono-lau ndia malanggan. 14 Nai Manetualain Susula Malalaon nana sulak nae, “O musi sue hataholi fe'ek kala, sama leo o sue o ao-ina hehelim.” Mete ma ei tao tungga kada heti-heuk esak ia, na, ei tao tungga basa hataholi Yahudi heti-heun maksut so.^b 15 Tehuu mete ma esa nala'u ao no esa, do esa nasii ao no esa, na, mata neuk! Ta dook bali, te ei makalulutu ei ao-ina hehelim so.

16 Au maksut leo iak: mete ma ei masoda tungga Manetualain Dulan hihiin, na, ei ta tungga hataholi hihiin bali. 17 Huu hataholi hihiin, ta nau tungga Dulak hihiin. Ma Dulak hihiin, ta nau tungga hataholi hihiin. Te dua sala lalaba ao! Huu ndia de, ei ta bole kada tao tungga ei hihiim bali.^c 18 Tehuu mete ma Manetualain Dulan nalangga ei, na, ei ta nana mba'ak mia heti-heuk sila so bali.

19 Hataholi fo mana tao tungga hataholi hihiin ndia, conto leo: hataholi mana hohongge no hataholi fo ta ndia saon, hataholi fo dudu'an manggenggeok, ta mae nalelak, 20 mana songgo nitu do kamodo mamates, mana mamusuk, mana masisimbo bafak, mana dale hedik, mana tao nanggilok, mana dudu'a kada ao-ina hehelin, mana nahiik mbau-edo hataholi, mana nahiik tao nahuuk, 21 mana nahiik holo, mana nahiik ninu mafuk, mana feta makiuk, ma mana tao sala fe'ek kala. Makahulun, au afada itak so ae, hataholi fo mana tao tungga dede'a leo ndiak, na sila ndia ta bisa dadik Manetualain hataholin.

22 Tehuu hataholi fo nasoda tungga Manetualain Dulan hihiin, dei fo Dulak tao ndia dadik hataholi fo nahiik nasue ao, naena dale namahokok, nahiik momolek, nggale loak, dale malole no hataholi, nahiik tulu-fali hataholi, na neu ko tao tungga heheluk ndia, 23 malole no basa hataholi, ma mana bisa nanea neulalau aok. Ta hambu heti-heuk esa boe, fo ka'i dede'ak kala ia. 24 Hataholi fo mana maso dadik Yesus Karistus hataholin so, ndia ta tungga hataholi hihiin so bali. Huu ndia hihiin manggalaun ndia, nana mbaku nisak sama-sama no Yesus nai ai ngganggek so. 25 De mete ma Manetualain Dulan fee ita soda beuk so, na, ita musi tao tungga takandoo Ndia hihiin. 26 Huu ndia de boso ita tahiik hambu hada-holomata, boso tahiik laban esa no esa, ma boso dale hedi bali.