Neu faik fo Lamatuak nadenu Ndia hataholin nala, Ndia boe oo fee sala haak ma koasa
9
Boso dudu'a mae, au ta aena haak fo sulak leo iak fee ei. Huu Manetualain nadenu au uu afada hataholi la'e-neu Ndia. Au boe oo, ita itak Yesus, ita Lamatuan. Au nana mba'ak akandoo ua Ndia, boe ma ei basa nggei boe oo, mamahele neu Ndia, huu au ueng. 2 Mae hataholi fe'ek kala ta simbok au dadik Lamatuak nadedenun, tehuu neu ko ei bubuluk so mae, Lamatuak nadenu au, fo afada Ndia hehelun neu ei. Mete ma ei nau sangga ndia butin bali, na, kada mete ei nanggatutuu-nambadedeim. Huu ei nana mba'ak mia ita Lamatuan!3 Au sangga ataa asafali neu hataholi fo nahiik soli salak neu au, leo iak: 4 Ei dudu'a mae, au ua Barnabas ta maena haak fo simbok nana'a-nininuk neme hataholi fo ai fee nanonolik neu sala, do? 5 Ei dudu'a mae, ai ta maena haak sao ina salanik, fo bisa tungga no'u, suek ono-lau nai mamana fe'ek, do? Naa te Lamatuak nadedenu fe'en nala loo sao inan nala. Lamatuak fadin nala leo ndiak boe. Petrus mesak kana tao leo ndiak boe!a 6 Do, ei dudu'a kada au ua Barnabas mesa nggai musi tao ues sangga doik, fo suek ai bisa masoda fo manoli hataholi? 7 Ei dudu'am ndia, huun hata? Mete kada soldadu la. Ala ta paluu hasa sila nana'an ma balo'an nala. Mete kada hataholi mana tao ues nai osi anggol. Ta hambu esa ka'in nae, “O ta bole mu'a anggol boak kala sila!” Mete kada mana hoo la. Ana naena haak fo hee susu oe neme bi'i-lombo fo ana hook mai.
8 Au kokolak leo ndiak ta tungga au, fo hataholi basa faik dudu'a hehelin. Huu Manetualain Heti-heun nala lafada dede'ak sama boe. 9 Nai ba'i Musa Heti-heun nana sulak nae, “Ledo-eik sapi heheta hade, fo tao fe'e hade de'en neme mbulen mai, na boso lapa misa bafan, fo suek bisa na'a.” Ei dudu'a mae Lamatuak nau ela kada sapi mesak kana bisa na'a, do?b 10-11 Taa! Ndia boe oo, kokolak suek tao matak neu ita! Huu nana sulak boe nae, “Hataholi mana foi dae, ma hataholi mana tao fe'e hade de'ek neme mbulen mai, neu faik fo ala tao ues, na sila boe oo bubuluk lae, dei fo ala hambu sila baba'en.” Leo ndiak boe malole, mete ma hataholi Salanik kala bisa simbo sila baba'en neme sila uen buna-boan mai. Huu ledo-eik ai manoli ei dede'ak kala leme Manetualain Dulan mai, ndia sama leo hataholi mana tao ue daek esa sele-nggali. De ledo-eik ai fee basa nanonolik, na ndia ta hata-hata, mete ma ai simbo nana'a-nininuk do sudi hata neme ei mai boe. Huu memak ndia nandaa!c 12 Hataholi fe'ek mana manoli ei, naena haak fo simbo nana'ak ma bua fe'ek neme ei mai, hetu? De mete ma ai, na, leo bee? Ai maena haak lena heni sila!
Tehuu ei bubuluk so. Ai ta pake mitak ai haak fo moke no nakasetik leo ndiak. Ai mahele nai dede'ak mata-matak, fo boso tao nakaleleek fee ei. Huu no leo ndiak, na ei mahiik mamanene Karistus Hala Malolen fo ai tuin neu ei. 13 Dudu'a sudik kana dei! Malangga anggama la fo mana ono-lau lai hataholi Yahudi Uma Ina Huhule-haladoin, ala lasoda leme fefeek fo hataholi lenik. Ma hataholi fo mana ono-lau lai mei tunu-hotuk, ala bisa la'a mbaa, neme banda fo hataholi lenik.d 14 Leo ndiak boe, Lamatuak helu nae, hataholi fo uen tui-bengga Karistus Hala Malolen, ala bisa lasoda leme sila uen buna-boan mai. Ndia ndia, tetebes.e
15 Mae au aena haak fo asoda leo ndiak, tehuu au ta ahiik tao leo ndiak. Au ta sulak susulak ia no maksut fo ei mulai fee au buas. Au ono-lau ei dook so, ma au ta oke hata-hata neme ei mai. De malolenak au mate, fo suek hataholi boso dudu'a lae, au mulai oke sudi hata. 16 Mae au afada akandoo neu hataholi, la'e-neu Lamatuak Hala Malolen, tehuu ndia ta dadik netes fo au bisa kokolak koaok. Au musi afada hataholi la'e-neu Lamatuak, huu Lamatuak ndia nadenu au leo ndiak. Mete ma au ta tao tungga au ueng leo ndiak, na, au soe ndia! Huu neu ko huhukuk tuda la'e au. 17 Mete ma au tao ues ia huu au hihii heheling, na, buas fo au hambuk ndia, sama leo kada nggadi fo hataholi mana tao ues sala simbon. Tehuu mete ma au tao ues ia, huu Lamatuak nadenu au, na, ndia fe'e. Ana namahele au, fo au anea Ndia bua mabelin nala. 18 De mete ma leo ndiak, na, au nggading hata? Au ta paluu simbo nggadi! Au tui-bengga Lamatuak Hala Malolen, ma au ta oke hata-hata. Ndia ndia tao nala au ameda dai. Ma namemeda mana daik ndia, sama leo au nggading. De mae au aena haak mata-matak leo hataholi naena ues tui-bengga Hala Malole ndia, tehuu au mesa nggau ta nau pake basa au haak.
19 Au ia, hataholi kalambo'is fo tao ues tungga au hihiing. Hataholi ta naena haak, fo nadenu au tao ues ia, do, tao ues ndia. Mae leo ndiak, tehuu au tao aok sama leo ata, fo basa hataholi laena haak ladenu au. No leo ndiak, na au bisa tulun hataholi no'uk lena, fo ala lahele tungga Manetualain. 20 De mete ma au akabubua ua hataholi Yahudi, na, au tao aok leo hataholi Yahudi, fo tulun hataholi Yahudi mana malelak Lamatuak. Mete ma au akabubua ua hataholi mana to'u tingga-tingga Manetualain Heti-heun, na, au tao tungga Manetualain Heti-heun, suek au boe bisa tulu-fali sala, fo lalelak Lamatuak, (mae au bubuluk so ae, tao tungga Heti-heuk ndia, ta bisa tao nala au malole ua Lamatuak). 21 Mete ma au akabubua ua hataholi fo ta mana bubuluk Manetualain Heti-heun, na, au sama leo sila, fo ua sala leni Lamatuak leu. (Au ta mbo'i heni Manetualain Heti-heun fo Ana nakondan nesik ba'i Musa, tehuu hatematak ia au asoda unik Karistus Heti-heun.)f 22 Soa-neu hataholi fo dalen ta matea, na au tao aok sama leo au daleng ta matea boe, fo au bisa kokoe sala, suek leni Manetualain leu. Soa-neu basa hataholi, na au tao aok sama leo sila, fo mae leo beek boe oo, au bisa tulun asala'e ala hataholi luma. 23 Au tao basa dede'ak kala ia, fo suek basa hataholi bisa lamahele neu Lamatuak Hala Malolen. No leo ndiak, ai bisa hambu baba'ek nai basa dede'a malole, fo Lamatuak nahiik fee ai.
24 Au fee nakandandaak neme nakasusudi nalaik mai. Hataholi no'uk tungga lalaik, tehuu mana hambu juara kada hataholi esak. De ei hataholi esa-esak musi malaik tingga-tingga, fo suek dadik juara neu Lamatuak. 25 Basa hataholi mana tungga nakasusudik, musi tungga tebe-tebe hata fo ndia mesen nafadan, hetu? Ala tao ues mbilu-mbuse leo ndiak, fo kada hambu solangga juara fo dei fo ana male. Tehuu mete ma ita, na, ita tao ues fo hambu nggadi mana mahelek losa dodoon neu. 26 De au ta alaik adabak. Tehuu au asusua tingga-tingga fo alaik akandoo losa too-lane. Mete ma nakasasama au ua mana matutuk, na, au ta tutu salan, tehuu au tutu pesin. 27 Au tao tungga tebe-tebe, ma anoli tingga-tingga, fo suek au bisa ahele akandoo. Huu ta malole, mete ma au afada hataholi fe'ek la'e-neu Manetualain, naa te au mesa nggau la'o lena heti-heuk, boe ma Lamatuak fee au uni nakasusudik deak uu.