Doik fo hataholi fee, suek tulu-fali Lamatuak hataholin nala
16
Hatematak ia, au sangga sulak la'e-neu doik fo ei makakabubua malak so, suek tulu-fali Lamatuak hataholin nala malai Yerusalem. Au afada hataholi kamahelek kala malai propensi Galati so, fo ala musi lakabubua doik sila leo beek. Hatematak ia, ei musi tao tungga leo ndiak boe.a 2 Tungga-tungga sosoda ina, basa hataholi musi mbeda sila doin faa, neme sila uen buna-boan mai. Boso mahani au mai, bei fo ei mulai makabubua doik. 3 Boe ma mete ma au mai so, na, ei matudu ei hataholim fo ei mamahelen, fo leni doi tulu-falik sila fee Lamatuak hataholin nala malai Yerusalem. Basa dei fo au sulak susulak fo alelelak kasa leu malangga salanik manai ele. 4 Ma mete ma ei dudu'a mae, malole mete ma au tungga boe, na, ai bisa miu sama-sama.Paulus tao rencana fo sangga neni mamana no'uk neu
5 Mete ma au la'o ndule propensi Makedonia so, na, bei fo au uni ei neti. Tehuu au bei nau uni Makedonia uu dei.b 6 Basa ndia, bei fo au sangga uu leo tataak ua ei ta doo anak; fama losa fai makasufuk katemak esa. Basa boe ma ei bisa mia au losa mamana fe'ek bali. 7 Au maksut uni ei neti, dook. Huu au sangga leo ua ei ala dook faa, mete ma ndia tungga Lamatuak hihiin. 8 Tehuu au bei nau leo nai kota Efesus ia, losa fai malole Pentakosta, [na ndia basa faik lima hulu neme fai malole Paska mai].c 9 Mae nai ia hambu hataholi no'uk laban Lamatuak uen, tehuu au bei bisa tao ues no'uk, huu nai ia hambu lelak neulaun seli.d
10 Mete ma Timotius dadi neni ei neti, na, simbok malan no malole, fo ana boso dudu'a hata-hata. Huu ndia ndia, ita Lamatuan hataholi mana tao uen, sama leo au.e 11 Boso matanggodo hataholi suli latahihiik ndia. Tulun ndia, losa ana fali no sodak, suek ana bisa fali neni au mai. Huu au ua tolanoo fe'ek kala, mahanin.
12 Hambu dede'ak esa bali. Au kokoe ita tolanoon Apolos so, fo neu tilo ei ma tolanoo fe'ek kala. Tehuu hatematak ia ana bei ta nau neti. Kada mahani, mete ma ana hambu fai malole, bei fo neti.
Tao dede'ak esa bali
13 Ei musi manea aok neulalau! Ei musi mahele fo mamahele makandoo neu Lamatuak! Boso bii! Tao matetea aom! 14 Ei tao sudi hata, na, matudu ei susuem.
15 Tolanoo susue nggala ei! Ei basa nggei bubuluk mae, ka'a Stefanus no uma isin nala dadik hataholi sososak fo lamahele neu Karistus, nai propensi Akaya ele. Ala tao ues mbilu-mbuse boe, fo ono-lau basa hataholi kamahelek malai ele. De au oke fof 16 ei mamanene hataholi mata leo ndiak. Fo ndia, hataholi mana tao ues tingga-tingga, fo sama-sama ono-lau hataholi kamahelek kala.
17 Au dokodoe sangga uu tilo ei. Au daleng namahoko, huu ka'a Stefanus, ka'a Fortunatus, ma ka'a Akaikus mai lai ia. No leo ndiak, ala nggati ei. 18 Ala tao latetea au daleng, sama leo ala tao latetea ei dalem boe. Ei musi fee hada-holomata neu hataholi mata leo ndiak kala.
Paulus haitua soda-molek soa-neu basa sala
19 Salanik kala malai propensi Asia haitua soda-molek soa-neu ei. Ka'a Akila no saon Priskila,g ma basa hataholi fe'ek fo lateme lakabubua lai sila uman boe oo, haitua soda-molek, huu sila nana mba'ak lakandoo lo ita Lamatuan boe.h 20 Basa hataholi kamahelek malai ia boe oo, haitua soda-molek.
Mete ma ei makabubua, na, soluk esa no esa minik i'iduk fo nandaa neu hataholi kamahelek kala.
21 Mete sudik dei! Huu au, Paulus ia, pake au lima heheling fo sulak dede'ak leo iak: Soda-molek!
22 See fo ta naena susuek neu ita Lamatuan, na dei fo Manetualain hukun.
Au ateme me'usee hataholi, pake ai hataholi Yahudi dede'a Aram nae, “Marana ta!” Ndia ndandaan nae, “Lamatuak! Mai leo!”
23 Au oke fo Yesus, ita Lamatuan, natudu Ndia dale malolen neu ei.
24 Au sue ei basa nggei, huu ita sama-sama nana mba'ak to Karistus, fo Manetualain nadenun mai so.
Losa ia leo. Soda-molek!
Neme au mai,
Paulus