Mamanene neu mana palenda la
13
Hataholi esa-esak musi namanene neu mana palenda la. Te sila laena haak ma koasa fo palenda hataholi. Tehuu sila koasan nala sila, huu Manetualain ndia fee sala. Mana koasa hatematak ia, hambu koasa leo ndiak, huu Manetualain so'u nala sala so. 2 De mete ma hambu hataholi laban mana palenda leo ndiak, na, ndia sama leo laban hata fo Manetualain so'u sala so. Mete ma ala tao leo ndiak, na, dei fo hambu huhukuk neme Manetualain mai.3 Mete ma ei tao ndoos, na ei malole mia mana palenda la. Tehuu mete ma ei tao manggalauk, na, malolenak ei bii sala! De manea aok fo tao dede'a ndoos, ta paluu bii sala. Ma mete ma ei tao leo ndiak, na, dei fo ala koa ei. 4 Te mana palenda la fo Manetualain hele nala sala, de ala ono-lau ei. Tehuu mete ma ei tao salak makandoo, na, malolenak kada ei mata neuk! Te Manetualain ta suma-suma fee haak neu mana palenda fo huku ei. Sila ndia, sama leo Manetualain nadedenun nala, fo huku hataholi mana tao manggalauk kala. Huu Manetualain ta simbok dede'a manggalauk fo hataholi taon; Ana luli sala.
5 Huu ndia de ei musi mamanene neu mana palenda la. Te ei bubuluk nai ei dalem mala so mae, ndia tetebes. Ma ei boe oo bubuluk mae, Manetualain luli, mete ma ita ta tao tetebes.
6 Leo ndiak boe, ei musi bae bea tungga teteben, huu mana palenda la lakalala'ok Manetualain uen. 7 Ei musi malole mia mana palenda no mandaan. Bae bea neu mana susu bea la. Fee hada-holomata neu basa hataholi la fo musi simbok hada-holomata. Ma mete ma hambu hataholi tao dede'a malole nakandoo, na, so'uk sila naden nala fo basa hataholi la bubuluk, ala tao malole.a
Masoda masue ao esa no esa
8 Bae ketu o hutam mala, fo boso masoda munik huta-bu'uk. Te kada ita bei tahuta dedeak esak, fo ndia tasue ao. Mete ma ei sue hataholi, na, ei tao tungga Manetualain Heti-heun nala so. 9 Heti-heuk kala sila lae, “Boso mambue hohongge; boso tao misa hataholi; boso mamana'o; boso dale hedi hataholi fe'ek buan,” ma bei fe'ek bali. Mete ma nau tao tungga basa Heti-heuk kala, na, musi tao tungga Heti-heuk esa ia, fo nae, “O musi sue hataholi fe'ek kala, sama leo o sue o ao hehelim.”b 10 Te mete ma ita tatudu susuek neu hataholi fe'ek, na, ita ta tao manggalauk neu ndia, hetu? De mete ma ita tatudu susuek takandondoo henin, na, ita bisa tao tungga basa Manetualain Heti-heun.
Ta dook bali, te Karistus sangga fali main so
11 Yesus fai mamain fo nasala'e nala ita, deka-deka so. Hatematak ia faik ndia, deka-deka so, mete ma nakasasaman no faik fo ita bei fo tamahele teu Yesus Karistus. Huu ndia de ita musi tasoda tasue ao, huu ita bubuluk dede'ak ndia. Nonook leo bali makahulun, ita mana sungguk. Tehuu hatematak ia, ndia fain fo ita musi fo'a leo! 12 Ta dook bali, te le'odaek basan so, boe ma leledok mai so. De malolenak ita hahae leo teme ita tatao manggalaun mai. Ndia sama leo hataholi mana leo nai makiuk ma tao manggalauk, te sila dudu'a lae, ta hambu hataholi nita sala. Tehuu hatematak ia, ita musi dadik leo soldadu mana pake manala natatik, fo mbalak eik tao dede'a malole la, sama leo hataholi mana masoda nai manggaledok dale. 13 Ita musi tasoda mandaak ma ndoos, fo basa hataholi la lita ita tao dede'a malole la. Ta malole, mete ma kada ita tafetak takasoe, ma kada tinu mafuk. Ta malole, mete ma ita tambue hohongge. Ta malole, mete ma ita tasisimbo bafak kii-konak. Ma ta malole, mete ma ita holo, huu ita ta nau hataholi lena ita. 14 Tehuu malolenak, ei tao masafali ei dalem mala fo dadik sama leo ita Lamatuan Yesus Karistus, fo Manetualain nadenun mai so. Ma mete ma o mahiik sangga tao dede'ak ta tetebes, na, boso hanuk kana fo o tao tungga o hihii madaba leo ndiak. Manea o aom!