Doi tulu-falik fee hataholi Salanik lai Yerusalem
9
Teteben, na au ta paluu sulak bali, fo oke ei tulu-fali Lamatuak hataholi kamahelen nala. 2 Huu au bubuluk so, ei mamahoko tulu-fali hataholi leo ndiak. Au boe oo, ahiik afada hataholi kamahelek malai Makedonia la'e-neu ei dale malolem. Au tui so ae, ei malai propensi Akaya, mahehele mima teu maneuk mai so, fo haitua doi tulu-falik. Au boe oo, tui la'e-neu ei dale namahokom, fo tao hataholi fe'ek nau tungga tulu-fali hataholi mana hambu toto'ak kala. 3 Boe ma au adenu ita tolanoon nala so, fo latudu ae, hata fo ai tuik la'e-neu ei so, ta pepekok. Au afada leo ndiak, fo suek ei mahehele memak. 4 Mete ma hambu hataholi Makedonia mai no'u lo au, boe ma ei bei ta mahehele, na, ita basa nggata mae. Boso losak au namaheheleng neu ei, neten taa. 5 Huu ndia de au dudu'a ae, malolenak ita tolanoon nala lakahuluk leni ei leu, fo ei basa nggei, bisa heti doi tulu-falik ndia, tungga ei hehelu makahulun. Ei musi fee neme ei dale malolem mai. Boso fee no ei dale hada kodem.6 Ndia huun leo iak: “Hataholi fo kada sele bini faak, na dei fo hambu buna-boak faak boe. Hataholi mana sele bini no'uk ma ta nakadidia, dei fo hambu falik buna-boak ma baba'e-babatik makadotok boe.” 7 Hataholi esa-esak musi naketu aon, ana fee hida. Boso no dale bibiak. Boso fee huu hataholi nakaseti. Huu Manetualain sue hataholi fo mana fee no dale malenggak. 8 Manetualain nabe'i fee ei basa baba'e-babatik mata-matak. Ndia boe oo, nabe'i fee lena-lenak, fo suek ei ta kulan hata esa boe. Huu mete ma ei paluu, na, dei fo ei hambu dai lena. No leo ndiak, na ei ba'e fee ei lenam ndia, fo tulun basa tatao malole. 9 Nana sulak nai Manetualain Susula Malalaon nae,
“Manetualain nahiik ba'e fee hataholi ena taak kala,
neme Ndia dale malolen mai.
Ana tao ndoos nakandoo,
huu Ndia dale ndoon nakatataka nakandoo.”a
10 Manetualain ndia fee bini, fo hataholi mana tao ue daek kala sele. Manetualain fee nana'ak, fo ita bisa ta'a. Ma Manetualain fo sama ndia, dei fo fee ei baba'e-babatik, fo suek ei bisa tao ndoos. Ndia sama leo ei dadik hataholi mana tao ue daek, de Manetualain fee bini fo ei sele. Ma ei buna-boam ndia, Ana taon tamba faik, boe namano'u.b 11 Manetualain nau fee ei lena heni ei mesa nggei paluuk, fo suek ei bisa tulu-fali hataholi fe'ek kala leme ei dale malolem mai. De mete ma ei tulu-fali hataholi fe'ek leo ndiak so, na, dei fo ala loke makasi neu Manetualain. 12 Huu tulu-falik fo ei feen neu Manetualain hataholin malai ele ndia, neu ko tulun nala sala. Ma ndia boe oo, tao nala ei moke makasi neu Manetualain. 13 Huu ledo-eik ei tulu-fali hataholi fe'ek kala, na ndia natudu buti nae, ei mamahele tebe-tebe. Ndia boe oo, tao nala hataholi fe'ek kala so'uk koa-kiok neu Manetualain. Huu ala bisa lita, ei namahehelem neu Karistus Hala Malolen ndia, ta pepekok. Ndia, huu ei tao tungga ei namahehelem. Boe ma ledo-eik ei fee tulu-falik neme ei dale malolem neu sala, ma fee hataholi fe'ek boe, ndia tao nala sala so'uk koa-kiok neu Manetualain.
14 Hataholi mana simbo nala tulu-falik neme ei mai, dei fo hule-haladoi fee ei. Sila boe oo, dokodoe nau lita ei, huu Manetualain natudu Ndia dale malolen makadotok neu ei so. 15 Tehuu Manetualain palsen ita Hadia esa lolen seli so. Fo ndia, Yesus! Ndia belin, lena heni basan! Huu ndia de, ita basa nggata sama-sama toke “Makasi no'uk!” neu Manetualain.