2 Leo iak: huu hambu lelak no'uk fo hataholi bisa tuda neni hohonggek neu, de malolenak touk esa no sao hehelin. Leo ndiak boe, inak esa no sao hehelin.

3 Sao touk kala ei! Boso timba heni o saom haak fo sunggu makabubua muan. Ma sao inak kala ei! Boso timba heni o saom haak fo sunggu makabubua muan. 4 Huu sao inak fee ndia ao-inan so, fo dadik saon enan. Ma sao touk fee ndia ao-inan so, fo dadik saon enan. 5 De ei boso matola-mahelak, huu ei dua nggei maena haak! Tehuu mete ma ei sangga hule-haladoi, ma ta nau dudu'a dede'a fe'ek kala, na, bisa makatataka faa, fo boso sunggu makabubua nai ledo-eik keke'u anak. Sadi sao touk ma sao inak lakokola neulalau dei, ma lala halak leo ndiak. Ma mete ma ledo-eik hule-haladoi basa so, na, malolenak dua sala lakabubua lai-lai seluk. Mete ma ta leo ndiak, na, mamates! Huu, lofo anak nitu la malanggan mai fufudi hataholi ta mana nakatataka nala aon. 6 Dede'ak ia kada au dudu'ang, ta Lamatuak heti-heun. 7 Tungga au dudu'ang, na malolenak hataholi ta sao, leo au. Tehuu Manetualain fee baba'e-babatik neu tungga-tungga hataholi fo nandaa no ndia. Boe ma hambu hataholi fo Ana fee sala sao. Ma hambu hataholi fe'ek fo Ana ta fee sala sao.

8 Au sangga afada touk do inak fo bei ta mana saok, ma ina falu la ae, malolenak ei ta sao, leo au. 9 Tehuu mete ma ta bisa makatataka mala aom, na, malolenak sao leo. Malolenak hataholi sao, te mete ma taa, na, ndia ao-mbaa kasuu hehelin tao nakalulutu ndia.

10 Ia ta neme au mesa nggau mai. Huu au sangga afada hata fo ita Lamatuan palenda hataholi mana saok kala so nae, sao inak ta bole namaketu no saon. 11 Tehuu mete ma ana la'o ela ndia saon, na, boso sao seluk bali. Malolenak, ana mole fali no saon. Leo ndiak boe, sao touk ta bole namaketu no saon.^a

12 Ia neme au mesa nggau mai, ta neme ita Lamatuan mai. Au sangga kokolak neu hataholi fe'ek kala, leo iak: mete ma hambu hataholi salanik sao inan, ta namahele Karistus, na, ana boso namaketu no saon, mete ma saon sadia nasoda nakandoo no ndia. 13 Leo ndiak boe, mete ma hambu sao inak fo saon ta namahele Karistus, na, ana boso namaketu no saon, mete ma saon nahiik fo lasoda sama-sama lakandoo. 14 Sao touk fo ta mana namahele neu Lamatuak boe oo, dadik malalaok, huu ndia nana mba'ak no saon. Ma sao inak fo ta mana namahele neu Lamatuak boe oo, dadik malalaok, huu ndia nana mbaak no saon. Mete ma taa, na, sila anan nala ta malalaok. Tehuu no dalak ia, ala hambu kee-dede malalaok nai Lamatuak matan so. 15 Tehuu mete ma hambu sao touk do sao inak fo ta namahele neu Lamatuak, fo ana la'o ela ndia sao toun do sao inan kamahelen, na, elan neme naa. De sao touk do sao inak fo kamahelek kala, ta nana mba'ak leo ndiak bali. Huu Lamatuak noke nala ei fo dadik neu Ndia hataholin, suek ei bisa masoda ndoo-ndoo ma mole. 16 Sao inak kamahelek kala! Fama ei bisa masala'e mala ei saom. Fama ta bisa. Ma sao touk kamahelek kala! Fama ei bisa masala'e mala ei saom. Fama ta bisa boe. Ei ta bubuluk no teteben.

17 Mae leo ndiak, tehuu hataholi esa-esak nanggatutu-nambadedein leo beek, neu faik fo Manetualain noke nala ei dadik Ndia hataholin, na, masoda makandoo leo ndiak leo. Boso masafalin bali, huu Lamatuak hetin leo ndiak so. Au anoli heti-heuk ia, neu basa salanik.

18 Conto leo, mete ma ei sunat mitak fo matudu mae, ei hataholi Yahudi, bei fo nai fai makabuin ei mamanene Manetualain noke ei, na, ta paluu malelesi sunat ndia. Ma hataholi fo ta mana sunat, ledo-eik namanene Manetualain noke sala dadik Ndia enan, na, ta paluu sunat fo dadik tanda nae, ala dadik Manetualain hataholin so. 19 Mete ma sunat mitak, na, ndandaan ta hata-hata. Ma mete ma ta sunat, na, ndia boe oo, ndandaan ta hata-hata. Kandandaak ndia: ita tao tungga Manetualain palendan nala. 20 Ledo-eik Manetualain hele nala ei fo dadik Ndia hataholin, Ana ta nadenu ei sunat do ta sunat. De kada ela ei leo ndiak leo. Ta paluu masafalin.

21 Au fee nakandandaak esa bali. Mete ma o dadik hataholi atan, neu faik fo Manetualain noke nala o, na, ela o dadik leo ndiak leo, ta hata-hata. Tehuu mete ma o bisa dadik hataholi kalambo'is, na, dadik leo ndiak leo! Mete ma ta bisa dadik hataholi kalambo'is boe oo, ta hata-hata. 22 Ledo-eik Lamatuak noke ata esa dadik Ndia hataholin, na ata ndia dadik leo hataholi kalambo'is so, fo tao ues fee ndia Lamatuan nai lain. Ma ledo-eik Lamatuak noke hataholi kalambo'is esa dadik Ndia hataholin, na hatematak ia hataholi ndia dadik Karistus atan. 23 Karistus bae ketu ei nenik beli mabeli nalan seli so! De ei boso dadik ata neu hataholi fe'ek.

24 Tolanoo susue nggala ei! Ledo-eik Manetualain noke nala ei dadik Ndia hataholin, ei nanggatutuu-nambadedeim leo beek, na, elan leo ndiak leo. Ta paluu masafalin bali. Elan leo ndiak leo, neu Manetualain.

25 Ei matane au la'e-neu anafe'o-ta'eanak fo bei ta sunggu lakabua litak. Lamatuak ta nafada au la'e-neu dede'ak ndia. Tehuu ei bisa mamahele hata fo au kokolak, huu Lamatuak natudu Ndia susuen neu au. Au dudu'ang leo iak: 26 Hatematak ia ita hambu doidosok mata-matak. De mete ma hataholi leo beek, na elan leo ndiak leo. Au maksut leo iak: 27 Mete ma o nana mba'ak mua o sao inam, na, boso mbo'i henin. Mete ma o ta nana mba'ak mua o sao inam bali, na, ta paluu masanggak fo sao ina beuk. 28 Tehuu mete ma o dadi sao, na, o ta tao salak hata-hata. Ma mete ma hambu inak ta sunggu nakabubua nitak no touk dadi sao, ndia ta tao salak hata-hata boe. Tehuu masaneda, te hataholi mana saok dei fo hambu toto'ak mata-matak nai dae-bafok ia. Au maksut, fo ei boso hambu toto'ak leo ndiak.

29 Tolanoo susue nggala ei! Tungga au dudu'ang, leo iak: fai boe keke'u so, ma dae-bafok fai babasan deka-deka so. De hataholi kasao inak, boso kada tao matak neu saon, tehuu ndia boe oo, musi tao matak neu Lamatuak. 30 Leo ndiak boe, mete ma hambu kamatanik, na, malolenak ana natetea fo boso namatani, fo suek ana bisa tao matak neu Lamatuak. Mete ma hambu kamahokok, na, malolenak ana tao aon ta leo ndiak, fo suek ana bisa tao matak neu Lamatuak. Mete ma hambu hataholi fo nabe'i hahasa, na, malolenak ana nasoda sama leo hataholi fo ta naena hata-hata, suek ana bisa tao matak neu Lamatuak. 31 Mete ma hambu hataholi pake buas neme dae-bafok ia mai, na, malolenak ana tao aon leo hataholi fo ta tia-dea neu dae-bafok buan, fo suek ana bisa tao matak neu Lamatuak. Huu dae-bafok ia dala sodan dei fo mopo henin.

32 Au nau fo ei boso dudu'a. Huu hataholi ta mana saok, fain no'uk fo ana tao matak la'e-neu Lamatuak hihiin. Huu ndia de, ana bisa sangga dalak fo tao ues tao namahoko Lamatuak dalen. 33-34 Tehuu hataholi mana saok so boe oo, musi tao matak neu dae-bafok ia hihiin. Ana nau tao matak la'e-neu Lamatuak hihiin, tehuu ana musi sangga dalak boe, fo tao namahoko sao inan. Ndia tao nala ndia dudu'an naba'e kii-konak.

Leo ndiak boe oo, inak fo ta kasaok bali, ma inak fo bei ta sao nitak. Ala tao matak la'e-neu Lamatuak hihiin, fo dalen ma ao-inan nala bisa malalaok. Tehuu inak kasaok, dalen naba'e kii-konak. Huu ana nau tao matak la'e-neu Lamatuak hihiin, tehuu ana musi sangga dalak boe, fo tao namahoko saon. 35 Au afada ei dede'ak kala ia, fo ei hambu malolen. Au ta nau ei nana te'e nalak. Au hihiing, na ei tao ndoos, ma tao matak neu Lamatuak hihiin, fo ei dudu'am ta lababa'ek.

36 Mete ma touk naena inak sangga dadik neu saon, teun dai fo sao so, na, ela ala sao leo. Nakalenak bali, mete ma touk ndia ta bisa nakatataka nala aon. No leo ndiak, ala ta tao salak hata-hata. Boso losak ala lakae'esok lakandoo, boe ma babasan, touk ndia tao dede'a ta malole. 37 Tehuu mete ma ana nabe'i nakatataka nala aon, na, boso nakaseti sao lai-lai. Huu, ana bubuluk sangga tao hata. Mae ana nakatataka nala dook boe oo, malole. 38 De touk fo sao nala inak fo sangga dadik saon, ndia malole. Ma ta mana saok ndia, malolen lena bali.

39 Sao inak nana mba'ak no saon losa mate. Tehuu mete ma saon maten so, na, ana bole sao seluk, sadi sao beun ndia, hataholi fo namahele neu Karistus boe. 40 Tungga au dudu'ang, na ina falu ndia maua-manalek mete ma ana ta sao seluk. Au dudu'a ae, nanoli-nafadak ia neme Manetualain Dulan fo manai au.