Boso sapa madabak ei tolanoo salanim mala
14
Hambu hataholi fo namahele Lamatuak so, tehuu ndia namahehelen bei ta matea, ma ndia bei ta bubuluk dede'ak no'uk. Malengga dalek fo simbok ndia no malole. Boso masisimbo bafak la'e-neu ndia dudu'an. Elan fo kada ana nanonoo no ei. 2 Hambu hataholi fo namahele neu Lamatuak, fo ana dudu'a nae, hataholi salanik bisa na'a sudi hata, leo mbaa do, sudi hata. Tehuu hambu hataholi salani fe'ek kala, fo sila namahehelen nala ta matea, fo kada nau la'a aidoo. Te ala laluli mbaa. 3 Tehuu mamanene bou! Hataholi salanik fo nameda na'a sudi hata, na, boso makadadaek hataholi fo ta nau na'a mbaa. Leo ndiak boe, hataholi salanik ta mana na'a mbaa, boso nafada hataholi mana na'a mbaa nae, “Wei! Na'a mbaa ndia na, sala!” Huu Manetualain simbo nala dua sala fo dadik neu Ndia hataholin!4 Mete ma o mambue sapa o tolanoo kamahelem mala leo ndiak, na o dudua mae o ia, see? O maena haak hata, fo soli salak neu hataholi fe'ek? Hataholi ndia, o atam ta ndia! Ma ndia malanggan ta o. Te kada ndia Lamatuan naena haak, fo nafada ledo-ledo ndia tataon ndia, tetebes do sala. Tehuu boso mafalende henin. Dei fo ndia Lamatuan simbok hataholi ndia no malole, huu ndia Lamatuan nabe'i taon balakai fo bisa nakatataka.
5 Hambu hataholi luma fo laketun lae, faik esa malole neme fai fe'ek kala mai. Hambu hataholi fe'ek dudu'a nae, basa faik kala leo esak, ta hambu mana fe'ek. Hataholi esa-esak musi naketu aon la'e-neu dede'ak ndia. 6 Mete ma hataholi dudu'a nae, hambu faik fo lolen lena fai fe'ek kala, na, ana tao leo ndiak fo natudu hada-holomata neu ita Lamatuan. Hataholi mana'a mbaa, ma nana'a fe'ek kala, bisa na'a fo natudu hada-holomata neu ita Lamatuan, huu noke makasi neu Manetualain. Leo ndiak boe, no hataholi ta mana'a mbaa. Ndia boe nau natudu hada-holomata neu ita Lamatuan, ma ndia boe oo noke makasi no'uk neu Manetualain.a
7 Naa! Neu faik fo ita tasoda, na ita ta kada tasoda soa-neu ita ao-ina hehelin. Ma mete ma ita mate, na, ita ta kada mate soa-neu ita ao-ina hehelin. 8 Te mete ma ita bei tasoda, na, ita nana mba'ak to ita Lamatuan. Leo ndiak boe mete ma ita mate, te ita bei nana mba'ak to ita Lamatuan. De mae ita tasoda do, ita mate boe, ita bei dadik neu Ndia enan. 9 Huu ndia de Karistus maten, boe ma nasoda fali. Ana tao leo ndiak fo Ana bisa dadik neu Lamatuak, neu hataholi mana matek kala so, ma neu hataholi bei kasodak kala boe.
10 De boso o so'uk aom leo mana maketu dede'ak, fo sapa o tolanoo salanim. Ma boso o makadadaek ndia. Te dei fo ita basa nggata musi tasale Manetualain, fo Ana palisak ita esa-esak sodan.b 11 Nana sulak neme makahulun mai, nai Manetualain Susula Malalaon nae,
“Ita Lamatuan mesak kana nafada nae,
‘Basa hataholi la dei fo sendek fo lakaluku-lakatele neu Au,
ma natudu hada-holomata neu Au.
Hataholi esa-esak dei fo pake sila bafan nala fo manaku,
lae, Au dadik neu sila Lamatuan,
huu Au ia, Manetualain.”’c
12 De dei fo ita basa nggata musi tanggon-natataak fo tafada ita Lamatuan tae, ita tao leo beek ma hatina de ita tao leo ndiak.
Boso tao matuda o tolanoo salanim mala
13 Makahulun, ei nai Roma na mambue soli salak neu ei tolanoo salanim mala. Boso leo ndiak bali! Malolenak, ita taketun leo iak: boso tao tala ita tolanoon nala lakatunu. Boso ita soba tao tatuda sala, losa ala tao salak.
14 Huu au nana mba'ak ua ita Lamatuan Yesus, de au bubuluk no teteben, leo iak: ta hambu dede'ak esa boe fo bisa tao nanggenggeo hataholi, losa ta bisa hule-haladoi neu Manetualain. Tehuu mete ma hataholi esa dudu'a la'e-neu hata esa fo ana tao nala ndia nanggenggeo, losa nameda ndia ta naena haak fo hule-haladoi bali, na, ela dede'ak ndia dadik nalulik neu ndia. 15 Conto leo, mete ma o mu'a mbaa, na, ndia tao nala o tolanoom dalen hedis, na, o ta matudu o susuem neu ndia, hetu? Makatataka aok dei! Boso tao makalulutu o tolanoom, huu kada o nau mu'a hata esa! Te Karistus boe maten soa-neu hataholi ndia. 16 Ta malole, mete ma o tao dede'ak esa fo mae malole, tehuu hataholi fe'ek kala, kokolak tao laboboo o nadem, huu ala lae o tataom ndia, manggalauk.
17 Dudu'a neulalau! Te Manetualain ndia, na ita Manen. Tehuu ita ta dadik Manek hataholin, huu kada ita ta'a-tinu tungga heti-heuk. Taa! Mete ma ita nau dadik Manek hataholin nala, na, ita musi tao dede'ak ndoos, ita dalen nala malalaok, ita tasoda ndoos ma mole-dame, ma ita dalen nala lamahoko. Basa ia la bisa dadi, mete ma ita nana mba'ak to Manetualain Dula-dale Malalaon. 18 Hataholi fo ono-lau Karistus leo ndiak, na ana tao nala Manetualain dalen namahoko. Ma hataholi fe'ek boe lita neulalau hataholi ndia sodan, basa de so'uk hataholi ndia naden nae, “Ndia ndia, malole!”
19 De ita musi mbalak eik fo tasoda to mole-dame, ma tao tatetea esa no esa. 20 Boso tao makalulutu Manetualain uen nai hataholi fe'ek kala sodan huu kada dede'a nana'a-nininuk. Manetualain nafada so nae, bole mi'a sudi hata, te basa-basan malalaok. Tehuu mete ma o madede'a mua o tolanoom, huu kada nana'a-nininuk, na o sala ndia. Boso leo ndiak!
21 Malolenak, kada o makatataka aok. Boso mu'a mbaa do, minu anggol oek do, mu'a-minu hata fe'ek fo tao nala o tolanoom nakatunu. 22 Leo iak: mete ma o dudu'a mae, o maketum la'e-neu nana'a-nininuk ndia nandaa no Manetualain hihiin, na nggali heni o dale kaba'em ma tao o dalem ndoo-ndoo. Mete ma leo ndiak, na o mamahoko nai Manetualain matan. 23 Tehuu mete ma o dalem naba'e mu'a hata esa fo o mameda ndia manggenggeok nai Manetualain matan, na Manetualain fee salak neu o. Ma mete ma o tataom ndia ta nandaa no namahehelek manai o dalem, na, Manetualain nae, salak ndia so.