Hata mabeli fo nana mbedak nai ule dae dale
4
Manetualain natudu namemeda kasian neu ai so. Huu ndia de, Ana nadenu ai so, fo miu mafada hataholi la'e-neu Ndia Hehelu Beun. Huu ndia de ai makatataka makandoo, ma samanek ta mana malek. 2 De neme makahulun mai ai maketun leo iak so: ai mafada ledo-ledo so mae, ai ta nau tao dede'a manggalauk, sama leo hataholi fe'ek kala. Ala lahiik tao lafufunik, fo suek hataholi ta bisa lita. Ma ala ta mae lalelak. Tehuu ai ta nau pepeko hataholi. Ai boe oo, ta kokolak lou-latak la'e-neu Manetualain Dede'a-kokolan, tehuu ai fee nanonolik ledo-ledo la'e-neu hata fo ndoos. No leo ndiak, basa hataholi bisa palisak aon ai kokolan nai Manetualain matan, boe ma timba-tai aon ai ia, hataholi matak leo beek. 3 Mete ma hataholi ta nau nalelak Lamatuak Hala Malolen fo ai fee nanonolik ndia, na, dei fo ala lakalulutuk, huu ala laelak lo Lamatuak.4 Nitu la malanggan ndia, sama leo lamatuak esa fo hataholi la lakaluku-lakatele neun hatematak ia. Ana tao nala hataholi luma langga uten nala mba'a, sama leo dalen nala lakatema. Sila ndia, hataholi fo ta lamahele neu ita Manetualain fo tetebes. Huu dalen nala lakatema leo ndiak, ndia sama leo ala ta bisa lita Manetualain manggaledon. Huu ndia de, ala ta bisa lalelak Hala Malole la'e-neu Karistus. Sila boe oo, ta lalelak Karistus ana selin. Huu Karistus ndia, mata-aok esa no Manetualain. 5 Ai ta kokolak no'uk, la'e-neu ai aon. Tehuu ai kokolak no'uk la'e-neu Yesus Karistus, ita Lamatuan. Ai kokolak la'e-neu ai aon, kada ia: fo ndia, ai tao ai aon sama leo ata fo ono-lau ei, huu ai dadik Yesus Karistus hataholin. 6 Makahulun ele, Manetualain kokolak nitak nae, “Musi hambu manggaledok nasa'a nai mamana makiuk.” Boe ma Ana tao manggaledon nasa'a nai ita dalen. Huu Ana nahiik fee manggaledon neu ita. Ndia, ndandaan nae, ledo-eik ita dudu'a la'e-neu Karistus, ita boe oo tasaneda Manetualain ana selin.a
7 Mae ai ia, kada hataholi basa faik, tehuu Manetualain tao bua mabeli ia nai ai dalen so. Ndia sama leo hataholi esa mbeda ndia bua mabelin nai ule dae dale. Bua mabeli ia, fo ndia Manetualain manggaledon. Manggaledok so nae, koasa fo ana seli manai ai, ta naoka nai ai, tehuu naoka nai Manetualain. 8 De mae hataholi tuni-ndeni fo tao nakatoto'ak ai sudi nai bee, tehuu kada ai makatataka makandoo. Mae ai ta bubuluk basan, tehuu ai samanen nala boe oo ta ma'a-male. 9 Mae hataholi tao nakatoto'ak ai makadotok, tehuu Manetualain ta la'o ela ai mesa nggai. Mae hataholi tao ai, tehuu ala ta bisa tao lakalulutu heni ai. 10 Huu ai hambu doidosok mata-matak so, de ai mini bee miu, na, ai bisa tao nasanenedak hataholi mae, Yesus boe oo, hambu doidosok makadotok, neu faik fo Ana mate. Mae hataholi tao ai mata-matak, tehuu ai masoda makandoo. Ndia boe oo, tao nasanenedak nae, Yesus nasoda nakandoo nai ai dalen. 11 Tetebes! La'i no'uk so, ai sodan ia, elaba'ik mate, huu ai dadik Yesus hataholin. No leo ndiak, basa hataholi bisa bubuluk lae, Yesus fee ai soda tetebes, mae dei fo ai mate. 12 De mae babasan, ai mate, tehuu ai ta bii kokolak la'e-neu Karistus. Huu ai sadia mate leo ndiak, fo suek ei bisa hambu sodak tetebes.
13 Nai Manetualain Susula Malalaon nana sulak nae, “Huu au amahele neu Manetualain, de au kokolak.” Ai dudu'an boe oo sama. Huu ai mamahele neu Manetualain, de ai musi kokolak mafada hataholi la'e-neu Ndia.b 14 Ai bubuluk mae, Manetualain ndia tao nasoda falik ita Lamatuan Yesus Karistus neme mamaten mai. Ndia boe oo, dei fo tao nasoda falik ita, huu ita nana mba'ak to Yesus. Dei fo Manetualain nambadedei ita basa nggata neu Ndia matan, fo Ana simbo nala ita. 15 Manetualain tao basa dede'ak kala ia, fo tulun ei. Ndia boe oo, nau natudu Ndia dale malolen neu hataholi la, fo tamba faik boe lamano'u. Dei fo sila boe oo, loke makasi no'uk neu Ndia. Boe ma sila boe oo, manaku Ndia ana selin.
Ita tamahele takandoo neu Lamatuak
16 Huu ndia de, ita takatataka takandoo, no samanek ta mana ma'a-malek. Mae ita ao-inan nala dadik lakalulutuk, tehuu Manetualain tao ita dalen nala boe latea tungga-tungga faik. 17 Huu tungga ita dudu'an, na hatematak ia ita hambu toto'ak mata-matak. Tehuu ita musi tasaneda tae, dei fo Lamatuak nau so'u dema-demak ita. Huu ndia de, ita taok hata fo mana dadik hatematak ia, sosoan ta faa boe! 18 De ita musi mete dede'ak fo ta nana nitak kala boe. Boso kada mete nana nitak kala. Huu dede'a nana nitak kala ia, ta lahele lala dook. Tehuu dede'ak fo ta nana nitak kala sila, dei fo ala lahele lakandoo no ta mana ketuk.