Ita musi teu tafada ledo-ledo neu basa hataholi, la'e-neu Lamatuak Yesus mamaten nai ai ngganggek
2
Tolanoo susue nggala ei! Makahulun, neu faik fo au uni ei neti, au afada ei, Manetualain dede'a namaninon fo makahulun hataholi ta bubuluk. Tehuu au ta uni dede'a-kokolak ndia, fo kokolak koaok. Ma au ta pake dede'a bini fo atudu au malela heheling. 2 Neu faik fo au bei sama-sama ua ei, au dudu'ang leo iak: au nau atudu kada dede'ak esa, fo ndia Yesus Karistus. Ndia ndia, Hataholi fo Manetualain helu memak so neme makahulun mai, fo nadenun mai. Tehuu ledo-eik Yesus mai, hataholi la mbaku lisa Ndia neme ai ngganggek. Huu kada dede'ak ndia, fo au bubuluk no teteben.3 Fai maneuk, fo au bei sama-sama ua ei, au ameda ta abe'i, ma au boe oo bii ma dele.a 4 Au dala kokolang ma au hehelung ndia, lofo anak. Huu au ta soba pake dede'a-kokolak lena-lenak, fo kokoe ei. Taa! Tehuu ledo-eik au kokolak, manggaledok so nae, Manetualain Dula-dale Malalaon heti au, ma Ndia koasan nai au. 5 Au dudu'a ta malole mete ma ei mamahele neu Manetualain, huu kada ei mamanene hataholi dede'a-kokola malelan. Malolenak ei mamahele neu Manetualain, huu Ndia natudu Ndia koasan neu ei.
Manetualain nanoli ita la'e-neu dede'a malelak tetebes
6 Naa te, neu faik fo ai makokola mia hataholi fo namahehelen matea so, na ai fee nanonolik pake dede'a-kokola mana maso langga utek. Tehuu ta maso langga utek tungga hataholi manai dae-bafok ia dudu'an, do tungga hata fo hataholi mana to'u palenda la lateme fee nanonolik nai hatematak ia. Huu sila ndia, dei fo mopo heni sala. 7 Tehuu kada ai fee nanonolik la'e-neu dede'a malelak fo mana konda neme Manetualain mai. Huu lele uluk, neu faik fo dae-bafok bei ta dadi, Manetualain nafuni dede'ak kala sila. Tehuu hatematak ia, Ana naketun fo buka dede'a namaninok ndia neu ita so, fo suek ita boe oo, hambu baba'ek nai Ndia naden fo ana seli. 8 Tehuu hataholi fo hatematak ia to'u palenda, ala ta bubuluk Manetualain malela teteben. Huu mete ma ala bubuluk, na, ta bisa ala mbaku lisa ita Lamatuan, fo ana seli ndia nai ai ngganggek.
9 Nai Susula Malalaok nana sulak la'e-neu Manetualain dede'a namaninon, fo makahulun nana nafunik nae,
“Hambu dede'ak fo hataholi matan bei ta nita nitak,
ma hambu dede'ak fo hataholi ndi'i doon bei ta namanene nitak,
fo hataholi ta bisa dudu'a nalan.
Naa te, Manetualain sadia memak basa dede'ak sila so,
fee hataholi fo mana sue Ndia.”b
10 Memak makahulun, hataholi ta bubuluk dede'ak kala sila, tehuu hatematak ia, Manetualain pake Ndia Dulan, fo buka dede'ak sila neu ita so.
Manetualain Dulan ndia, bubuluk basa dede'ak. Huu Ndia boe oo, palisak losa lutu-lutuk Manetualain dalen. 11 Ita esa-esak taena dula hehelik nai ita dalen. Huu ndia de ita hataholi dudu'a ma tao dede'a kofe'ek kala. Ma ta hambu hataholi fe'ek bubuluk no teteben ita dalen, kada ita dulan mesak kana. Leo ndiak no Manetualain boe. Ta hambu hataholi esa boe, fo ana bubuluk Manetualain dalen. Kada Ndia Dulan mesak kana bubuluk no teteben.
12 Ita simbo tala Manetualain Dulan so, ma Ndia ndia heti ita. Huu ndia de ita ta tungga hataholi nai dae-bafok ia dudu'an. Huu Manetualain Dulan nai ita dalen, de ita bisa talelak basa dede'a malole fo Ana tao fee ita so.
13 Dede'ak kala sila fo ita tateme kokolak. Huu ai mafada dede'ak kala fo Manetualain Dulan nanoli ai. Boe ma ai fee nanonolik pake dede'a-kokolak fo ta maso langga utek tungga hataholi dudu'an. Tehuu ai fee nanonolik pake dede'a-kokolak neme Manetualain Dulan mai, fee hataholi mana nalelak Ndia. 14 Tehuu mete ma hambu hataholi fo ta nalelak Manetualain Dulan, boe ma namanene ai kokolan, na ta nau simbok no malole. Huu ana dudu'a nae, “Hata ndia? Ta maso langga utek!” Naa te, mae leo bee boe oo, hataholi ndia ta bisa bubuluk dede'ak kala sila, huu ndia ta nasoda nana mba'ak no Manetualain Dulan. 15 Hataholi mana masoda nana mba'ak no Manetualain Dulan, bei fo bisa bubuluk basa dede'ak sila, ma bisa bubuluk bee ndia ndoos sala. Tehuu hataholi fe'ek kala ta bisa uku lala hataholi ndia. 16 Ta bisa maa. Huu nana sulak nai Susula Malalaok nae:
“See bisa bubuluk Manetualain dudu'an?
Do, see bisa heti nala Lamatuak,
fo Ana tao tungga hataholi ndia nanoli-nafadan? Ta hambu hataholi esa boe!”c
Naa te ita bisa bubuluk dede'ak sila, huu Karistus tulun fo ita bisa dudu'a tungga Ndia dudu'an.