Ita hataholi kamahelek musi tao ues dalek esa fee Lamatuak, ma boso tasisimbo bafak kii-konak
3
Tolanoo susue nggala ei! Fai maneuk au bei nai ele, ei sama leo hataholi fo bei ta nana mba'ak neulalau mia Manetualain Dulan. Huu kada ei tungga ei hihii hehelim, sama leo hataholi basa faik. Huu ndia de, au ta bisa kokolak ua ei, sama leo ua hataholi lasik, huu kada ei sama leo kakana anak. 2 Au musi anoli ei kada la'e-neu dede'a da'u anak, huu ei bei ta mahehele simbok dede'a mabela, sama leo kakana anak fo bei ta bisa na'a mbaa. Naa te, ei musi dadik balakaik sama leo hataholi ina-huuk fo nateme na'a mbaa. Tehuu hatematak ia, ei bei sama leo kakana mbimbila anak fo kada nalelak ninu inan susu oen.a 3 Huu ei bei dudu'a sama leo hataholi fo kada tungga sila hihii hehelin. Mete ma hataholi lena heni ei, na, ei dale hedi, ma masisimbo bafak kii-konak! Huu ndia de au ae, ei malelak kada tungga ei hihii hehelim. No leo ndiak, na ei sama leo kada hataholi basa faik nai dae-bafok ia. 4 Huu ei luma mae, “Au ia, Paulus hataholin!” Ma hambu luma lae, “Au ia, Apolos hataholin!” La'i-la'i esa, ei kokolak leo ndiak, ei matudu mae, ei sama leo hataholi basa faik fo ta nalelak Karistus.bEi sama leo osi esa
5 Naa te Apolos ndia, na see? Ma au, Paulus ia, na see? Huu ai dua nggai ia, kada dadik ata. Ai ndia matudu dalak fo ei bisa mamahele neu Karistus. Apolos nakalala'ok ues tungga Lamatuak palendan. Ma au boe oo leo ndiak! 6 Au ndia makasososan afada ei la'e-neu Karistus. Ndia sama leo au ndia sele bini. Basa de Apolos mai nanoli ei. Ndia sama leo, ndia ndia tetee bini fo au selek so. Tehuu Manetualain ndia tao bini ndia moli dadik ina-huuk.c
7 De hataholi mana sele bini, ta kasosoak. Ma mana tetee bini boe oo, ta kasosoak. Kada dede'ak esa ndia kasosoak. Fo ndia Manetualain. Huu Ndia ndia tao bini sila moli. 8 Hataholi mana selek, ma hataholi mana teteek, ala tao ues leu esa, sama leo lai buaok esa. Ma basa hataholi mana lakalala'ok Lamatuak uen, dei fo Ana bala sosotan nala. 9a Huu ita sama-sama dadik Manetualain hataholi mana tao uen. Ma ei dadik sama leo Manetualain osin, fo Ana nau taon.
Ei sama leo uma esa
9b Leo ndiak boe, ei sama leo uma esa fo Manetualain sangga nambadedein. 10 Manetualain natudu dale malolen neu au so. Huu ndia de au sama leo ndolu langgak. Boe ma Manetualain tulun au, fo au anoli dede'ak huun neu ei, neme makasososan mai fo tao fanderen matea nai ei sodam. Basa de hataholi fe'ek boe lanoli ei, fo ala lambadedein neu fanderen fo au taok ndia so. Tehuu tukan esa-esak musi tao neulalau, fo nambadedei tetebes. 11 Hambu fanderen matea so. Fo ndia Yesus Karistus. De ta hambu hataholi bisa nambadedei fanderen fe'ek, nai ei dalem, huu Lamatuak tao fanderen tetebes so.
12 Neu ko hambu hataholi nau nambadedei neu fanderen ndia, pake bua mata-matak. Hambu mana nau pake bua mabeli leo lilo mbilas, lilo fulak, do batu manggahadok. Hambu mana pake bua biasa leo ai, do fii. 13 Tehuu tukan esa-esak uen dei fo nana nitak, ma basa hataholi bubuluk ndia uen, malole do taa. Te mete ma neu dae-bafok fai babasan, dei fo Manetualain nau uku-sudi ndia sama leo Ana pake ha'i fo natudu hataholi esa-esak uen nakatataka, do taa. 14 Mete ma uku-sudi hataholi esa uen nenik ha'i so, ma buas fo ana pakek ndia bei nakatataka, na, dei fo Lamatuak fee ndia nggadi nai lalai. 15 Tehuu mete ma uku-sudi hataholi uen pake ha'i so, ma buas fo ana pake fo nambadedei neu fanderen, ha'i na'a henin, na, Lamatuak ta fee hataholi ndia nggadi hata-hata. Tehuu tukan ndia, bei hambu nasalala'ek, mae sama leo hataholi mana malai neme uma ha'i na'a henik ndia, ma uak maten.
Ei sama leo Manetualain uma huhule-haladoin esa
16 Ei musi bubuluk mae, ei boe oo sama leo Manetualain uma huhule-haladoin esa, ma Ndia Dulan leo nai dalek boe.d 17 Ma mete ma hambu hataholi tao nakalulutu Manetualain uma huhule-haladoin, fo Ndia mamana leleon ndia, na, mata neuk bou! Dei fo Manetualain tao nakalulutu ndia boe! Huu Manetualain uma huhule-haladoin ndia, malalaok. Huu ndia de ei boe oo, musi malalaok.
18 Ei boso kedi ei aom! Mete ma o taok aok malelak, ma bubuluk basan tungga hataholi dae-bafok hatematak ia nalelelan, na manggaledok so, fo o ta bubuluk hata esa boe. Mete ma o mamedak so mae, o ta bubuluk hata-hata, bei fo o bisa mulai manoli. 19 Hataholi dae-bafok hatematak ia dudu'an, Manetualain kada taok nggoak. Huu nai Susula Malalaok nana sulak nae:
“Hambu hataholi fo taok aon leo malelak,
tehuu dei fo Manetualain pake sila dudu'a manggalau hehelin,
boe ma ika nasafali, fo tao nakalulutu sala!”e
20 Nai baba'e fe'ek nana sulak nae,
“Ita Lamatuan bubuluk so, hata fo hataholi malelak kala bei dudu'a,
ma hataholi musi bubuluk sangga taon leo bee,
Ana bubuluk so, kada ala dudu'a dede'a sosoa taak.”f
21-22 De ei boso soso'uk hataholi esa mae, ndia ana seli. Huu Lamatuak ndia so'u hataholi fo nalangga ei. Basan dadik ei enam so. De ei malanggam mala, sama leo: au, ka'a Apolos ma ka'a Petrus,g ai basa nggai dadik ei enam. Ma basa dede'ak malai dae-bafok ia boe oo, dadik ei enam so, mae ei masoda do mate, mae hatematak ia, do dei fo, basan dadik ei enam. 23 Ma ei dadik Karistus enan. Ma Karistus dadik Manetualain enan!