Manea neulalau ei sodam
13
De ia kala'i telun fo au sangga uu tilo ei. Mete ma hambu hataholi kalaak hataholi, na, boso lilii ndia heti-heun. Huu Manetualain Susula Malalaon nana sulak nae, “Mete ma hambu hataholi kalaak hataholi esa, na, musi hambu sakasii dua do telu kokolan sama dei, bei fo simbok. Huu mete ma ta leo ndiak, na, boso simbok.”a 2 Makahulun neu faik fo au uni ei neti kala'i duan, au fee nasanenedak neu hataholi fo nasoda tao manggalauk kala. Hatematak ia, au fee nasanenedak neu sala bali, sama-sama lo basa hataholi fo lasoda tao manggalauk kala. Sama leo makahulun, au fee nasanenedak ae, mete ma au dadi neti, dei fo au ta atanggodo sala.3 Ei masanggak buti mae, Karistus kokolak nesik au. Mete ma Karistus nau heti ei, na, Ana taon no koasa ina-huuk nai ei laladam mala. Huu Ana ta tao ues no noe-na'uk. 4 Neu faik fo ala tao lisa Ndia neme ai ngganggek, memak Ana male, huu Ana mbo'i heni Ndia koasan so. Tehuu Manetualain fee koasa neu Karistus so, fo Ana nasoda hatematak ia. Boe ma elan fo ita mana dadik Ndia hataholin, tameda ta tabe'i, tehuu Manetualain fee ita soda beuk so. Huu ndia de ai bisa ono-lau ei minik Ndia koasan.
5 Palisak ei dale hehelim, fo sangga bubuluk mae, ei mamahele tebe-tebe Karistus, do taa? Ndia koasan nana nitak nai ei sodam, do taa? Uku-sudi ei ao-inam leo ndiak. Huu mete ma Ndia ta nana mba'ak no ei, na, ei ta dadik Ndia hataholin. 6 Mete ma ei palisak ai, na, ei bisa mita Ndia koasan nana nitak nai ai sodan. No leo ndiak, ai mala deak. 7 Ai boe oo, hule-haladoi moke Manetualain, fo suek ei boso tao salak hata-hata. Ai ta mbali, mete ma hataholi nahiik, do taa, no hata fo ai taok. Tehuu ai mahiik fo ei tao ndoos, mae hataholi luma nau timba heni ai. Leo ndiak boe oo, ta hata-hata. 8 Huu ita ta bisa tao hata-hata, fo laban hata fo ndoos. Kada ai malelak tao hata fo ndoos. 9 Mete ma ei dadik balakaik, ma ai dadik noe-na'uk, na, kada ai mamahoko. Huu ai hule-haladoi, fo moke Lamatuak tao ei boe mana daik. 10 Huu ndia de, mae au dook neme ei mai, hatematak ia au sulak dede'ak kala ia, fo suek dei fo au uni ele uu, na, au ta paluu kokolak hala belak neu ei bali. Au dadik ita Lamatuan nadedenun. Tehuu Ana fee au haak ma koasa fo tao atetea ei, ta tao akalulutu ei.
Paulus nate'e susulan
11 Tolanoo susue nggala ei! Au kokola mate'eng ia, kada soda-molek. Tao mandoo basa dede'ak. Mamanene neulalau au nanoli-nafadang ia. Masoda dalek esa. Ei musi malole esa no esa. Susuek ndia, okan nai Manetualain. Au oke fo Ana sama-sama no ei nakandoo, ma Ana tulun ei, fo ei masoda mole esa no esa.
12 Ei musi matudu susuek minik i'idu malole, fo nandaa no Lamatuak hataholi malalaon. Manetualain hataholin malai ia, basa sala haitua soda-mole susuek neu ei.
13 Au oke fo ita Lamatuan Yesus Karistus natudu dale malolen neu ei. Au oke fo Manetualain natudu susuen neu ei. Au boe oo, oke fo Manetualain Dula-dale Malalaon, natudu dale malolen, fo suek ei basa nggei masoda dalek esa.
Leo ndiak leo,
Paulus