Karistus nadenu nadedenun nala sudi leni bee leu
4
De ei musi taok ai leo iak: boso soso'uk ai, huu ai ia, kada Karistus atan. Ma Manetualain namahele ai fo manea neulalau Ndia dede'an nala, fo makahulun nana nafunik. 2 Hataholi mana manea ndia lamatuan buan, ana musi dadik hataholi fo mana tao tungga hata fo ndoos. 3 Leo bee no au? Au tao ues tungga hata fo ndoos, do taa? Au ta mbali ei timba-tai au leo beek. Ma au boe oo, ta mbali hataholi fe'ek kala timba-tai au leo beek. Au boe oo, ta mbali timba-tai au ao-inang. 4 Huu mae au daleng nae au malole so, bei ta bubuluk ndia ndandaan au malole. Penting ndia, Lamatuak timba-tai au leo beek. 5 Boe ma ei boso taok aom mana maketu dede'ak fo timba-tai hataholi fe'ek kala. Mahani Lamatuak fafali main. Huu Ndia ndia, dei fo buka basa dede'ak lala'en. Ndia ndia hela kalua dede'a manggalauk fo hataholi lafunin nai makiuk dale. Ana nau natudu dede'ak kala fo hataholi dudu'an lai sila dalen. Basa de Manetualain nau nafada dede'a malole fo hataholi la taon so.6 Tolanoo nggala ei! Au kokolak la'e-neu au ma ka'a Apolos, sama leo au fee conto, fo ei bisa manoli dede'ak esa neme ai mai, leo iak: Kada tao tungga dede'ak kala fo nana sulak nai Manetualain Susula Malalaon. Boso tao tungga fe'ek bali. Mete ma ei manoli dede'ak ndia, na, ei ta paluu miak esa boe, ma kokolak koaok huu ei tungga hataholi esa, ma makadadaek hataholi fe'ek. 7 De leo bee? Ei taok aok fe'e neme mana fe'ek mai, do? Bosok! Huu basa hata fo ei simbok, ei hambun neme Manetualain mai. De mete ma leo ndiak, na, hatina de ei koao, sama leo ei masusua aom? 8 Nonook leo basa ei paluuk, ei hambun so. Leo ei kamasu'ik so. Ei taok aok leo hataholi ina-huuk, kada sama leo manek, ma ai ta miu tamba hata-hata. Naa te, Manetualain fee basa hata fo ei paluuk. Tehuu mete ma ei dadik manek tetebes, na, fama ai bisa to'u palenda sama-sama mia ei, hetu?
9 Ai ia, fo Manetualain nadenu mini sudi bee miu nai dae-bafok ia, fo tui-bengga hataholi la'e-neu Karistus. Tehuu la'i-la'i esa, au dudu'a leo Manetualain nadenu ai mambadeik nai dea nalan seli, sama leo hataholi bui fo nahani sila huhuku maten. Boe ma Ana fee basa hataholi malai dae-bafok ia, no Ndia ata nusa sodan, fo ala lanilu ai. 10 Ei ana seli so maa! Hambu hataholi taok ei malelak, huu ei nana mba'ak mia Karistus. Tehuu ala taok ai ia, nggoan seli, huu ai dadik Karistus hataholin. Fama hataholi lae hetuk ei ndia, balakain seli so. Tehuu ai ia, kada noe-na'uk. Fama ala so'u dema-demak ei. Tehuu ala ta fee hadak faa boe neu ai. Ana seli tebe maa! 11 Losa hatematak ia boe, ai mameda ndoe ma maa mada. Ai balo'a papaken manggenggeok ndoos. Hataholi lambue mbomboko ai. Ai dadik hataholi mandolok fo uma taak. 12 Ai tao ues sota minik ai lima hehelin so. Mete ma hataholi kokolak mata-matak la'e-neu ai, na, ai bala mae, “Ai moke fo Manetualain tao dede'a malole neu ei.” Mete ma hataholi tao nakatoto'ak ai, na, ai hele fo kada makatataka.a 13 Mete ma hataholi kokolak naboboo ai nade malolen, na, kada ai hele fo bala minik kokola banggana'uk. Mae leo ndiak boe oo, tehuu hataholi bei tao ai leo seseek, do kadafu manggenggeok, fo nandaa kada nggali henin.b
14 Au sulak dede'ak kala sila, ta sangga tao ei dadik mae. Tehuu au sangga ka'i ei, huu au sue ei, sama leo ana heheling. Huu ndia de au afada ei, fo fali tungga dala ndoos. 15 Mae hambu hataholi lifu-lifuk fo bisa latudu ei dalak la'e-neu Karistus, tehuu kada au mesang dadik ei amam. Huu au ia, hataholi makasososak fo afada ei la'e-neu Yesus Karistus Tutui Malolen. Huu ndia de ei bisa mamahele neu Ndia. Au tao leo ndiak, huu au nana mba'ak neulalau ua Ndia. 16 De au oke fo ei tungga neulalau au contong.c
17 Huu ndia de au adenu Timotius neti, fo tulun ei. Au sue ndia sama leo au ana heheling. Au amahele ndia, huu ndia boe oo, nasoda nana mba'ak no ita Lamatuan. Dei fo ana tulun ei, fo tao nasanenedak au dala sodang. Au sodang leo ndiak, huu au nana mba'ak ua Yesus Karistus, fo Manetualain nadenun mai so. Ma ndia boe oo, sama leo au anoli hataholi salanik mana makabubuak sudi lai bee.
18 Hambu neme ei mai dudu'a nae, au ta dadi uni ndia uu. Huu ndia de ala koao so. 19 Tehuu mete ma ita Lamatuan nau, na, ta dook bali, te au uni kota Korintus uu so. Boe ma dei fo au bubuluk memak, mete ma hataholi la ia kada kokolak koaok, do tetebes laena koasa! 20 Huu Manetualain, Manek mana naena koasa. Boe ma Ndia hataholin nala ta pake bafa mamina, fo lambadedei hataholi namahehelen, tehuu ala pake koasa tetebes. 21 Ei hihiim leo beek? Mete ma au mai, na, au kokolak hala belak, ma huku ei? Do, au mai atudu susuek ma dale malole?