Paulus nita dede'ak esa, nonook leo nalame'i
12
Mete ma ei nau, na, ela au kokolak koaok faa bali. Naa te kokolak koaok sosoan taa. Tehuu au sangga afada ei, dede'ak fo ita Lamatuan natudu au so, sama leo nai me'is dale. 2-4 Au alelak hataholi esa nana mba'ak no Karistus. Teuk sanahulu haa maneuk kala, hambu esa noon neni lalai mboi mate'en neu. Tehuu au ta bubuluk, ana hene bei no ndia ao-inan, do kada ndia dulan neu. Kada Manetualain mesak kana bubuluk. Au boe oo bubuluk ae, ledo-eik ndia nana so'uk neni Lamatuak Mamana Malolen neu ndia, namanene dede'a-kokolak fo ana seli, losak hataholi ta bisa kokolak. 5 De soa-neu hataholi mata leo ndiak, na au sangga kokolak koaok. Tehuu au ta nau kokolak koaok la'e-neu au ao-ina heheling. Kada la'e-neu dede'ak fo au ta abe'i taon, bei fo au kokolak koaok leo ndiak. 6 Leo au nau kokolak koaok, na, au ta paluu kokolak pepekok, huu au aena dede'ak tetebes no'uk fo au bisa kokolak. Tehuu kada au akatataka aok, fo suek hataholi boso dudu'a lae, au ana seling lena heni hata fo lamanenen ma litan neme au mai. 7 Nakalenak bali, Lamatuak natudu au dede'ak no'uk fo ana seli so.Tehuu au boe oo, hambu toto'ak, suek au boso koao. Huu nitu la malanggan nadenu ndia ana mana tunggan esa, fo nambue babalik au nakandoo, sama leo hambu dilak esa nambue kofu au aong. Wei! Au doidoso tetebes! 8 Au oke la'i telu so, fo Lamatuak mbia heni dede'ak ia neme au mai. 9 Tehuu Ana nataa au nae, “Au atudu Au dale maloleng neu o. Ndia dai neu o. Huu ledo-eik o mamedak mae, tungga o balakai hehelim, ta dai, na, nai ndia Au koasang boe natea.” Huu ndia de au nau kokolak koaok tamba, neu faik fo au ta abe'i tao dede'ak esa. Huu no leo ndiak, na au bubuluk ae, Karistus koasan nasoda nai au. 10 Huu ndia de, mete ma au ameda ta abe'i tao aong dede'ak esa, kada au daleng ndoo-ndoo. De ledo-eik hataholi la kokolak lakadadaek au do, tao lakatoto'ak au do, tao doidoso au do, mbomboko au, huu au dadik Karistus hataholin, na, au daleng kada ndoo-ndoo nahele. Huu mete ma au mesa nggau ta abe'i, na, au hambu koasa neme Karistus mai, fo suek au abe'i tao dede'ak ndia.
Paulus dudu'a la'e-neu hataholi kamahelek lai Korintus
11 Ei masoda nonook leo Lamatuak ta nadenu nitak au, uni ndia uu. Huu ndia de nau ta nau, isinaak au kokolak amumulu faa. Teteben, na ei musi kokolak koaok la'e-neu au. Memak au sosoang ta faa boe. Tehuu mete ma nakasasama au ua “hataholi fo ana selik kala” fo lae, Lamatuak nadenu sala, na sila ana selin ta lena heni au.
12 La'i-la'ik Lamatuak nadenu hataholi esa fo neu nafada hataholi la'e-neu Ndia, hataholi ndia tao tanda heran mata-matak pake koasa, fo natudu buti nae, Lamatuak nadenu ndia. Tehuu boso liliin, huu neu faik fo au nai ei laladam mala, au boe oo tao tanda heran leo ndiak kala. Tehuu au tao ues leo ndiak no nggale loak akandoo. 13 Tehuu boso mamanasa, baa! Kada dede'ak esak, au ta taon nai ei, fo hataholi fe'ek taon nai salani fe'ek. Fo ndia, au ta oke fo ei tanggon mala au.
14 Leo iak! Au ahehele la'i telu so, fo uni ei uu. Au ta paluu ei tanggon au ongkos sodang. Au boe oo, ta paluu ei hata-hetom. Huu tungga ita hadan, na ta nandaa kakanak kala mbeda hata-heto fee ina-aman. Mandaan ndia, ina-ama mbeda hata-heto soa-neu anan nala! De au ta paluu fo ei mbeda hata-heto soa-neu au, huu ei sama leo au ana nggala! Au paluuk ndia, na ndia ei ao-inam ma ei susuem. 15 Au ahiik hasa buas fee ei. Au boe oo, ahiik tao ues mbilu-mbuse, fo suek ei bisa masoda tungga Lamatuak hihiin. Mete ma au sue ei alan seli, na, ei boe oo musi sue masafali au leo ndiak. Hatina de ei makatataak ei susuem? Ta nandaa, hetu?
16 Hambu neme ei mai manaku nae, au ta tao amabela ei. Tehuu hambu boe nae, au dadik hataholi fo malela pepekok seli, ma kedi ala ei, losa tao ei tungga au hihiing. 17 De talo bee? Meda hataholi la fo au adenu leni ei leti, pepeko lala ei, do? 18 Au kokoe Titus fo neni ei neti so. Au boe oo, adenu tolanoo fe'ek esa fo neu no ndia. Meda Titus pepeko nala ei, do? Taa, hetu? Huu Titus no au ia, mata-aok esa. Ai tao dede'ak fo sama, huu ai dua nggai dudu'an, sama boe.
19 Tolanoo susue nggala ei! Meda ei dudu'a mima isinaak mai mae, ai masala'e aok nai ei matam, do? Taa! Huu basa hata fo ai kokolak ia, Manetualain bubuluk so. De ai ta bisa mafuni hata-hata neme Ndia mai. Ai boe oo, nana mba'ak mia Karistus. Huu ai sue ei, de basa hata fo ai taok ndia, no maksut fo ai bisa tao matetea ei.
20 Mete ma au dadi uni ei neti, na, dei fo au dudu'a ae, boso losak ei ta dadik hataholi sama leo au hihiing. Boso losak hambu mana sisimbo bafak, mana dale hedik, nambeda dalek, hambu mana dudu'a la'e-neu kada ndia ao-ina hehelin, hambu mana kokolak naboboo hataholi nade malolen, mana kokolak dede'a huu-oka taak, hambu mana koaok, ma tao naodek basa-basan. Fama au boe oo, dadik hataholi fo ta sama leo ei hiik. 21 Mete ma au uni ei neti, dei fo dadik dudu'ak soa-neu au, huu ei tatao-nono'im. Boso losak Manetualain sangga nakamamaek au, nai ei matam. Boso losak au tao hataholi nameda belak, huu hambu no'uk leme ei mai, bei lasoda tao manggalauk, tehuu ta nau hondak, fo fali tungga Lamatuak dala ndoon. Sila manggenggeok! Huu hambu mana tao eok no hataholi fo ta ndia saon. Ala tao mata-matak ma ta mae lalelak.