5
Huu ita bubuluk, ita ao-inan hatematak ia, ita pake tataak nai dae-bafok ia, sama leo tenda esa fo ita tambadedei tataak kana. Mae ita ao-inan dei fo lakalulutuk henin, tehuu ta paluu dudu'a, huu Manetualain sadia mamana malole esa, fee ita nai nusa sodak so. Hataholi ta tao mamanak ndia. Tehuu Manetualain ndia taon, boe ma mamanak ndia nahele nakandoo. 2 Huu ita sota to ita ao-inan hatematak ia nai dae-bafok ia so. Ma ita dokodoe nau hambu ao-ina beuk, fo dei fo ita paken nai nusa sodak. 3 Boe ma mete ma ita losa nai ele so, na, dei fo ndia sama leo ita ta takahola, tehuu pake balo'a beuk.a Huu ta kada dadik dulak, tehuu ita hambu ao-ina beuk nai ele. 4 Ita ao-inan nakalulutuk hatematak ia, tao nala ita hela naluk ani hahaek, huu tameda mabela. Mae leo ndiak, tehuu ita ta nau mate, fo ta taena ao-inak hata-hata bali. Taa! Ita nau hambu ao-ina beuk, fo suek la'o ela ao-ina laak kala, nggatin no soda beuk fo tetebes. 5 Manetualain tao ita sadia simbok tala soda beuk ndia. Ndia boe oo, fee Dulan neu ita, fo dadik tanda esa neme Ndia hehelun mai.6 Huu ndia de, ita tamahele tebe-tebe takandoo. Ita bubuluk tae, mete ma ita bei nai ita ao-inan hatematak ia, na, ita boe oo bei dook neme Lamatuak mai. 7 Huu ndia de, ita tasoda tenik tamahele neu Lamatuak. Ita ta bisa kada tasoda tenik hata fo ita bisa titan nai dae-bafok ia. 8 Tehuu ita boe oo tamahele tebe-tebe tae, leo ita mate la'o ela ita ao-inan hatematak ia, fo teu tasoda sama-sama to Manetualain nai nusa sodak, na, neu ko ita tamahoko lena bali. 9 Mae ita tasoda takandoo nai dae-bafok ia, do ita mate nai ia, do tasoda nai ele, tehuu penting ndia, na ndia ita tao tamahoko Lamatuak dalen. Huu ita hihiin ndia. 10 Boso mafalende henin. Doo-doo te basa hataholi musi lasale Karistus. Ndia ndia, Mana Maketu Dede'ak fo timba-tai basa hataholi sodan nai dae-bafok ia. Boe ma dei fo Karistus bala no mandaan tungga hata fo hataholi taon. Huu Karistus bubuluk, mete ma hataholi ndia tao malole, do tao ta malole.b
Ita bisa malole to Manetualain, huu Karistus
11 Huu ai masaneda dei fo Karistus palisak ai sodan, de ai bii ma fee hada-holomata neu Ndia. Ma ai tao ues mbilu-mbuse fo kokoe hataholi, suek lamahele neu Karistus. Manetualain bubuluk ai dale malalaon so. Au nau fo ei boe oo, bubuluk ai dale malalaon. 12 Ai ta soso'uk aok nai ei matam. Taa! Tehuu ai mafada to'on neu ei, fo suek ei bisa kokolak koaok la'e-neu ai, ma ta paluu mae. No leo ndiak, ei bisa mataa neu hataholi la fo mana kokolak koaok. Huu ala koaok la'e-neu sila uen buna-boan, fo hataholi bisa litan, naa te sila dalen ta malalaok. 13 Mete ma ei taok ai kamuluk, na, ai kokolak leo ndiak leo, fo makalala'ok Manetualain uen. Mae ei ta malelak, tehuu Manetualain nalelak. Mete ma ai kokolak pake dudu'a ndoos, na, ai kokolak leo ndiak fo tulun ei.
14 Karistus sue nala ita seli. Ndia fufu'a ai samanen fo makalala'ok ai uen. Huu ai mamahele mae, Hataholi esa, fo ndia Karistus, mate fo nggati basa hataholi. Ndia ndandaan nae, ndia sama leo ita basa nggata mate so, fo la'o ela soda laak, ma ta naena haak hata-hata bali nai dae-bafok ia. 15 Karistus mate soa-neu basa hataholi, fo suek basa hataholi mana masodak nai dae-bafok ia, ta lasoda tungga sila hihii hehelin bali. Tehuu hatematak ia ala musi lasoda tungga Karistus hihiin, huu Ana mate nggati sala so, boe ma Ana nasoda fali.
16 De mulai hatematak ia, ita boso timba-tai hataholi pake hataholi basa faik u'ukun. Mae makahulun ita mesa nggata timba-tai Karistus pake hataholi basa faik dudu'an. Tehuu hatematak ia, ita ta timba-tai Ndia leo ndiak bali. 17 Huu ndia de hataholi fo nana mba'ak no Karistus, dadik hataholi beuk so, fo sodan beuk. Ana ta sama leo makahulun bali, huu soda laan mopo henin so. Taak kana so! Huu hatematak ia, beuk nai ia so. 18 Basa ia Manetualain ndia taon. Ndia ndia tao mole, fo ita malole falik to Ndia, huu Karistus koka heni ita sala-singgon so. Boe ma Ana fee ues neu ita boe, fo ita tatudu dalak, suek hataholi fe'ek boe oo, bisa mole falik lo Manetualain.
19 Masaneda, huu neu faik fo Karistus bei nai dae-bafok ia, Manetualain pake Ndia fo noo hataholi leu mole fali lo Manetualain. De Ana ta hingga sila salan bali, boe ma ala ta lemba salak huhukun bali. Basa boe ma Ana fee ues neu ita, fo teu tafada hataholi tae, ala bisa malole fali lo Ndia.
20 Huu ita dadik Karistus wakil. De Manetualain pake ita fo too hataholi leu mole fali lo Ndia. Huu ai dadik Karistus wakil, de ai boe oo moke ei mae, “Manetualain dokodoe ei malole fali mia Ndia.” 21 Karistus mesak kana ta tao nita salak. Tehuu Manetualain feen Ana lemba ita sala-singgon so. Manetualain tao leo ndiak neu ita, huu Karistus mamaten soi dalak fo ita bisa tasoda to dale ndoos, sama leo Manetualain dale ndoon boe.