Paulus nasala'e la'e-neu ndia uen neu Karistus
10
Au, Paulus mesa nggau, sulak nai ia. Neu ko hambu neme ei mai dudu'a leo iak: mete ma au sama-sama ua ei, na, au mae kokolak ledo-ledo. Tehuu mete ma au dook uma ei mai, na, au ambalani kokolak ta no babaak. Leo ndiak, hetu? Naa te au oke fo ei mamanene au, huu Karistus dale malolen neu ei, ma Ana nahiik tao dalek neu ei. 2 Tehuu hambu luma leme ei mai, ta nau lamanene au. Ala kokolak lae, ai tataon, sama leo hataholi fe'ek lai dae-bafok ia tataon nala boe. De mete ma au uni ele uu, na, fama au musi kokolak ta no babaak neu sala. Huu ndia de, au afada memak ei basa nggei, fo suek dei fo au uni ele neti, na, au ta paluu kokolak belak neu sala. 3 Mae ita hataholi basa faik boe oo, tehuu mete ma ita tasisimbo bafak to hataholi fe'ek, na, boso ita mbalak eik, fo tahuu sama leo hataholi nai dae-bafok ia fo ta nalelak Manetualain. 4 Mete ma ita tahuu to hataholi, na, boso mafalende, huu ita manalan ta sama leo hataholi dae-bafok ia enan. Boe ma mete ma ita tahuu to hataholi langga batuk, fo nasisimbo bafak no ita, na, ita boe oo taena Manetualain koasan, fo bisa ofe takalulutu heni hataholi nato'on. 5 Manetualain koasan bisa ofe tao nakalulutu basa dala dudu'ak fo mana laban Manetualain, fo tao hataholi ta nau nalelak Ndia. Ndia koasan boe oo, bisa natudu dalak, fo nggati ita dala dudu'a laan, no dala dudu'a beuk. No leo ndiak, na ita tanoli fo dudu'a tungga Karistus nanonolin.a 6 No'uk leme ei mai mulai lamanene neu Karistus, ma tao tungga basa Ndia hihiin so. Tehuu hambu luma leme ei mai, ta nau lamanene neu Ndia. De ai mahehele so, fo huku sila fo ta mana nau lamanene neu Ndia.7 Ei mahiik suli hata fo nana nitak neme deak mai. Tehuu ei musi suli hataholi dalen. De mete ma hambu hataholi taok aon Karistus nadedenun, na, masaneda neulalau. Huu ai boe oo, Karistus nadedenun, sama leo ndia. 8 Fama ei dudu'a mae, au kokolak lena-lenak la'e-neu koasa fo ita Lamatuan fee ai. Leo ndiak, hetu? Taa! Huu koasa ndia hambun, fo tao natetea ei, ta tao nakalulutu ei. De au ta ela hataholi tao nakamamaek au, huu ala ofe lakalulutu au ueng. 9 Au ta aena maksut fo tao akabibiik ei, unik au susula nggala. 10 Tehuu hataholi la sila kokolak lae, “Boso mbali Paulus. Huu mae ndia susulan liin belak ma ana seli, tehuu mete ma ana mai aon, na, ndia mana ma'a-malek ma ndia kokolan koasan taa.” 11 Elan fo hataholi mana kokolak lou-latak leo ndiak dudu'a dede'ak ia: hata fo ai sulak nai susulak neme dook mai, ta fe'e no hata fo ai kokolak, mete ma ai nai ei laladam mala.
12 Hataholi la sila lahiik soso'u aok lae, sila ndia Karistus nadedenun fo ana seli. Ai ta mambalani makasasamak aok leo sila. Bubuluk aom, hetu? Te ai ta bisa ana seli sama leo sila! Hataholi mata leo ndiak, kada sangga hataholi fo sama leo sila. Boe ma ala tia-toba esa no esa, huu sila mata-aok esa! Sila nggoan nala dei! 13 Naa te ai mesa nggai ta kokolak koaok, mete ma neten taa. Ai kada kokolak leo ndiak la'e-neu ues ndia fo Manetualain fee ai so. Hata fo ai tao fee ei so, tungga kada hata fo Manetualain nadenu ai taon. Huu ai ta tao ues fe'ek neme ndia mai. 14 Teteben, ai ta kokolak lena-lenak, neu faik fo ai kokolak koaok la'e-neu ei. Huu ai mai tui ei, la'e-neu Karistus Hala Malolen. Ei boe oo, simbok ai kokolan. Mete ma Manetualain ta nadenu nitak ai, tehuu ai kokolak koaok la'e-neu ei, na, ndia sala. 15 Mete ma hataholi fe'ek tao ues, na, ai ta kokolak koaok mae, ndia huu ai uen. Penting soa-neu ai ndia, ei namahehelem tamba latea. No leo ndiak, ai uen buna-boan neu ei, neme makahulun mai, tamba nakandoo. 16 Boe ma ai bisa miu mafada Karistus Hala Malolen nai mamana fe'ek kala malai ei boboam, fo bei ta hambu hataholi mana tao ues nai ndia. No leo ndiak, ai ta mahondak mia hataholi fe'ek fo mana makalala'ok ndia uen nakahuluk nai ndia so.
17 Huu nai Manetualain Susula Malalaon nana sulak nae, “Mete ma hambu hataholi nau kokolak koaok, na, elan fo kada ana kokolak koaok la'e-neu ita Lamatuan Manetualain.”b 18 Mete ma hataholi esa kokolak koaok la'e-neu ndia ao-inan, na, ndia sosoan ta faa boe. Tehuu mete ma ita Lamatuan ndia koa la'e-neu hataholi ndia, na ndia bei fo ana seli!