2 Tolanoo nggala ei! Fee lelak neu ai. Malengga dalek, fo simbo mala ai no malole. Boso makatema ei dalem. Huu makahulun, neu faik fo ai nai ei laladam mala, ai ta tao mitak salak neu hataholi esa boe. Ai ta fufudi mitak hataholi fo tao salak. Ai boe oo, ta kedi mitak hataholi, fo sangga nanalak neme sila mai. 3 Hata fo au kokolak ndia, ta soli salak neu ei. Huu au afada so ae, ai sue ei. De talo bee boe oo, ai nana mba'ak mia ei, mae ita mate, do ita tasoda. 4 Hatematak ia au ta dudu'a bali, huu au amahele ei. Au boe oo koa ei. Ei boe oo tao matetea au daleng. De mae ita hambu toto'ak mata-matak, tehuu au daleng namahoko nakandoo huu ei.

5 Makahulun ai mini propensi Makedonia miu, ai manggu malan seli. Huu ai hambu toto'ak neme kii-konak mai. Ai masisimbo bafak mia hataholi deak. Ai boe oo, mameda bii nai ai dalen.^a 6 Tehuu Manetualain ndia tao natetea hataholi fo samanen ma'a-male ma nameda mabela. Ndia boe oo, tao natetea ai dalen, neu faik fo Ana nadenu Titus neni ai mai. 7 Titus mamain ndia, tao natetea ai dalen. Huu ana nafada nae, neu faik fo ana bei nai ele, ei tao matetea ndia dalen so. Ai mamanene nafafadak leo ndiak, ndia tao natea ai dalen boe. Ndia boe oo tui nae, ei dokodoe nau mita au, ma ei fale ei dalem tebe-tebe neu dede'ak fo makahulun dadi nai ei laladam mala so. Ndia boe oo, tui la'e-neu ei masusuam fo tulun au. Huu ndia de au daleng namahoko.^b

8 Au bubuluk ae, au susula makahulung fo ka'i belak ei ndia, memak tao nala ei mameda dale hedi. Tehuu au ta fale dalek sulak susulak ndia. (Naa te faik ndia, au fale dalek faa, neu faik fo au bubuluk ae, au susulang ndia, tao nala ei dale hedi, mae kada ta doo anak.) 9 Tehuu hatematak ia, au daleng namahoko. Au ta ameda amahoko, huu faik ndia, ei mameda dale hedi. Taa! Au ameda amahoko, huu faik ndia, au susulang kokoe fo ei hondak. Boe ma ei manaku ei salam, ma la'o ela ei dede'a ta malolem mala, fo fali tungga Manetualain dala soda ndoon. Huu Manetualain ndia tao ei fale dalek leo ndiak. No leo ndiak, na, ai ta tao naodek neu ei. 10 Mete ma ita fale dalek tungga Manetualain hihiin, na, ita hahae tao dede'a manggalauk kala, fo fali tungga dala soda ndoos. Ndia nakambo'ik ita teme Manetualain huhukun mai, de ita ta paluu tasoda to fale dalek takandoo. Tehuu mete ma kada ita fale dalek nai bifi dook sama leo hataholi malai dae-bafok ia natetemen, na, dei fo ita takalulutuk.

11 Hena ei dudu'a sudik kana! Ledo-eik ei lees au susulang ndia, au bubuluk ei fale dalek boe. Ndia tungga Manetualain hihiin. Huu, ndia tao nala ei tao ues mbilu-mbuse, fo koka heni dede'a manggalauk neme ei sodam mai. Ei manggu mia ei manggalaum so. Ei boe oo bii, boso losak dei fo ei tao manggalauk seluk bali. Ei dokodoe nau mita au, ma mahehele makandoo, fo tao dede'a malole. Ei boe oo, nau mahehele fo huku hataholi mana tao salak. Huu, ei tao ndoos leo ndiak, de ei malalaok. No leo ndiak, ta hambu esa bisa soli salak neu ei. 12 De au ta sulak au susula makahulung ndia, fee hataholi mana tao manggalauk. Au boe oo, ta sulak fee hataholi fo manggalauk pangaru nala sila. Tehuu au sulak susulak ndia fee ei, fo suek au atudu ae, ei kokolam nai Manetualain matan ndia, tetebes. Ma ei sue tebe-tebe ai. 13 Basa ia la tao latea au daleng.

Ei boe oo tao matea Titus dalen so, fo suek dalen bisa ndoo-ndoo. Ndia boe oo, tao tamba namahoko ai dalen. 14 Au soso'uk itak ei neu Titus, la'e-neu ei tatao malolem. Au boe oo afada ndia ae, ei ta tao mitak au mae. Huu, basa dede'ak fo ai tui mitak ei ndia, tetebes. Boe ma basa dede'ak fo ai tui Titus la'e-neu ei ndia boe oo, tetebes. 15 De la'i-la'ik ana nasaneda hata fo ei taok, ma hata fo ei kokolak, na, ana boe sue ei. Ma ndia boe oo, nasaneda ana ele neti, de ei simbok kana no hadak, tehuu ei boe oo dudu'a neu kada au susulang. 16 Au daleng namahoko, huu au bisa amahele ei nai basa dede'ak lala'en. De au ta dadi dudu'ak neu ei so bali!