Susue-lalaik tetebes
13
Leo au bisa kokolak unik dede'ak mata-matak, hataholi dede'an do, dede'ak neme Manetualain ata nusa sodan mai, tehuu au ta aena susuek faa boe, na ndia nanalan hata? Au kokolang ndia, kada louk, sama leo meko fo kada nalii-nalii, do darom fo kada nalii tong-tang, tong-tang. 2 Leo au aena baba'e-babatik fo afada Lamatuak hehelun neu Ndia hataholin, ma au bubuluk basa dede'ak nana nafunik, ma au alelak basa dede'ak fo hataholi malelak kala bubuluk, ma mete ma au namaheheleng neu Lamatuak matea losa au bisa lali heni letek kala, tehuu au ta aena susuek faa boe, na, ndia sosoan hata? Basa hata fo au taok, sosoan ta faa boe.a 3 Mete ma au se'o heni basa au hata-hetong, boe ma ba'e basa doin nala, fo fee hataholi to'a-taak kala la'a, do fee au ao-inang dadik tunu-hotuk,b tehuu au ta aena susuek faa boe, na, ndia sosoan hata? Au ta aena netes fo soso'uk aok boe. Huu ndia kada sosoa taak! Nanalan taa.4 Huu susuek ndia, malole.
Susuek ndia, nggale loak.
Susuek ndia ta holo.
Susuek ndia, ta soso'u aok.
Susuek ndia, ta koaok.
5 Susuek ndia, ta balakaik.
Susuek ndia, ta nau mesak kana senggi.
Susuek ndia, ta lofo anak luli.
Susuek ndia, ta nambeda dalek.
6 Susuek ndia, namahoko no hata fo tetebes,
ma ta nahiik dede'ak fo mana benu selik.
7 Susuek ndia, nakatataka babalak.
Susuek ndia, namahele nakandoo.
Susuek ndia, namahena nakandoo.
Susuek ndia, nakatataka nakandoo.
8 Ma susuek ta hahae nalelak.
Tehuu hata fo Manetualain mana kokolan nala lafadak ndia, doo-doo te ta paluu bali. Ma mete ma hataholi kokolak nenik dede'ak mata-matak, doo-doo boe ma, ta paluu bali. Ma mete ma hata fo hataholi malelak kala bubuluk, doo-doo boe ma, sosoan ta bali. 9 Hatematak ia, ita bubuluk kada faak. Mete ma ita dadik Manetualain mana kokolan, na, kada ita tafada dede'ak fo bei ta mana daik. 10 Tehuu losa ndia fain, dei fo basan dadik mana daik. Faik ndia, dede'ak kala fo bei ta mana daik boe oo, sosoan ta bali.
11 Conto leo iak: neu faik fo au bei kadi'i anak, au kokolak sama leo kakana anak kala lateme kokolak. Au boe oo, dudu'a sama leo kakana anak nateme dudu'a. Tehuu hatematak ia, au dadik ina-huuk so. Huu ndia de au ta heo-hilu sama leo kakana anak bali.
12 Conto fe'ek bali: hatematak ia, ita bisa tita faak, tehuu bei ta manggaledok, sama leo mete pake titilo ba'ek. Tehuu doo-doo dei fo basan dadik manggaledok. Ita bisa tita sama leo nai ita matan. Hatematak ia au bubuluk kada faak. Tehuu doo-doo, dei fo au bisa bubuluk basa-basan, sama leo Manetualain bubuluk basa-basan la'e-neu au aong.
13 De hatematak ia, hambu dede'ak telu fo ita musi taon, fo nahele nakandoo. Na ndia:
ita musi tamahele takandoo neu Lamatuak;
ita musi tamahena takandoo tae, dei fo Ana heti basan dadik malole;
ma ita musi tasue ao takandoo.
Neme dede'a kateluk kala ia mai, na kasosoak nalan seli, ndia, susuek. Huu susuek malolen lena heni basan.