Paulus haitua soda-molek neu tolanook kala lai Roma
16
Nesik susulak ia, au nau fee nalelelak ita ka'a inan Febe neu ei, ma au oke fo ei simbok mala ndia. Ndia ia, ala so'u lalan so fo nalangga salanik manai kota Kengkrea. 2 Au oke, fo ei malengga ei dalem mala fo simbok mala ndia no malole, huu ndia nana mba'ak no ita Lamatuan. Tatao leo ndiak nandaa neu hataholi kamahelek. Ana paluu hata, na kada tulu-falin. Te ndia mesak kana tulu-fali au so, ma hataholi no'uk kala neme makahulun mai.3 Au haitua soda-molek fee ka'a ina Priskila,a ma saon ka'a Akila. Ai basa nggai makalala'ok Yesus Karistus uen no'uk.b 4 Dua sala lasala'e lala au, losa elaba'ik mate sala boe. Tehuu ta kada au mesa nggau fo oke makasi neu sala. Te hataholi ta Yahudi la fo dadik hataholi salanik kala leme basa salanik kala sudi lai bee mai so, loke makasi huu sila sosotan nala boe.
5 Au haitua soda-molek fee basa hataholi mana makabubua fo ala nggalei lai Priskila no Akila uman.
Au haitua soda-molek fee au nonoong, ka'a Epenetus. Ndia ndia, hataholi makasososak fo namahele neu Karistus nai propensi Asia.
6 Au haitua soda-molek fee ka'a Mia. Ana tao ues mbilu-mbuse nai ei laladam mala.
7 Au haitua soda-molek fee ka'a Andronikus ma ka'a inak Yunia.c Sila ndia, hataholi Yahudi sama leo au. Ala lamahele neu Karistus so, neu faik fo au bei ta amahele. Makahulun ala leme bui dale sama-sama lo au boe. Sila boe oo dadik Manetualain nadedenun, ma hataholi no'uk lalelak kasa.
8 Au haitua soda-molek fee ka'a Ampliatus. Au sue ndia, huu ndia nana mba'ak no ita Lamatuan.
9 Au haitua soda-molek fee ka'a Urbanus. Ndia boe, nakalala'ok Karistus uen sama-sama no ai.
Au haitua soda-molek fee ka'a Stakis, fo au suen.
10 Au haitua soda-molek fee ka'a Apeles. Ana hambu sosoba-susudik, tehuu ana nala deak. De manggaledok so, ana namahele tebe neu Karistus.
Au haitua soda-molek fee basa ka'a Aristobulus ka'a-fadin nala.
11 Au haitua soda-molek fee ka'a Herodion. Ndia hataholi Yahudi sama leo au boe.
Au haitua soda-molek fee basa Narkisus ka'a-fadin nala fo dadik Karistus hataholin nala so.
12 Au haitua soda-molek fee ka'a inak Trifena ma ka'a inak Trifosa. Sila boe oo lakalala'ok ita Lamatuan uen.
Au haitua soda-molek fee au nonoong, ka'a inak Persis. Te ndia boe oo tao ues mbilu-mbuse soa-neu ita Lamatuan.
13 Au haitua soda-molek fee ka'a Rufus. Fo ita Lamatuan hele nala ndia.
Au haitua soda-molek fee ndia inan boe. Te ndia ndia, sama leo au ina bongging so.d
14 Au haitua soda-molek fee ka'a Asinkritus, ka'a Flegon, ka'a Hermes, ka'a Patrobas, ka'a Hermas, ma basa tolanoo kamahelek kala fo lai ei laladam mala.
15 Au haitua soda-molek fee ka'a Filologus, ka'a inak Yulia, ka'a Olimpas, ka'a Nereus ma ndia fadi inan, ma basa hataholi salanik kala fo ala sama-sama lo sala.
16 Mete ma ei makabubua fo soluk esa no esa pake i'idu susuek, fo nandaa neu hataholi kamahelek kala. Basa Karistus salanin nala malai ia boe oo haitua soda-molek susuek neu ei.e
Paulus fee nanoli-nafadak neu salanik kala
17 Tolanoo nggala ei! Au hule fo ei mata neuk bou! Manea matalolole, te hambu hataholi tao ei matanggelak, fo ana sangga ika natuda ei. Hata fo ala lafada ei ndia, mana labak no hata fo ai manolik ei ndia so. De boso matia-laik mia hataholi matak leo sila! 18 Ala ta tao ues soa-neu ita Lamatuan Yesus Karistus. Ala kada tao ues, fo sila mesak kasa hambu ndia buna-boan. Ala labafa mamina lo hataholi fo bei ta bubuluk bee ndia malole, ma bee ndia manggalauk. Ala bafa mamina fo ala kedi lala hataholi.
19 Basa hataholi la lamanene so lae, ei tungga makandoo Manetualain hihiin. Huu ndia de au daleng namahoko huu ei. Au nau fo ei dadik malelak la'e-neu dede'a neulauk kala, ma boso seseok mia dede'a manggalauk kala. 20 Manetualain ndia bisa tao nala ita tasoda to sodak, mole, ma ndoo-ndoo. Dei fo ta dook so bali, Ndia tao nakalulutu nitu la malangga ina-huun koasan, ma natudu nae, ei ndia senggi. Au hule-haladoi fo oke ita Lamatuan Yesus Karistus natudu Ndia dale malolen neu ei.
21 Fadi Timotius tao ues no'u no au, ana haitua soda-molek neu ei.
Ka'a Lukius, ka'a Yason ma ka'a Sosipater boe oo haitua soda-molek. Sila ndia, hataholi Yahudi sama leo au.f
22 (Au ia, Tertius, fo sulak susulak ia tungga hata fo ka'a Paulus nadenu au sulak kana. Soda-molek neme au mai boe, te au ia boe oo ita Lamatuan hataholin).
23 Au leo tataak nai ka'a Gayus uman. Basa hataholi salanik kala malai ia lateme lakabubua fo ala nggalei lai ndia uman. Ndia boe oo haitua soda-molek.
Ka'a Erastus, fo dadik mana to'u doi kota, ma ita tolanoon Kuartus boe oo haitua soda-molek.g
24 [Au oke fo ita Lamatuan Yesus Karistus natudu Ndia dale malolen neu ei basa nggei. Kada leo ndiak baa!]h
Manetualain ana seli!
25 Koa-kio Manetualain! Te Ndia naena koasa fo tao ei dadik balakaik. Ndia Hala Malolen nae leo ndiak, de au boe anoli hataholi leo ndiak, neu faik fo afada sala la'e-neu Yesus Karistus. Manetualain nafada ita basa nggata la'e-neu Karistus, fo makahulun ele ita ta bubuluk, huu bei namaninok. 26 Tehuu hatematak ia dede'ak kala fo Manetualain mana kokola lele ulun nala sulak nai Susula Malalaok la'e-neu Karistus so, manggaledok so. Manetualain fo ta mana matek, na Ndia ndia heti hataholi fo hataholi leme basa hataholi nusak kala mai bisa bubuluk dede'ak kala fo makahulun nana nafunik. No leo ndiak, na ala bisa lamahele Karistus, ma tao tungga Ndia hihiin. 27 Kada Ndia mesak kana Manetualain. Kada Ndia mesak kana bubuluk basa dede'ak kala. Au ahiik so'u koa-kiok neu Ndia, huu Yesus Karistus tatao-nono'in. Tetebes ndia!
Au susulang kada losa ia.
Soda-molek,
Paulus