Karistus nadedenu teteben, ma nadedenu ta teteben nala
11
Au nau kokolak amumulu faa. De soba mamanene neulalau au dei! Leo iak: 2 Au sama leo ei amam. Ei sama leo au ana fe'ong katouanak so. Fo mana sama leo ei tou anam ndia, na ndia Karistus. Boe ma au nau anea neulalau ei, fo suek dei fo ei sao mia ei tou anam ndia, na ei bei malalaok. De au anea neulalau ei, fo boso hambu esa babalik ei, fo tao nakalulutu ei namahehelem. 3 Hatematak ia ei tungga Karistus dala ndoon no dale malalaok. Tehuu ai bii, boso losak hambu hataholi pepeko nala ei, fo ei heok mima dalak ndia mai, sama leo makahulun mengge pepeko nala Hawa. Mengge ndia bisa pepeko leo ndiak, huu ndia masapepekok ba'in.a 4 La'i-la'i esa, hataholi mata leo ndiak kala leni ei leti, boe ma lanoli ei la'e-neu Yesus mata-ao fe'ek, fo ta sama leo Yesus fo ai manoli ei ndia so, na, hatina de ei mamahele neu hataholi sila? Makahulun ei malengga ei dalem, fo simbok mala Manetualain Dula-dale Malalaon, fo suek Ana heti ei. Hatina de hatematak ia ei nau simbo mala dula mata-ao fe'ek bali? Makahulun, ei mamahele neu Yesus Karistus Hala Malolen, fo ai mafada ei. Hatina de hatematak ia, ei nau mamahele nanonoli mata-ao fe'ek bali?5 Ala soso'uk aok lae, sila ndia, Lamatuak nadedenun fo ana seli. Meda ala laena haak lena heni au, do? Taa! Au ta tungga dudu'a leo ndiak. 6 Mae au ta kokolak alelak unik dede'a madema, tehuu au bubuluk tebe-tebe, hata fo au kokolak. Ei bubuluk dede'ak kala ia so, huu au atudu taa-taa neu ei.
7 Neu faik fo au anoli ei Manetualain Hala Malolen, au ta oke ei tanggon au. Au tao kadi'i au ao-inang, fo suek au bisa soso'uk ei. Fama ei nau soli salak neu au huu ndia, do? 8 Huu hataholi kamahelek leme salanik malai mamana fe'ek kala tanggon au, fo suek au bisa ono-lau ei. Ndia sama leo au ha'i neme sila mai, fo bisa tulu-fali ei. 9 Neu faik fo au sama-sama ua ei, boe ma au paluu, au ta babalik ei, fo oke hata-hata neme ei mai. Ita tolanoon nala maleme propensi Makedonia mai, ndia tulu-fali au. Tehuu au ta tao itak belak hata-hata neu ei, ma au boe oo, ta nau tao leo ndiak nai mbila-binesak.b 10 Karistus Dede'a-kokolan, tetebes. Au boe oo, amahele tebe-tebe ae, au dede'a-kokolang boe oo tetebes, huu au nana mba'ak ua Karistus. Ta hambu hataholi nai propensi Akaya ele, bisa kena au bafang, ma ka'i au fo boso kokolak koao ae, au ta tao belak neu ei leo ndiak. 11 Hatina de au kokolak leo iak? Meda ia, huu au ta sue ei, do? Mae ei dudu'a leo ndiak, tehuu Manetualain mesak kana bubuluk au sue ei.
12 Dede'ak fo au tao itak kala so, au nau tao akandoo. No leo ndiak, hataholi fo nahiik soso'uk aok, fo kokolak koaok nae, hata fo sila taok sama leo ai, na, sila ndia, neten ta so bali. 13 Ala lae, Lamatuak ndia nadenu sala. Sila ndia, hataholi mana tao ues fo lahiik pepeko hataholi! Ala soba-soba tao aok, sama leo Karistus nadedenu teteben. Naa te kada pepekok basa sila. 14 Ei boso heran! Te nitu la malanggan boe oo, soba-soba tao aon, sama leo Manetualain ata nusa sodan nala fo leni manggaledok ma dale malole. 15 Huu ndia de ei boso heran, mete ma ndia hataholi mana tao uen boe oo, soba-soba tao aok sama leo hataholi fo mana tao ues no dale ndoos. Tehuu mata neuk, dei fo Manetualain bala sila manggalaun.
Karistus nadedenu teteben, lemba doidosok mata-matak neu faik fo ala lafada hataholi la'e-neu Lamatuak Yesus
16 Mete ma ei nau, na, ela au kokolak amumulu faa bali. Huu au sangga soba-soba kokolak koaok. 17 Hatematak ia au sulak fo soso'uk aok leo iak, kada nau kokolak amumulu. Huu au kokolang ia, ta naoka nai ita Lamatuan. 18 Hambu hataholi no'uk lahiik soso'uk aok tungga hataholi dae-bafok ia natetemen. De au boe oo, nau kokolak koaok tungga sila. 19 Huu ei fo mana tao aok hataholi dudu'a ndoos, mete ma matonggo mia hataholi langga ute kea esa, na, ei elan no dale loak, hetu? 20 Mete ma hataholi fe'ek tao hata-hata neu ei, na, kada ei elan. Conto leo: mete ma hambu hataholi tao ei sama leo sila atan, na, kada ei elan. Mete ma hambu hataholi namana'o nala ei buam, na, kada ei elan. Mete ma hambu hataholi kedi nala ei, na, kada ei elan. Mete ma hambu hataholi so'uk aok leo hataholi ina-huuk, ma nakadadaek ei leo hataholi kadi'ik, na, kada ei mbo'in. Leo ndiak boe, mete ma hambu hataholi famba ei, na, kada ei elan. 21 Tehuu boso mamanasa, baa! Au mae, huu ai kada noe-na'uk. Ai ta mabe'i tao leo ndiak, sama leo hataholi la tao fee ei so.
Tehuu mete ma ala nau kokolak koaok la'e-neu hata, na, au ambalani kokolak koaok leo ndiak boe. (Tehuu boso lilii henin, huu au boe oo kokolak amumulu ndia!) 22 Sila hataholi Ibrani isi-isik, do? Hei! Au boe maa. Sila hataholi Israel, do? Hei! Au boe maa. Sila ndia, ba'i Abraham numbu-sadun, do? Hei! Au boe maa. 23 Sila ndia, Karistus hataholi mana tao uen, do? Hei! Au leo ndiak boe. (Boso lilii henin, huu au kokolak lena-lenak ia!) Memak au ae, au sama leo sila. Naa te au ia, lena heni sila. Huu au tao ues tingga-tingga lena. Hataholi landee au la'i no'uk uni bui dale uu. Ala filo au no'un lena. La'i no'uk elaba'ik au mate.c 24 Huu au hataholi Yahudi heheli nggala, filo au la'i lima. La'i-la'ik ala filo au, na, ala filo losa la'i telu hulu sio.d 25 Hataholi mbomboko au lenik ai la'i telu. La'i esa ala mbia batu fo sangga tao lisa au. Au bolo ofak la'i telu. Au bonu uma tasi lai leledok-le'odaek esa.e 26 Au la'ok dook taa-taa uni sudi bee uu so. Hambu toto'ak no'uk tao nala elaba'ik au mate. Conto leo: faa tuak nai lee ina, mana namoak kala, au hataholi Yahudi heheli nggala, hataholi ta Yahudi la, ma hataholi fo tao aok sama leo tolanoo hataholi kamahelek, naa te ala pepeko. Elaba'ik au mate nai tasi lai, nai kota, ma nai mamana nees.f 27 Au tao ues mbilu-mbuse, ma au hambu toto'ak mata-matak. La'i no'uk au ta bisa sunggu. Au boe oo, ndoe ma maa mada. La'i no'uk au ta hambu u'a hata esa boe. Au aena balo'a papakek boe, tehuu ta dai de au manili alan seli. 28 Mete ma ta nau hingga basa dede'ak kala sila, na, hingga kada leo iak: tungga-tungga faik au langgang hedis, huu au dudu'a la'e-neu basa ita tolanoo kamahelen, fo lakabubua lai sudi bee. 29 Mete ma hambu hataholi fo nameda aon ta nabe'i, na, masaneda au. Huu au leo ndiak boe. Mete ma hambu hataholi fufudi hataholi kamahelek, fo tungga tao salak, na, au mae ma luli.
30 Mete ma au musi kokolak koaok, na, malolenak au kokolak koaok la'e-neu dede'ak fo latudu lae, au ia, kada noe-na'uk. Tetebes! 31 Ita Lamatuan Yesus Aman, fo ndia Manetualain, bubuluk au ta kokolak pepekok. Ndia nandaa mete ma hataholi so'uk koa-kiok neu Ndia nakandondoo henin.
32 Conto leo, makahulun neme kota Damsik, mane Aretas nggubenol nadenu hataholi fo nggado au nai kota ndia lelesun nala, suek ala bisa humu lala au. 33 Tehuu au nonoo nggala tao au uu lembeneu esa dalek, boe ma ala lakonda au, lenik tali nesik kota tembon deak. De nggodi heni au uma nggubenol liman mai. Masaneda, huu mete ma au mesa nggau, na, ta bisa, hetu?g