Manetualain simbok ita no malole, huu ita tamahele Yesus Karistus
3
Wei! Hataholi Galati la! Makahulun au mesa nggau afada neu ei matam mala so, la'e-neu Yesus Karistus mamaten neme ai ngganggek. Tehuu hatematak ia, hataholi lofo anak kedi lala ei so! Ei nggoam dei! 2 Au atane kada dede'ak esa. Ei simbo mala Manetualain Dulan, huu ei tungga anggama heti-heun, do? Taa, hetu! Ndia Dulan mai neu ei, huu ei mamahele Hala Malole fo ei mamanenek ndia so. 3 Hatina de ei mamanggoa malan seli leo ndiak bae? Makahulun ei masoda tungga Dula-dale Malalaok hihiin so. Tehuu hatematak ia ei masafali bali, fo tungga hataholi hihiin. 4 Neu faik fo bei fo ei mulai mamahele Karistus, ei hambu doidosok no'un seli. Boso losak basa sila dadik neu kada sosoa taak! (Naa te, namahele neu Karistus, na ta bisa dadik neu kada sosoa taak.) 5 Ledo-eik Manetualain fee Ndia Dulan, ma natudu tanda heran mata-matak neu ei matam, ei dudu'a mae Ana tao leo ndiak, huu ei tungga anggama heti-heun, do? Taa, hetu! Ana tao leo ndiak, huu ei mamahele Hala Malole, fo ei mamanenek ndia so.6 Masaneda hataholi Yahudi ba'i lele ulun, fo ndia ba'i Abraham. Huu Manetualain Susula Malalaon sulak nae, “Huu ana namahele Manetualain, de Manetualain simbok ndia no malole, ma kee-dede nala ndia dadik hataholi dale ndoos.”a
7 De ei musi bubuluk neulalau dede'ak ia! Hataholi fo namahehelen sama leo Abraham, na ala dadik Manetualain hataholi teteben.b c 8 Manetualain nafada memak nai Ndia Susula Malalaon so nae, dei fo Ndia simbok hataholi neme nusa fe'ek kala mai nae, sila hataholi dale ndoos, mete ma lamahele Ndia. Huu makahulun ele Ana nafada memak Hala Malole neu ba'i Abraham so nae, “Dei fo basa hataholi nusak lai dae-bafok ia, hambu baba'e-babatik huu o.” 9 Huu Manetualain hehelun ndia, de Ana fee baba'e-babatik neu basa hataholi, fo lamahele neu Ndia, sama leo Ana fee Abraham so.
10 Hataholi mana tungga anggama heti-heun, suek Manetualain simbok kana no malole, na ana musi lemba belak basa heti-heuk sila, sama leo ana hambu sumba-sook so. Huu nana sulak nai Manetualain Susula Malalaon nae, “Hataholi fo ta tungga nakandoo anggama heti-heun losa lutu-lutuk, na ana hambu sumba-sook!”d 11 Tehuu manggaledok so, Manetualain ta simbok hataholi, huu ana tungga anggama heti-heun. Te nana sulak nae, “Hataholi musi namahele Au, bei fo Au simbok kana no malole, leo hataholi dale ndoos, fo ana hambu sodak tetebes.”e
12 Naa! Mete ma hataholi nau nasoda tungga anggama heti-heun hihiin, na ana musi tao tungga basa-basan losa lutu-lutuk! Te Manetualain nafada memak nai Ndia Susula Malalaon so nae, “Hataholi fo ana nau nasoda tungga heti-heuk, dei fo kada nasambute no heti-heuk kala sila.”f
13 Tehuu Karistus tifa ketun so, fo nakambo'ik ai mima anggama heti-heun mai, fo nana mba'ak no ai. Makahulun, ai masoda sota mate ma lemba belak anggama heti-heun ndia, sama leo hataholi mana hambu sumba-sook. Tehuu hatematak ia, Lamatuak Yesus so'u heni sumba-sook ndia neme ai mai so. Te nana sulak nai Susula Malalaok nae, “Hataholi mana matek nana londak nai ai, na ana hambu sumba-sook.”g 14 Neu faik fo Yesus Karistus mate, fo nasala'e nala ita, na ndia baba'e-babatik fo Manetualain feen neu Abraham so, ana konda neni hataholi nusa fe'ek kala neu boe. No leo ndiak, basa hataholi mana namahele neu Karistus, simbok Manetualain Dulan fo Ana heluk so.
Manetualain to'u nahele Ndia hehelun
15 Tolanoo nggala ei! Hatematak ia au nau pake conto neme ita soda basa fain mai. Mete ma hambu hataholi sulak nala susula hehelu pusaka, basa de ana lima lee ndia naden neu susulak ndia, na susulak ndia dadik tetebes so. Hataholi fe'ek ta bisa timba heni hata fo nana sulak nai susulak ndia, ma ta bisa sulak tamba hata-hata bali nai ndia so. 16 Leo ndiak boe oo, neu faik fo Manetualain mba'a heheluk no Abraham, ma ndia numbu-sadun. Manetualain ta nae, “Au tao heheluk ia, ua o numbu-sadum mala”, huu Ndia ta helu fee hataholi makadotok. Tehuu kada Ana helu fee Abraham numbu-sadun esa, fo ndia Karistus.h 17 Au maksut leo iak: Manetualain tao heheluk nakahuluk no ba'i Abraham. Basa teuk 430, bei fo Ana nakonda anggama heti-heun fee hataholi Yahudi la, nesik sila ba'in Musa. Mae leo ndiak boe oo, Manetualain pake nahele Ndia hehelu makahulun.i 18 Manetualain ta fee baba'e-babatik neu Abraham, huu ana tao tungga heti-heuk. Tehuu Ana fee baba'e-babatik, huu Ana helu memak neme makahulun mai so, fo sangga fee hiak neu Abraham. Ndia sama leo kakanak esa ana simbo pusaka neme aman mai. Ana simbo huu ndia aman helu memak so, ta huu kakanak ndia tao tungga heti-heuk.j
19 Naa! Hatematak ia, au sangga atane leo iak: mete ma Manetualain simbok Abraham no malole, huu ndia namahehelen, hatina de Manetualain fee seluk anggama heti-heun sila nesik ba'i Musa bali? Ana fee seluk anggama heti-heun sila, fo nanoli hataholi la'e-neu sila sala-singgon mata-matak. Ndia maksut fo hataholi lasoda tungga heti-heuk ndia hihiin, losa Abraham numbu-sadun esa mai. Boe ma mete ma numbu-saduk, fo ndia Karistus mai so, na, heti-heuk ndia ta paluu so bali.
Neu faik fo Manetualain fee anggama Yahudi heti-heun ndia, Ana ta fee nakandoon memak. Tehuu Ana pake Ndia atan neme nusa sodak mai, nenin neu ba'i Musa liman, bei fo ba'i Musa feen neu hataholi Yahudi. No leo ndiak, ba'i Musa dadik lelete neu Manetualain no hataholin nala. 20 Tehuu neu faik fo Manetualain tao heheluk no Abraham, Ana ta pake lelete. Huu Ndia mesak kana helu! No leo ndiak, ita bubuluk tae, Manetualain hehelun ndia, lena heni heti-heuk kala sila.
Anggama heti-heun nanoli hataholi la'e-neu sila salan mata-matak
21 Neu faik fo Manetualain fee anggama heti-heun neu ba'i Musa, ndia nalaba ao no Ndia hehelun, do? Taa! Mete ma hambu heti-heuk fo hataholi bisa tao tunggan, fo Manetualain simbok ndia no malole, fo suek bisa nasoda, neu ko hataholi Yahudi heti-heun bisa tao leo ndiak. Naa te, ta hambu heti-heuk esa boe, fo hataholi bisa tao tunggan, fo tao makasufu Manetualain dalen, fo suek Manetualain simbok ndia no malole. 22 Huu nai Manetualain Susula Malalaon nana sulak nae, basa hataholi nana mba'a nisak, lo salak mata-matak. Huu ndia de kada hataholi fo namahele neu Yesus Karistus, bisa simbo hata fo Manetualain heluk so.
23 Neu faik fo Karistus bei ta mai, ai hataholi Yahudi nana mba'a nisak mia heti-heuk kala sila, losa ta bisa nakambo'ik. Tehuu losa ndia fain, Manetualain soi dalak, fo ai makambo'ik mima heti-heuk kala sila mai, mete ma ai mamahele neu Karistus. 24-25 De anggama heti-heun nala sila, conto leo mana manea fo nanoli neulalau ita losa Karistus mai. Tehuu mete ma Ana mai so, na, bei fo ita bisa tamahele Ndia, fo tasoda neulalau to Manetualain. Huu ndia de hatematak ia, ita ta paluu mana manea ndia so bali.
Hataholi kamahelek dadik neu Karistus bobonggin so
26 Hatematak ia, ei dadik Manetualain anan nala so, huu ei mamahele neu Yesus Karistus. 27 Ei basa nggei hambu salanik so, fo dadik Ndia hataholin, de nana mba'a nisak mia Ndia. 28 Basa hataholi mana lamahele neu Karistus, ta hataholi fe'ek ndia so. De mae ei hataholi Yahudi do hataholi ta Yahudi, ata do ta ata, touk do inak, basa hataholi fo nana mba'ak no Yesus Karistus ndia, sama. 29 Karistus ndia, Abraham tititi-nonosin, fo Manetualain helu memak neme makahulun mai so. Huu ei nana mba'ak mia Karistus so, de ei boe oo dadik neu Abraham tititi-nonosi teteben so. No leo ndiak, ei boe oo bisa simbok baba'e-babatik ndia, fo Manetualain helu memak neu Abraham so.k