3 Leo ndiak boe neu ita. Neu faik fo Yesus Karistus bei ta mai, ita bei sama leo kakanak ndia. Te ita bei nana mba'a nisak to dae-bafok dala dudu'an ma dala sodan, sama leo ata esa. 4-5 Tehuu nandaa no fain, Manetualain nadenu Anan mai, fo dadik hataholi, fo suek hataholi bisa nana so'uk dadik Manetualain anan nala boe. Ndia Anan ndia, nasoda tungga hataholi Yahudi anggaman heti-heun, suek Ana bisa nakambo'ik basa hataholi fo makahulun nana mba'ak no heti-heuk kala sila.

6 Huu ei dadik Manetualain anan nala so, de Ana nadenu Anan Dulan mai, fo maso neni ei dalem neu. No leo ndiak, ei maena haak fo moke Manetualain mae, “Ama bonggik”. 7 De hatematak ia, ei ta dadik ata, fo ta maena haak simbo pusaka so bali. Tehuu ei dadik Manetualain anan so, fo maena haak simbo basa pusaka fo Ana heluk ndia so.^a

8 Makahulun, neu faik fo ei bei ta malelak Manetualain, ei tao ei aom dadik ata, fo so'u dema-demak dede'a ta tetebes ma tao tungga sala. 9 Tehuu hatematak ia, ei malelak Manetualain so. Malolenak mete ma au ae, Manetualain ndia nalelak ei. Naa, talo bee de losa ei fali bali, fo so'u dema-demak ma tungga seluk dae-bafok dudu'an ma dala sodan fo sosoan taa, ma ta naena koasa hata-hata ndia? Ei nau tao ei aom nana mba'ak no dede'ak kala sila, fo dadik neu sila atan bali, do? 10 Au amanene so lae, ei makalala'ok heti-heuk la'e-neu anggama fai malolen nala, tungga ndia fain, bulan, fai hanas do fai oe faak, ma teuk fo sangga soba tao mamahoko Manetualain dalen. 11 Ia kada ana tao nala au dudu'a doak kana! Naa fo au sosotang fo anoli ei losa doo basa ia, kada dadik sosoa taak so.

12 Tolanoo susue nggala ei! Au oke fo ei masoda makambo'ik mima dede'ak kala sila mai, sama leo au ia. Huu au asoda akambo'ik uma anggama heti-heun mai, sama leo ei fo ta Yahudi. Makahulun, neu faik fo ita sama-sama, au ta hambu toto'ak itak neme ei mai. 13 Neu faik fo au mai sososan, au tui-bengga Hala Malole ndia neu ei. Ei basa nggei bubuluk, au aong male. 14 Mae leo ndiak, tehuu ei ta timba heni au, huu ei simbok au sama leo, au ia Manetualain atan neme nusa sodak mai. Nakalenak bali ei simbok au, sama leo au ia Yesus Karistus. 15 Faik ndia, ita sama-sama tamahoko talan seli. Tehuu hatina de hatematak ia, ta leo ndiak so bali? Naa te faik ndia, ei sue mala au seli, losak ei sadia do'i mala ei mata de'e hehelim, fo feen neu au. 16 Tehuu hatematak ia, ei mae hetuk au ia, dadik ei musum so, huu au kokolang manggaledok fee ei, do?

17 Mana kekedik kala sila ta nau au anonoo ua ei. Boe ma ala manggate kokoe-nanasi ei, fo tungga basa hataholi Yahudi anggaman heti-heun. Ala nau fo ei masambute fo kada tungga sila hihiin. 18 Tehuu mete ma ei manggate tao dede'a malole, na, ndia malole boe! Mae au sama-sama ua ei, do taa, kada ei tao malole leo.

19 Ana susue nggala ei! Hatematak ia, au tao ues tingga-tingga fee ei bali, losa au sama leo inak fo tein hedis sangga bonggi. Huu au ta hahae au ueng, losa ei dalem sama leo Karistus dalen so. 20 Tehuu hatematak ia, au ta bubuluk tao hata ua ei bali! Au dokodoe so, fo sangga uu kokolak asasale matak ua ei, suek au ta kokolak hala belak leo iak.

21 Mete ma ei mahiik masoda tungga hataholi Yahudi anggaman heti-heun, na malolenak ei bubuluk heti-heuk ndia maksut dei. 22 Nai Manetualain Susula Malalaon hambu tutuik la'e-neu sila ba'in Abraham ana tou anan dua. Ana hambu anak esa neme ndia ata inan mai, ma esa bali neme ndia saon mai, fo ta atan.^b 23 Ata ndia bonggi anan, huu tungga hataholi hihiin. Tehuu saon fo ta atan, bonggi anan, huu Manetualain helu memak leo ndiak so, neu Abraham.

24 Ina kaduak kala sila, dadik nakandandaak fo natudu heheluk dua, fo Manetualain feen neu hataholi. Hehelu kaesan, Ana feen neu ba'i Musa neme lete Sinai, neu faik fo Ana nakonda hataholi Yahudi anggaman heti-heun nala. Hataholi fo nana mba'ak no anggama heti-heun ndia, na sila boe oo ata, sama leo Hagar. 25 Mamanak fo manai lete Sinai ndia nai dae Arab, sama leo Hagar boe. Basa hataholi Yerusalem hatematak ia, fo bei nana mba'ak no anggama Yahudi heti-heun ndia, sila boe oo ata, sama leo Hagar.

26 Tehuu hehelu fe'ek ndia, natudu kota Yerusalem fe'ek esa nai nusa sodak. Manetualain anan nala mana leo lai ndia, ata ta sila. Huu sila ndia, hataholi nana mbo'ik fo ta nana mba'ak lo anggama heti-heun nala. Huu ndia de basa sala sama leo ai inan Sara, fo Abraham saon, fo ta ata ndia. 27 Huu nai Manetualain Susula Malalaon nana sulak nae,

28 De tolanoo nggala ei! Makahulun Manetualain helu fo fee Abraham anak. Tehuu dook bei fo Manetualain tao natetu Ndia hehelun, de Ana tao Sara bonggi nala Isak fee Abraham. Ita boe oo sama leo Isak, huu Manetualain helu fo fee numbu-sadu fe'ek neu Abraham boe. 29 Neu faik fo kakana ata fo bonggin tungga hataholi hihiin, ana ina-huu mai so, de ana tao doidoso Isak fo bonggin tungga Manetualain Dulan hihiin. Ndia boe oo, sama leo hata fo mana dadik hatematak ia.^e 30 Manetualain Susula Malalaon sulak nae, “Husi heni ata ndia no anan. Huu ata ndia anan ta naena haak fo simbo pusaka. Kada kakanak fo neme saon fo ta ata mai, ndia naena haak.”^f

31 De leo iak, tolanoo nggala ei! Ita ia sama leo ata anan, huu ita ta nana mba'ak to hataholi Yahudi anggaman heti-heun so bali. Te ita ia, sama leo kakanak neme Abraham saon fo ta ata mai, huu ita tamahele neu Yesus Karistus.