La'e-neu nana'ak fo hataholi paken soa-neu sosonggok so
(Tui Seluk la'e-neu Dala Sodak 4:35,39; 6:4)
8
Hatematak ia, au sangga kokolak la'e-neu mbaa fo hataholi paken soa-neu sosonggok. Ita basa nggata bubuluk no'uk, la'e-neu dede'ak kala ia so. Ndia dede'an, mete ma hataholi nalelak no'uk, na, ana bisa koao, huu ana dudu'a nae, ndia malelan lena heni hataholi fe'ek kala. Malolenak kada ita tasue ao to hataholi fe'ek. Huu ndia ndia tao nala basa hataholi latea, fo bisa lakatataka lala dook.2 Mete ma hambu hataholi tao aok mana bubuluk so, na, ndia natudu nae, ndia malelan bei ta matetuk. 3 Tehuu mete ma hataholi sue Manetualain, na, Manetualain nalelak ndia so. Ndia ndia penting.
4 De mete ma hataholi na'a mbaa fo pake nitak soa-neu sosonggok, na, ita basa nggata bubuluk tae, bua sosonggok nai dae-bafok ia, Manetualain tetebes ta ndia. Huu ita bubuluk tae, “Manetualain tetebes kada esak.” ma, “basa bua sosonggok fo hataholi nakaluku-nakatele neun, sosoan ta faa boe.” 5 Hambu buas no'uk lai lalai ma lai dae-bafok fo hataholi seseik lae, ‘lamatuak’ do ‘malanggan’.
6 Tehuu soa-neu ita, na Manetualain kada esak.
Ndia ndia, ita Aman.
Basa-basan naoka nai Ndia.
Ita tao basan soa-neu Ndia.
Ma ita Lamatuan naena haak fo palenda ita, kada esak.
Fo ndia, Yesus Karistus.
Manetualain pake Yesus,
neu faik fo Ana tao basa-basan.
Ma ita tasoda,
huu Yesus fee ita sodak.
7 Tehuu hambu hataholi ta bubuluk dede'ak kala sila. Ala bei dudu'a lakandoo, la'e-neu bua sosonggok kala, sama leo ala dudu'a litak nai makahulun. Huu ndia de la'i-la'i esa, la'a mbaa fo hataholi pake nitak neu sosonggok, ala dudu'a lae, “Nana'ak ia dadik tunu-hotuk fo paken neu sosonggok so! Mete ma au u'a nana'ak ia, na, au bei nana mba'ak ua dede'a manggalauk kala!” De ndia tao nakalulutu sila dudu'an, losa ala ta bisa dudu'a ndoos bali, huu dalen nala ta matea. 8 Ndia dede'an hata? Nana'ak ta bisa noo ita teu tasale Manetualain, hetu? Mete ma ta ta'a, na, ita ta tamba manggalauk. Ma mete ma ta'a, na, ta tao ita dadik hataholi malole, hetu?
9 Tehuu mata neuk bou! Mae o maena haak fo tao dede'ak esa, bei ta bubuluk dede'ak ndia dadik malole soa-neu o. Leo hambu tolanook esa hataholi kamahelek fo dalen ta matea, mete ma ana nita o tao dede'ak ndia, boe ma nakatunu, na, ndia ta malole. 10 O mesa nggo bubuluk dede'ak ndia ta dadik hata-hata so. Tehuu mete ma tolanoo hataholi kamahelek fo dalen ta matea, nita o manggatuuk mu'a nai uma sosonggok, na, dei fo ana dudu'a hata? Neu ko ana dudu'a na'a nana'a sosonggok boe oo, ta dadi dede'ak neu ndia bali, mae ala paken neu sosonggok. 11 O bubuluk dede'ak no'uk so. Tehuu mete ma o tao leo ndiak, na, o tao makalulutu hataholi dalen fo ta matea. Ma hataholi ndia, o tolanoo kamahelem. Karistus mate soa-neu ndia boe! 12 Malolenak dudu'a leo iak: mete ma o tao o tolanoom fo dalen ta matea, ala tao dede'ak esa fo ala tao salak, na, o tao salak neu sala so. Ma o boe oo, tao salak neu Karistus. 13 De mete ma au u'a nana'ak fo tao au tolanoo hataholi kamaheleng tuda neni salak dale neu, na, malolenak au ta paluu u'a mbaa mata leo ndiak. Mae losa dodoon neu boe oo, ta paluu. Huu au ta nau, fo ala tuda leni salak dale leu.