Lamatuak tao malole neu ita
6
Huu ai tao ues sama-sama mia Lamatuak, ai nau fee nanoli-nafadak neu ei leo iak: Manetualain natudu Ndia dale malolen no'uk neu ei so. De boso ei simbo mala Ndia dale malolen no sosoa taak. 2 Huu nai Ndia Susula Malalaon, nana sulak nae,“Nandaa no fain, Au amanene neu o.
Au boe oo, fali ala o neu faik fo Au asala'e ala hataholi.”
Mamanene neulalau, baa! Hatematak ia, fain malole so. Huu hatematak ia, Lamatuak fain fo nasala'e nala hataholi.a
3 Huu ndia de ai nau manea matalolole ai aon, fo kada masoda ndoos. Huu ai ta nau matabaa hataholi mana nau neni Lamatuak dala sodan neu. Ma ai boe oo, nau kokolak ndoos, fo suek hataholi boso kokolak naboboo ai nade malolen. 4 Ma basa hata fo ai taok ndia, ai masusua matudu mae, ai ia Manetualain hataholi mana tao ue malolen. De mae ai hambu toto'ak ma doidosok do, masoda nai naodek laladan, na, kada ai makatataka makandoo. 5 Ai boe oo, makatataka makandoo neu faik fo hambu mbombokok, neu faik fo ala landee ai mini bui dale miu, neu faik fo hataholi tao naodek, neu faik fo ai tao ues mbilu-mbuse, neu faik fo ai ta bisa sunggu ma neu faik fo ai mameda ndoe.b 6 Ai boe oo, makatataka mia dale malalaok. Ai bubuluk no'uk la'e-neu Manetualain. Ai makatataka mia nggale loak. Ai tao malole neu hataholi. Ai matanggodo Manetualain Dulan heti ai. Ai boe oo, sue tebe-tebe hataholi ta no dea-dalek. 7 Ledo-eik ai kokolak, na ai kokolak tetebes, ma ta pepeko malelak. Ai boe oo, simbo mala koasa neme Manetualain mai, fo tao malole. Ndia sama leo ai dadik soldadu, fo to'u manala mana daik neme Manetualain mai, fo ai matati laban musu, ma ta nana senggik. 8 Ai boe oo makatataka, mae hataholi fee hada-holomata neu ai, do, ala kokolak laboboo ai naden; mae ala kokolak tao latuda ai, do, lanea ai nade malolen; mae hataholi kokolak pepekok lae, ai kedi mala hataholi, do, ala kokolak lae, ai kokolak no teteben. 9 Hambu luma ta lalelak ai. Tehuu hambu no'uk lalelak ai naden. La'i no'uk elaba'ik ai mate so, tehuu ai bei masoda mahele boe. Ala huku belak ai la'i no'uk, tehuu ai ta mate boe. 10 Mae ai mameda mabela, tehuu ai dalen namahoko nakandoo boe. Mae ai doin taa, tehuu ai tao hataholi no'uk lamasu'i lai dalen nala. Ndia sama leo ai ta maena hata-hata, tehuu ai hambu basa-basan boe.
11 Ai kokolak ledo-ledo neu ei nai kota Korintus. Ai boe oo, sue ei tebe-tebe. 12 Ai matudu ai susuen neu ei, no ai dale katematuan so. Tehuu ei matudu ei susuem neu ai no dale bibiak. 13 De au sangga anoli-afada ei, sama leo ei dadik au ana nggala. Malolenak, ei sue ai no ei dale katematuan.
Boso mamba'a aok mia hataholi f0 ta namahele neu Lamatuak
14 Boso mamba'a aok mia hataholi fo ta namahele neu Karistus. Huu, ei ta sama. Hataholi kamahelek fo nasoda ndoos, ta nandaa no hataholi mana laban Lamatuak, boe ma ta nandaa, mete ma ala lasusua fo tao ues sama-sama. Hataholi dale malole, ma hataholi ta malole, ta landaa dadik tia-laik fo eik esa. Ndia sama leo manggaledok ta bisa seseok no makiuk. 15 Karistus ta bisa nala halak no nitu la malanggan, hetu?c Leo ndiak boe, hataholi fo ta namahele neu Manetualain, baba'en ta sama-sama no hataholi fo namahele neu Ndia.
16 Ei duduam leo beek, bae? Meda ei mae hetuk, ei bisa maso mini Manetualain uma huhule-haladoin miu, fo makaluku-makatele neu Ndia dei, bei fo maso bali mini uma sosonggok miu, fo hule-haladoi neu bua sosonggok sila, do? Ta nandaa, hetu! Huu Lamatuak ndia, Manetualain masodak. Ndia boe oo dadik ita Lamatuan fo naena haak palenda ita. Boe ma ita dadik sama leo Ndia uma huhule-haladoin, huu Ana leo nai ita dalen so. Manetualain sulak nai Ndia Susula Malalaon so nae,
“Au umang nai Au hataholing laladan nala.
Au boe oo maso-kalua nai sila laladan nala.
Au nau dadik sila Manetualain.
Sila boe oo, dadik Au hataholing.”d
17 Huu ndia de Lamatuak boe sulak leo iak nae,
“Ei musi kalua mima sila laladan mai, ma makadodook mia sala,
fo suek ei boso dadi sama leo sila.
Ei dalem musi malalaok.
Boe ma ei musi makadodook mima basa hata fo tao nanggenggeo ei dalem,
no leo ndiak, Au simbok ei no malole.e
18 Au nau dadik ei Amam;
ei boe oo dadik Au ana nggala.
Ndia ndia, ita Lamatuan kokolan.
Ndia Mana Koasa Manai Lain Seli.”f