5 Au hihiing fo ei basa nggei bisa kokolak minik dede'a fe'ek. Tehuu au ahiik lena, fo ei bisa kokolak mafada Manetualain hehelun. Huu hataholi mana kokolak nafada Manetualain hehelun, sosoan lena neme hataholi fo kada kokolak nenik dede'a fe'ek. Mete ma kokolak nenik dede'a fe'ek, na, ndia malole boe, sadi hambu hataholi bisa nafada dede'ak ndia ndandaan. No leo ndiak, na heheluk ndia bisa boe tao natea basa hataholi salanik, fo ala bisa lalelak.

6 Tolanoo susue nggala ei! Dudu'a sudik dede'ak ia. Leo au mai nai ei, boe ma au kokolak pake dede'ak fo ei ta malelak, na, ei hambu nanalan hata? Ta hambu, hetu? Tehuu mete ma au kokolak ua ei, na, malolenak au afada Manetualain hihiin. Malolenak au buka dede'ak fo makahulun ta manggaledok. Malolenak au tulun ei, fo malelak dede'ak no malolen lena bali. Malolenak au fee nasanenedak la'e-neu Manetualain Dede'a-kokolan. Malolenak au anoli ei. Ndia, bei fo kasosoak neu ei, hetu?

7 Leo ndiak boe, no bua musiik kala. Mae sila ta kasodak, tehuu ala tao liik mata-matak. Pake kinuk do, sasanu do, gitar, mete ma ndia not sama, na, neu ko hataholi ta bisa lalelak sosodak bee ndia ana taon, hetu? 8 Ma mete ma to'ik liin ta manggaledok, na, talo bee fo soldadu la bisa bubuluk liik ndia fee tanda fo ala lahehele latati? Ta bisa, hetu? 9 Leo ndiak boe neu ei. Mete ma ei kokolak minik dede'a fe'ek, do minik dede'ak fo hataholi ta bisa lalelak no manggaledok, na ndia sama leo kada ei kokolak mia ani. Kada sosoa taak, huu hataholi ta bisa lalelak o maksut! 10 Hambu dede'ak mata-matak nai dae-bafok ia. Dede'ak esa-esak no ndia ndandaa hehelin. 11 Tehuu mete ma au ta bubuluk hataholi fe'ek dede'an, na, ndia sosoan ta faa boe neu au. Au ta alelak sila, ma sila boe oo ta lalelak au. Ai esa-esak dadik hataholi nusa dea.

12 Leo ndiak boe no ei. Ei nau hambu koasa ma baba'e-babatik neme Manetualain mai. Ndia malole. Tehuu malolenak ei masusua fo hambu koasa ma baba'e-babatik fo ei bisa paken miu tulun tao matea hataholi kamahelek no'uk kala!

13 De hataholi fo mana kokolak pake dede'a fe'ek, malolenak ana hule-haladoi noke fo Manetualain boe oo, fee ndia baba'e-babatik, fo bisa nafada dede'a fe'ek ndia ndandaan. 14 Mete ma au hule-haladoi pake dede'a fe'ek, na au hule-haladoi pake au daleng, tehuu au ta bubuluk au kokolak hata. 15 De ndia malolen, au tao leo beek? Au pake dua sala, tehuu esa-esak no ledo-ein. Au nau hule-haladoi pake au daleng. Ma au boe oo, nau hule-haladoi pake dede'a de'ek fo au alelak. Au nau soda koa-kiok neu Manetualain pake au daleng. Ma au boe oo, bisa soda pake dede'a de'ek fo au alelak. 16 Mete ma o pake dede'a fe'ek, fo so'uk koa-kiok neu Manetualain neme o dalem mai, boe ma hambu hataholi nai ndia fo ta nalelak dede'ak kala sila, na talo bee fo ana bisa dalek esa no o? Ledo-eik o moke makasi neu Manetualain pake dede'a fe'ek, na talo bee fo ana bisa nakaheik no o nae, “Tetebes ndia!” Ta bisa, hetu? Huu ana ta nalelak o dede'am ndia. 17 Bisa boe, o moke makasi leo ndiak neu Lamatuak. Tehuu ndia ta tao natea hataholi fe'ek dalen.

18 Fama ei ta bubuluk, tehuu au kokolak pake dede'a fe'ek lena heni ei basa nggei. Ma au oke makasi neu Manetualain, huu Ana tao au bisa kokolak leo ndiak. 19 Tehuu mete ma hataholi kamahelek lakabubua, na, malolenak au kokolak pake kada dede'a de'ek keke'uk lima, fo ala bisa lalelak, suek au anoli sala neme kada au kokola naluk pake dede'a de'ek lifu-lifuk fo ala ta lalelak.

20 Tolanoo susue nggala ei! Mete ma ei nau malelak sudik dede'ak, na, ei musi dudu'a sama leo hataholi lasik. Boso dudu'a sama leo kakana anak kala! Tehuu no dede'a manggalauk, ei musi leo kakana anak, fo ta tao nalelak dede'a manggalauk kala, huu dalen nala malalaok. 21 Nai Manetualain Susula Malalaon, nana sulak nae:

22 Huu ndia de ei bisa mita, mete ma hataholi kokolak pake dede'a fe'ek, na, ndia dadik tanda fee hataholi fo bei ta namahele neu Manetualain, fo ala lita Ndia koasan. Ndia ta tulun hataholi la fo mana lamahele neu Manetualain so. Tehuu mete ma hataholi kokolak nafada Manetualain hehelun, na, ndia tulun hataholi fo mana namahele neu Ndia so. Ndia ta tulun hataholi fo bei ta namahele neu Ndia. 23 Leo ei basa nggei makabubua, boe ma ei basa nggei kokolak pake dede'a fe'ek kala, basa de hambu hataholi ta namahele, do hataholi ta nalelak dede'ak kala sila, maso nai ei laladam mala, na dei fo ala dudu'a leo beek? Neu ko ala lae, “Hataholi manai ia la lamulu so bae maa!”

24 Ma leo ei basa nggei kokolak mafada Manetualain hehelun, boe ma hambu hataholi ta kamahelek, do hataholi ta nalelak dede'ak kala sila, maso nai ei laladam mala. Neu ko hataholi ndia nau namanene hata fo ei kokolak. De hata fo ei kokolak ndia, natudu ndia salan nala, losa ana nau palisak no lutu-lutuk ndia soda hehelin. 25 Boe ma dede'a manggalauk fo nana nafunik nai dalen, dei fo nana bukak fo basa hataholi bubuluk. Basa boe ma hataholi ndia dei fo sendek fo nakaluku-nakatele neu Manetualain nae, “Wei! Manggaledok so, Manetualain nai ei laladam mala!”

26 De tolanoo susue nggala ei! Mete ma ei makabubua, na, hataholi esa-esak no ndia baba'e-babatin. Hambu mana soda fo koa-kiok neu Manetualain. Hambu mana manoli hataholi la'e-neu Manetualain. Hambu mana buka nafada dede'ak neme Manetualain mai, fo makahulun nana nafunik. Hambu mana kokolak pake dede'a fe'ek. Ma hambu mana bisa nafada dede'ak ndia ndandaan. Basa dede'ak sila, musi tao latetea hataholi fe'ek kala namahehelen.

27 Mete ma hambu mana nahiik kokolak pake dede'a fe'ek, na, ndia malole. Tehuu mae kada hataholi dua do telu, dai so. Ta paluu no'uk. Esa kokolak basa dei, bei fo esa kokolak bali. Ma musi hambu hataholi fo bisa nafada sila dede'an ndandaan. 28 Leo mete ma ta hambu hataholi bisa nafada dede'ak ndia ndandaan, na, ta paluu kokolak pake dede'a fe'ek, nai hataholi no'uk kala matan. Ela fo ala kokolak leo ndiak nai kada sila dale hehelin. Sila boe oo, bisa kokolak lo Manetualain leo ndiak.

29 Mete ma ei makabubua, mae kada hataholi dua do telu, fo kokolak lafada Manetualain hehelun. Fe'ek kala musi timba-tai neulalau sila kokolan ndia. 30 Tehuu leo Manetualain nafada dede'ak esa fo makahulun ta manggaledok, neu hataholi esa fo nanggatuuk nenene nai ndia, na, hataholi ndia musi nafada heheluk ndia neu basa malai ndia. Ma hataholi fo mana kokolak manai mata musi hahae, fo fee lelak neu hataholi fo bei fo namanene neme Manetualain ndia mai, fo ana kokolak. 31 Teteben, na ei basa nggei bisa mafada Manetualain hehelun. Tehuu ela hataholi esa kokolak dei, bei fo ndia nonoon. No leo ndiak, na basa hataholi bisa lamanene, basan bisa lanoli ma basan bisa lameda sila dalen boe latea. 32 Masanenedak, hataholi mana kokolak nafada Manetualain hehelun boe oo, musi heti nalelak ndia aon. Boe ma esa bisa nahani esa, ma fe'ek bisa nakatataka nala aon. 33 Huu ta hambu naodek nai Manetualain. Basan nana hetik ma ndoo-ndoo.

Nai sudi bee, mete ma hataholi kamahelek kala lakabubua, na, ndia natetemen leo iak: 34 Inak kala musi langgatuuk ndoo-ndoo. Boso bafan nala beau. Ala musi lamanene malanggan nala. Huu Manetualain Heti-heun boe oo, nafada leo ndiak, hetu? 35 Mete ma hambu inak esa natane dede'ak esa, na, ela ana fali dei, bei fo natane ndia saon. Huu mete ma inak kala lahuu nai uma huhule-haladoik dale, na, ndia kada tao nakamamaek!

36 Ei dudu'a leo beek!? Huu Manetualain Dede'a-kokolan ta neme ei mai! Ma Ndia Dede'a-kokolan ta kada fee ei mesa nggei nai kota Korintus! Dudu'a neulalau dei! 37 Mete ma hambu hataholi taok aon bisa nafada Manetualain hehelun, do, dudu'a nae ndia simbo koasa neme Manetualain Dulan mai, na, ndia mesak kana bubuluk nae, dede'ak fo au sulak fee ei ndia, ta heti-heuk neme au mai, tehuu ndia palenda neme Yesus fo ita Lamatuan mai. 38 Mete ma hambu hataholi ta nau simbo dede'ak kala sila, na, ei boso simbok ndia.

39 Tolanoo susue nggala ei! Mbalak eik, fo ei hambu koasa fo bisa kokolak mafada Manetualain hehelun. Ma boso ka'i hataholi mae, ala ta bole kokolak pake dede'a fe'ek. 40 De mete ma ei makabubua, na, makalala'ok basan no tetebes, tungga mandaan. Dede'ak esa la'ok dei, bei fo fe'ek tungga. Makalala'ok basan no nana hetik. Boso babalik kasa!