Lamatuak Yesus nadedenu fe'en nala simbok no malole Paulus nanonolin
2
Basa de seli teuk sanahulu haa, boe ma au fali no'u ua Barnabas mini kota Yerusalem miu bali. Ma ai boe oo, mia hataholi kamahele ta Yahudi esa, nade Titus.a 2 Au uni ele uu, huu Manetualain nadenu. Basa boe ma au tui lasi salanik kala, Hala Malole ndia, fo au anoli hataholi ta Yahudi la so. Faik ndia, au mesa nggau kokolak ua sala, fo suek ala palisak neulalau hata fo au anolik ndia, tetebes, do taa. Mete ma ala laketu lae, ta tetebes, na, hataholi bisa lae, au ueng sosoa taak!3 Ala lamanene au kokolang leo ndiak, boe ma ala simbok no malole. Sila boe oo, simbok Titus no malole. Mae ndia ta hataholi Yahudi, tehuu ta lakasetin ana sunat. 4 Tehuu faik ndia, hambu tolanook luma ta lakaheik, huu ala lanoli fe'ek. Sila ndia, salanik masapepekok. Boe ma ala mai no nee-neek, suek sangga lakaseti Yesus Karistus hataholi ta Yahudin nala, fo ala tungga basa hataholi Yahudi anggaman heti-heun nala. Naa te Yesus Karistus nakambo'ik ita so, de ita ta nana mba'ak to heti-heuk kala sila so bali, fo sama leo ata. 5 Mae ala lakaseti leo ndiak, tehuu ai ta nau simbok faa boe. No leo ndiak, ei bisa mamahele makandoo Hala Malole, fo au anolik ndia so. Huu ndia memak tetebes.
6 Lasik kala sila simbok no malole au nanonoling ndia, ma tala tamba hata-hata bali. Tehuu Manetualain tana hehele matak. De mae sila hataholi ina-huuk do, kadi'ik do, ndia ta penting.b 7 Penting ndia: ala bubuluk lae, Manetualain hele nala au so, fo au uu akalala'ok Hala Malole neu hataholi ta Yahudi. Sama leo Ndia boe, nadenu Petrus neu nakalala'ok Hala Malole neu hataholi Yahudi. 8 Huu Manetualain fee koasa neu Petrus so, suek ana dadik nadedenuk neu hataholi Yahudi. Leo ndiak boe Ana fee koasa neu au, fo dadik nadedenuk neu hataholi ta Yahudi. 9 Faik ndia, hataholi tao Yakobis, Petrus, ma Yohanis, dadik malangga nggalei so. Ledo-eik telu sala bubuluk lae, Manetualain natudu dale malolen neu au so, boe ma ala fo'a lambadeik de lato'u limak lo au ma Barnabas, fo dadik tanda lae, ai basa nggai dalek esa so. Ala lakaheik ai mini Hala Malole neu hataholi ta Yahudi, ma sila leni Hala Malole neu hataholi Yahudi.c 10 Kada lasanenedak ai dede'ak esa. Ndia, ai ta bole mafalende heni tulu-fali hataholi hata taak kala. Memak ndia na, au amahoko tao dede'ak ndia.
Paulus ka'i Petrus nai Antiokia, huu ana heok neme hataholi ta Yahudi la mai
11 La'i esa, Petrus mai nai Antiokia, de au ka'in ledo-ledo, huu ana tao salak. 12 Neu faik fo bei fo ana mai, ana namahoko nanggatuuk na'a no'u no Karistus hataholi ta Yahudin nala. Tehuu neu faik fo Yakobis nonoon hataholi Yahudi la mai, boe ma Petrus heok la'o ela tolanoo ta Yahudi, ma ta nanggatuuk na'a no sala bali. Huu ana bii hataholi Yahudi mana fee nanonolik lae, Karistus hataholin nala musi tao latea basa hataholi Yahudi anggaman heti-heun, ma musi lasoda dook leme hataholi ta Yahudi la mai.
13 Hataholi Yahudi fe'ek kala lita Petrus tatao ta neulaun ndia, boe ma ala tao tungga. Losa Barnabas boe oo, tao tungga sila mana dea-matan nala. 14 Tehuu neu faik fo au ita ala ta tungga tebe-tebe Hala Malole hihiin so, boe ma au ka'i tutik Petrus neu sila matan ae, “Wei, ka'a Petrus! Memak ka'a ia hataholi Yahudi. Tehuu Manetualain soi dalak so, fo hataholi mana namahele neu Yesus Karistus, boso nana mba'ak bali no hataholi Yahudi anggaman heti-heun nala. Ma ka'a simbok dede'ak ndia so. Boe ma talo bee de hatematak ia ka'a bei nakaseti hataholi ta Yahudi, fo ala tao aok sama leo hataholi Yahudi bali?”
15 Au ka'i Petrus leo ndiak, huu ai dua nggai hataholi Yahudi no'u. Ai hataholi nusa Yahudi ta sama leo hataholi nusa fe'ek kala, huu ai hataholi nusan, lalelak Manetualain dook ia so. 16 Tehuu hatematak ia, ita boe oo bubuluk tae, Manetualain ta simbok hataholi esa boe no malole, huu ana tao tungga anggama heti-heun. Manetualain simbok hataholi no malole, huu namahele Yesus Karistus, ta huu ana tao tungga anggama heti-heun. No leo ndiak, bei fo Manetualain kee-dede hataholi nae, ndia salan ta so.d
17 Huu ndia de ita fee nanonolik tae, Manetualain simbok hataholi no malole, huu, ndia namahele neu Yesus Karistus. Tehuu hambu hataholi Yahudi nakasasa'ek ai nae, ai sala so, huu ai mamahele Karistus, tehuu ta to'u anggama Yahudi heti-heun nala bali. Ei boe oo, sangga mbia salak leo ndiak, do? 18 Au akambo'ik heni anggama heti-heun so, tehuu mete ma au to'u falik heti-heuk, fo au mbo'i henik ndia, na ndia bei fo au sala! 19 Memak makahulun au asusua tingga-tingga, tao tungga anggama Yahudi heti-heun nala, fo suek au malole ua Manetualain. Tehuu au ta bisa boe. Huu ndia de hatematak ia, au mbo'i heni heti-heuk kala sila so, fo au asoda nana mba'ak ua Karistus. No leo ndiak, bei fo Manetualain simbok au no malole. Taon neu, au mate nana mbakuk no'u ua Karistus nai ai ngganggek so. 20 Hatematak ia, au ta ndia asoda bali, tehuu Karistus ndia nasoda nai au ao-inang. Au hambu soda beuk ia, huu au amahele Manetualain Anan. Huu ana sue au nalan seli, losa Ana mate nggati au. 21 Manetualain simbok au, ta huu au tungga anggama heti-heun nala, tehuu Ndia dale malolen neu au. Mete ma hataholi bisa malole no Manetualain, huu ana tungga anggama heti-heun nala, na ndia ndandaan nae, Karistus mamaten ndia sosoan taa.
Ndia ndia, fo au afada Petrus asa leme Antiokia.