Mete ma ita nana mba'ak to Karistus, na, ita soda beun musi dadi leo beek?
12
Tolanoo susue nggala ei! Huu Manetualain natudu Ndia namemeda kasian neu ita so, de Au oke fo fee ei ao-inam mala tema-tema neu Ndia, sama leo tunu-hotuk bei kasodak. Ndia tao namahoko Manetualain dalen. Mbalak eik fo tao tungga Ndia hihiin ma masoda malalaok, te tataok ndia natudu ei susuem ma hada-holomatam neu Ndia. Memak nandaa ei makaluku-makatele miu Ndia leo ndiak. 2 Boso ela hataholi dae-bafok hatematak ia ladenu ei musi tao leo beek do, masoda leo beek, tungga sila hihiin. Boso kada tungga sila dudu'a-a'afin nala, sila sodan nala do, sila hadan nala no mboke-mbakek. Tehuu malolenak ei ela Manetualain tao ei dudu'a-a'afim dadik beuk fo ei suli basan tungga dala beuk. No leo ndiak, na ei bisa bubuluk Manetualain hihiin neu ei. Manetualain hihiin ndia, malole, matetuk, ma tao namahoko Ndia dalen.3 Huu Manetualain nadenu au ma natudu Ndia dale malolen neu au so, de au afada ei leo iak: timba-tai neulalau ei ao-inam mala no ndoos! Boso soso'uk aok lena heni teteben. Hataholi esa-esak musi bubuluk sudik baba'e-babatik fo Manetualain fee ndia so, huu ana namahele Karistus.
4 Ha'i conto neme hataholi ao-inan mai. Aok esa baba'en mata-matak. Ma baba'ek esa-esak ue-taon mana fe'ek. 5 Leo ndiak boe, no ita fo nana mba'ak to Karistus. Ita hataholi no'uk, tehuu ita nana mba'ak dadik sama leo ao-inak esa. Ma hataholi esa-esak ue-taon mana fe'ek, sama leo aok baba'en nala. Esa namahena neu esa. Conto leo, limak fo nana tete henik neme aon mai, de sosoan ta so bali, hetu?a
6 Au maksut leo iak: Manetualain fee ita basa nggata koasa fo takalala'ok ues mata-matak, huu Ana hii natudu dale malolen neu ita. Conto leo, mete ma Manetualain fee koasa neu o, sama leo mana kokolak fo nafada Ndia hehelun, na o musi mafada Ndia hehelun no katematuan. Tehuu boso mafada lenak neme heheluk ndia mai. 7 Mete ma Manetualain fee o baba'e-babatik fo ono-lau hataholi fe'ek, na, o musi ono-lau pake koasa ndia. Mete ma Ana fee o baba'e-babatik fo manoli hataholi la'e-neu Ndia, na, o musi manoli hataholi pake koasa ndia. 8 Mete ma Ana fee o baba'e-babatik fo fufu'a hataholi la samanen, na, o musi pake koasa ndia. Mete ma Ana fee o koasa fo o bisa tulu-fali hataholi fe'ek munik o hatam fo o hambuk ndia, na, tulu-fali sala munik o hatam ndia. Mete ma Ana fee o baba'e-babatik fo o malangga hataholi sila, suek lakalala'ok Ndia uen lolen lena, na, o musi manggate fo malangga sala pake koasa ndia. Mete ma Ana fee o namemeda kasian fo sangga tulu-fali hataholi mana to'a-taak, na, o musi tulu-fali sala no dale namahokok.b
Karistus hataholin nala musi lasoda leo beek?
9 Mete ma ei matudu susuek neu hataholi, na, matudu susue tetebes; boso madea-dalek. Heok masadea basa dede'a manggalauk kala, ma to'u basa dede'a malole. 10 Ei hataholi salanik kala musi masue ao neulalau esa no esa. Mbalak eik fo matudu ei hada-holomatan esa no esa. 11 Mete ma ei tao ues, na, tao ues no samane mana boi-boik, boso no dale bibiak. Ela ei dalem mala lamahoko neu faik fo ei tao ues. Ma tao ues soa-neu ita Lamatuan. 12 Ei dalem mala musi lamahoko leledo-le'odaen, te ei bubuluk so mae, Manetualain sadia dede'a malole soa-neu ei so. Ma mete ma ei hambu toto'ak, na, makatataka. Hule-haladoi leledo-le'odaen; boso hahae. 13 Pake ei hatam mala fo tulu-fali hataholi salani mana paluuk kala. Mete ma hambu hataholi mana maik neme mamana fe'ek mai, na, malengga dalek fo fee sala la'a-linu, ma leo tataak nai ei umam. No leo ndiak, na ei matudu susuek miu sala.
14 Mete ma hambu hataholi tao nakatoto'ak ei nakandondoo henin, na, moke fo Manetualain tao fee sala dede'a malole. Tetebes ndia! Boso sumba-soo sala!c 15 Mete ma hambu hataholi dalen namahoko, na, mamahoko no'u mian. Ma mete ma hambu hataholi namatani huu dalen hedis, na, mamatani tungga no'u mian. 16 Masoda masue ao no dalek esa. Boso koao. Malolenak ei matia-laik mia hataholi ta mana dadadik kala. Boso soso'uk aok fo dudu'a mae, kada o mesa nggo bubuluk.d
17 Mete ma hataholi tao manggalauk neu o, na, o boso balan no manggalauk. Tehuu o musi sangga sudik dala malolen ana seli, fo basa hataholi la bisa simbok. 18 Mete ma bisa, na, sangga dalak fo masoda mole-dame mia basa hataholi la.
19 Tolanoo susue nggala ei! Boso bala nahinda dalek. Elan neme naa, fo kada Manetualain heti. Te Ana luli, mete ma hataholi tao manggalauk, sama leo nana sulak nai Susula Malalaok nae,
“Ita Lamatuan mesak kana kokolak nae,
Au aena haak fo bala hataholi mana tao manggalauk.
Te Au ndia huku hataholi mana tao leo ndiak.”e
20 Malolenak, tao tungga hata fo Susula Malalaok nafada neme makahulun mai nae,
“Mete ma o musum ndoe,
na, feen na'a.
Mete ma o musum maa mada,
na, feen ninu.
Te mete ma tao leo ndiak, na, dei fo ana nameda mae,
boe ma ana fee hada-holomata nasafali neu o.”f g
21 Boso ela dede'a manggalauk heti o. Malolenak, kada dede'a malole la heti o. No leo ndiak, na o bisa senggi dede'a manggalauk kala.