Hataholi kamahelek boso nadede'a no tolanoo kamahele fe'ek nai mamana naketu dede'ak
6
Mete ma hataholi salanik esa nadede'a no hataholi salani fe'ek, na, hatina de ei nau mini mamana naketu dede'ak nai mana maketu dede'ak matan, fo ta nalelak Manetualain? Talo bee de, bisa leo ndiak? Malolenak mambadeik miu hataholi kamahelek kala matan, fo ala lakaneni ei dede'am! 2 Nonook leo ei ta bubuluk mae, hataholi kamahelek kala dei fo laketu basa hataholi manai dae-bafok ia dede'an. Talo bee de losa ei ta mabe'i makaneni aon dede'a kadi'i anak kala? 3 Teteben, na ita ndia dei fo taketu Manetualain ata nusa sodan nala dede'an. De neu ko ei ndia musi makaneni dede'a basa faik kala. 4 Nakalenak bali, mete ma ei hataholi kamahelek madede'a la'e-neu dede'a kadi'i anak kala, na, hatina de ei musi pake mana maketu dede'ak fo hataholi salanik ta fee hadak neu sala?5 Au sangga kokolak dede'ak esa, fo musi tao nakamamaek ei. Leo bee? Sama leo nai ei laladam mala, ta hambu hataholi esa boe fo malelan mana daik, suek nakaneni dede'a kadi'i anak kala, matak leo dede'ak mana sadu nai ita tolanoon nala. 6 Tehuu hataholi kamahelek esa, hela noo ndia tolanoo kamahelen neni mamana naketu dede'ak neu! Naa te mana maketu dede'ak ndia ta namahele Lamatuak.
7 Ta tetebes, hetu? Ei nana senggik so, mete ma ei esa nadede'a no esa nai mamana naketu dede'ak. Malolenak mbo'i o tolanoom, mete ma ana tao nasala o. Ma mete ma o tolanoo kamahelem namana'o nala o buam, na, malolenak mbo'in fo ana ha'i nala buas ndia leo! 8 Tehuu ei hataholi kamahelem esa tao nasala tolanoon. Ma esa namana'o neme esa mai. Naa te ei sama-sama hataholi kamahelek!
9 Ei nonook leo ta bubuluk dede'ak kala ia! Naa te hataholi fo ta mana mahiik tao ndoos, ta bisa maso dadik Manetualain bobonggin nala. Boso mbo'i ei aom nana kedi nalak, fo tao salak! Hataholi mana tao eok no ta ndia saon, mana nambue songgo, mana hohonggek, touk mana sunggu no touk, 10 hataholi na'ok, mana balena'o, mana ninu mafuk, mana kokolak naboboo hataholi naden, mana masapepekok fo ha'i nala hataholi buan nala, huu basa hataholi matak leo sila, ta bisa maso dadik Manetualain hataholin!
11 Naa te makahulun ei luma memak leo ndiak boe! Tehuu Manetualain koka heni ei sala-singgom so, fo tao nalalao ei. Ma Ndia boe oo soi dalak so, fo ei bisa malole fali mia Ndia. Ana tao basa sila, huu ei nana mba'ak mia ita Lamatuan Yesus Karistus, ma huu ei boe oo, nana mba'ak mia Manetualain Dulan.
Mete ma o manea neulalau o aom, na, ndia natudu hada-holomata neu Lamatuak
12 Au aena haak fo tao basa-basan. Tehuu basa hata fo au sangga taok ndia, neu ko bei ta malole neu au. Boe ma ela au aena haak fo tao basa-basan, tehuu au ta nau dede'a ta malole koasa au.a 13 Conto leo, hambu hataholi nae, “Nana'ak paluu teik, ma teik paluu nana'ak.” Tehuu masaneda, te dei fo Manetualain tao nakalulutu dua sala. Conto fe'ek bali, ita boso pake ita ao-inan fo bisa tao eok to hataholi fo ta ita saon. Tehuu ita pake ita ao-inan fo bisa tao ues fee ita Lamatuan. Ma ita Lamatuan ndia nanea ita ao-inan boe. 14 Ledo-eik ita Lamatuan Yesus maten so, Manetualain tao nasoda falik Ndia. De mete ma ita mate so, na, dei fo Ndia koasan boe oo, tao nasoda falik ita.
15 Ei ao-inam dadik Karistus enan, sama leo ei dadik baba'ek neme Karistus ao-inan mai. Neu ko ei bubuluk dede'ak ndia so! De mete ma au pake baba'ek neme Karistus ao-inan mai, boe ma au seseok ua ina kalabik ao-inan, na, leo bee? Bosok! Huu ndia ta nandaa! 16 Neu ko ei bubuluk so, mete ma hataholi tao eok fo sunggu nakabubua no ina kalabik, na, dua sala nana mba'ak dadik esa so. Huu nana sulak nai Susula Malalaok nae, “Dua sala nana mba'ak dadik esa so.”b 17 Tehuu hataholi fo nasoda dalek esa no ita Lamatuan, dadik esa no Ndia so, sama leo dua sala nana mba'ak lo dulak esa.
18 Mete ma o hambu lelak fo tao eok mua hataholi fo ta o saom, na, malai dook muu! Hataholi tao salak mata-matak, fo tao nakalulutu sila mesak kasa, ma tao nakalulutu hataholi fe'ek boe. Tehuu hataholi fo mana nahiik hohongge, tao nakalulutu ndia ao-ina hehelin. 19 O ao-inam sama leo Manetualain Dula-dale Malalaon uma huhule-haladoin. Ndia Dulan fo mana nasoda nai ei dalem, huu Manetualain mesak kana fee Ndia Dulan neu ei. Huu ndia de ei ta maena haak hehelik bali, fo dadik malanggan neu ei esa-esak ao-ina hehelim. Tehuu hatina de ei masoda, nonook leo bali ta bubuluk dede'ak kala ia?c 20 Karistus soi nala ei so, nenik beli mabeli. De ei musi masoda no fee hada-holomata neu ei ao-ina hehelim, fo matudu mae, ei boe oo fee hada-holomata neu Manetualain.