Ala fee tulu-falik no dale malalaok
8
Tolanoo susue nggala ei! Ai hihiin, na ei bubuluk Manetualain dale malolen, fo Ana natudun neu salanik malai propensi Makedonia la so. 2 Huu mae ala hambu toto'ak no'uk seli, tehuu dalen nala lamahoko lakandoo. Huu ndia de mae sila hata taak boe oo, tehuu ala bei fee doin nala makadotok no dale malalaok, fo tulu-fali hataholi kamahele fe'ek mana hambu toto'ak kala. 3 Au mesa nggau bisa tui ae, ala fee basa hata fo ala bisa fee. Boe ma ala fee tamba lena heni ndia bali. Ta hambu esa boe nakaseti sala. 4 Sila mesak kasa loke lo tebe-tebe, fo suek ai soi dalak fee sala. No leo ndiak, na, ala bisa ha'i baba'ek, fo tulu-fali hataholi kamahelek mana hambu toto'ak malai Yerusalem.a 5 Makahulun ai mamahena ala sangga tao leo iak, tehuu ala taok ndia, lena heni ai mamahenak! Kaesan, ala fee sila ao-inan neu ita Lamatuan. Boe ma ala kokolak bali lae, “Ai nau fee ai ao-inan fo ono-lau ei, huu ndia tungga Manetualain hihiin.”6 Huu salanik malai Makedonia conton leo ndiak, de ai moke fo Titus fali neni ei neu nai Korintus bali, fo suek ei boe oo, bisa tulu-fali mala Manetualain hataholin mana hambu toto'ak malai Yerusalem. Huu makahulun, ndia mulai nakabubua doik fee sala. Boe ma hatematak ia, ai moke fo ana bisa tao natetu ei uem tulu-fali hataholi.b 7 Ei uem neu Lamatuak, memak malolen seli. Conto leo: ei namahehelem matea; ei kokolam malole; ei bubuluk no'uk la'e-neu Lamatuak; ei samanem fengga-fengga; ma ei sue mala ai seli. Huu ndia de au nau ei boe oo, tulu-fali mala Lamatuak hataholin mana hambu toto'ak no fee doik makadotok.
8 Au ta palenda ei nai Korintus fo fee doik makadotok, tehuu au nau uku-sudi ei. Huu salanik manai Makedonia la nau tulu-fali sala so. De no leo iak, ei boe oo bisa matudu ei susuem tebe-tebe neu hataholi mana hambu toto'ak kala. 9 Huu ei bubuluk so mae, ita Lamatuan Yesus Karistus, natudu Ndia dale malolen neu ei so. Makahulun, Ndia sama leo hataholi kamasu'ik. Tehuu Ana hele fo dadik hataholi ena taak, fo tulun ei, suek ei bisa dadik kamasu'ik nai basa dede'ak lala'en.
10 Teu maneuk, ei mulai makabubua doik fo fee sala so. Ei ta kada fee doik, tehuu ei tulu-fali mima ei dalem mai boe. De tungga au, na, ei musi tao leo iak: 11 Makahulun ei nau tulu-fali Lamatuak hataholin mana hambu toto'ak lai Yerusalem ele so. De hatematak ia, fee basa hata fo ei maketun nau tulu-fali so. Ma ei mabe'i fee hida, na fee leo. Tehuu penting ndia, fee no dale namahokok. 12 Huu, mete ma fee no dale namahokok tungga hida fo ita tabe'i fee, na, ndia malole boe. Neme kada ita mai. Hataholi boso fee no nakasetik, hata fo dei fo tao nakatoto'ak ndia.
13 Au ta maksut tao amabela ei, fo suek hataholi fe'ek hambu da'u anak. Huu au maksut, na ita basa nggata lemba sama-sama sila toto'an. 14 Huu hatematak ia ei maena lenak, ma sila ta mana daik. Doo-doo boe ma sila bisa bala, mete ma ei ta mana daik. No leo ndiak, na ita bisa lemba sama-sama. 15 Ndia sama leo Manetualain Susula Malalaon sulak nae,
“Hataholi mana hambu no'uk,
ta hambu lenak neme hata fo ala paluuk mai.
Ma hataholi mana hambu faak,
ta kulan neme hata fo ala paluuk mai.”c
La'e-neu Titus, ma hataholi fe'ek fo mana nau leni tulu-falik
16 Au oke makasi neu Manetualain, huu Ana kokoe Titus, suek ana nau tulun ei, sama leo au nau tulun ei. 17 Memak ai moken, fo neu tilo ei. Naa te, ndia hihii hehelin ndia boe. Huu ndia de, ndia mesak kana nau neu tulun ei, ta huu au o'okeng. 18 Tehuu ana ta mesak kana neu. Ai boe oo, madenu ai tolanoon esa fo neu no'u no ndia so. Basa salanik malai ia lalelak hataholi ia, huu ana tao ues mbilu-mbuse so, fo nafada hataholi la'e-neu Lamatuak Hala Malolen. 19 Salanik malanggan nala boe oo, hele lalan fo la'ok sama-sama no ai, suek tulun ai nai ai ue malolen ia. Ai makalala'ok ues ia, fo matudu ita Lamatuan ana selin, ma tao malole soa-neu hataholi mana hambu toto'ak malai Yerusalem.
20 Ai sangga dalak fo tao ndoos, suek ta hambu hataholi bisa soli salak neu ai nae, ai ta tao ues no teteben, neu faik fo leni doik fee hataholi mana paluuk kala. 21 Huu ai dudu'a neulalau fo tao tetebes, neme dale malalaok mai, nai Manetualain matan, ma nai hataholi matan boe.d
22 Hambu tolanook esa bali fo ai madenun neu no'u no Titus asa, fo leni doik ndia. Ai palisak malan la'i no'uk so. Boe ma ai bubuluk so, ana nau tao ues mbilu-mbuse soa-neu ei. Ana namahoko leo ndiak, huu ana bubuluk so nae, ei tao ndoos.
23 Mete ma hambu hataholi natane la'e-neu Titus, na, mafada sala mae, Titus ndia, au tolanoong mana tao ues no au nakandoo soa-neu ei. Hataholi kamahelek nai mamana fe'ek boe oo, hele lala sila hataholin so, fo ala tungga leni doik ia, leni Yerusalem leu. Ala lakabubua fo sangga leu so. Titus sama-sama no sala. Dei fo basa sala latudu Karistus ana selin leo ndiak. 24 De ei musi matudu susuek neu hataholi mana leni doik ndia. Ma matudu sala boe, hatina de ai mahiik koa ei. No leo ndiak, hataholi kamahelek neme salanik malai sudi bee, bubuluk tetebes lae, ei sue sala.