Manetualain dalen tuda kasian neu hataholi Israel asa
11
De au sangga atane leo iak: fama ei dudu'a mae, “Huu hataholi Israel asa tala nau lamanene neu Manetualain, de Ana timba heni sala.” Leo ndiak, do? Taa! Te au boe oo uma sila mai! Au ia, uma leo Benyamin mai. Benyamin aman, ndia Yakob. Ndia ba'in, ndia Isak. Isak aman, ndia Abraham fo mana dadik neu basa hataholi Israel asa bei-ba'in.a 2 Manetualain ta timba heni nitak Ndia hataholin nala. Ana nalelak memak sila neme makahulun ele mai. Ei bei masaneda hata fo nana sulak nai Manetualain Susula Malalaon la'e-neu ba'i Elia? Ana manggalau neu Manetualain la'e-neu hataholi Israel, de noke fo Manetualain huku sala 3 nae,“Lamatuak! Hataholi la ia tao lisa mana kokola la,
fo Lamatuak nadenu sala mai.
Sila boe oo ofe lakalulutu heni mei tunu-hotuk,
nai mamanak fo hataholi lakaluku-lakatele neu Lamatuak.
Neme basa Manetualain mana kokolan nala mai,
kada au mesa nggau bei kasodak.
Tehuu sila boe sangga dalak bali,
fo sangga tao lisa au!”b
4 Tehuu Manetualain nataa leo iak: “O kokolam ndia, sala! Te Au hataholi nggala fo mana makaluku-makatele neu Au, bei hambu hataholi 7.000. Ala lahele teas, ma tala songgo Ba'al!”c
5-6 Leo ndiak boe, hatematak ia. Ta basa hataholi Yahudi la heok lasadea Manetualain. Bei ela hataholi luma leme ai mai, hataholi Yahudi fo Manetualain hele nala sala so, fo sangga nasala'e nala sala. Ana tao leo ndiak, huu Ana nau natudu dale malolen neu ai, tehuu ta timba-tai ai tataon. Mete ma Manetualain musi hele nala hataholi fo bala ndia tatao malolen, ndia sama leo bae nggadi. Ndia ta nandaa no Manetualain hihiin fo natudu Ndia dale malolen neu hataholi fo Ana hele nalak kala.d 7 De ndia sasai-main leo iak: hataholi Yahudi no'uk kala lasanggak, fo Manetualain natudu dale malolen neu sala, fo sila boe bisa lalole lo Ndia. Tehuu ta hambu ndoos, huu sila dalen nala lakababatu, ma ta nau lamanene Ndia. Tehuu luma ala hambu. Sila ndia fo Manetualain hele nala memak kasa so. 8 Nai Manetualain Susula Malalaon nana sulak nae,
“Manetualain fee sala,
mata fo ta mana nitak,
ndi'i doo fo ta mamanenek,
ma langga utek fo ta bisa dudu'a.
De ala ta bubuluk bee ndia tetebes,
losa faik ia boe.”e
9 Mane Dauk boe oo sulak la'e-neu hataholi nusa Yahudi nai Susula Malalaok nae,
“Ela sala lafetak lai sila mei hehelin nala.
Te sila feta hehelin ndia, ana ika nasafali sala,
fo ala dudu'a basa-basan malole so.
Ma sila hata hehelin ndia, tao nala sala lakatunu.
10 Ela sila matan nala dadik makiuk,
fo ta bisa lita hata-hata!
Ela sala lemba belak lakandoo,
fo dea inan nala boe bokoluku!”f
Manetualain nau nasala'e nala hataholi ta Yahudi boe
11 De au sangga atane leo iak: hatina de hataholi Yahudi la lakatunu? Ala tuda so, do? Taa! Tehuu no tala nau lamanene leu Manetualain, ma tala nau lamahele leu Karistus, de ndia soi dalak fee hataholi ta Yahudi la fo ala hambu nasalala'ek leme sila sala-singgon nala mai. Ma Manetualain tao leo ndiak, huu Ana nau fo hataholi Yahudi la holo, boe ma ala fali tungga Ndia bali. 12 Manggaledok so nae, hataholi Yahudi la la'o lena hata fo ndoos. Huu ndia de hataholi fe'ek kala leme basa dae-bafok katematuan mai, fo bisa lameda Manetualain dale malolen. De hataholi Yahudi la laheni lalan seli. Tehuu ndia tao nala hataholi ta Yahudi la hambu nanala ina-huuk. Naa, dook fo mete ma basa hataholi Yahudi la boe malole fali lo Manetualain, na, ndia malolen lena bali!
13 Naa! Au sangga afada ei hataholi ta Yahudi, leo iak: Manetualain nadenu au so, fo au la'o uu afada ei la'e-neu Ndia Hala Malolen. Huu ndia de au mbalak eik fo akalala'ok ues ia fo lolen ana seli. 14 Mete ma au akalala'ok ues ia no malole, na, naa fo au tao ala au hataholi Yahudi nggala mesak kasa ala dale hedi, losa sila luma hambu nasalala'ek leme sila sala-singgon nala mai. 15 Neu faik fo Manetualain timba heni Ndia hataholi Yahudi hehelin nala, na ndia soi dalak fo hataholi fe'ek kala ala hambu lelak, fo bisa ala maso dadik leu Manetualain hataholin nala. Tehuu leo ala mole-dame bali lo Manetualain, na ndia malole hiak. Te ndia sama leo ala lasoda fali leme sila mamaten mai so!
16 Ha'i conto neme hataholi mana sangga tao loti. Mete ma ana ha'i nala hade uu faa fo feen neu Manetualain, na, dei fo loti katemak ndia boe dadik Manetualain enan fo malalaok. Ma mete ma hataholi fee ai huuk okan esa fo dadik neu buna-boa sososak, fo feen neu Manetualain, na, dei fo ai ndia katemak boe dadik neu Manetualain enan fo malalaok.
17 Au nau akasasama hataholi nusa Yahudi no ai setun fo nasoda nai osi. Manetualain beta heni ai ndia ndanan luma so. Tehuu ei ta Yahudi la, sama leo setun fui. Basa de Manetualain beta nala ei ndanan luma so, de nakadiditan neu ai manai osi ndia dalek. No leo ndiak, na ai manai deak simbo nala ndia sodan neme ai manai dalek. Ndia sama leo ei ta Yahudi la, de simbok mala Manetualain dale malolen, fo teteben Ana sangga feen neu Ndia hataholi Yahudin nala. 18 Tehuu mata neuk bou! Boso koao huu ei dudu'a mae, ei mima deak mai ndia, malolen lena neme ndanak fo Manetualain beta heni sala so! Mete ma o nau soso'uk aok, na, boso mafalende henin, te kada o ndanak esak! O ta ndia tao matea ai ndia. Te okak ndia tao nala ai ndia dadik natea!
19 Fama o sangga mae, “Manetualain beta heni ndanak esa neme ai fo nasoda nai Ndia osin dale, fo ana bisa nakadidita falik au nai ndia, fo nggati neu ndana laak.” 20 Ndia tetebes. Tehuu boso mafalende henin mae, Manetualain beta heni ndanak kala sila, huu ala ta lamahele leu Karistus. Ma o nggati sala, huu o mamahele muu Ndia. De boso koao! Malolenak o mata neuk, ma boso tao mata-matak! 21 Te hataholi Yahudi la, sama leo ndana isi-isik fo moli nakahuluk. Tehuu Manetualain ta ela sala lahele lala dook lai ndia. De mete ma o ta mamahele makandoo neu Ndia, na, boso mamahena Ana nau ela o mahele nai ndia!
22 De ei musi dudu'a neulalau dei. Manetualain dalen malole. Tehuu Ndia boe nalelak fee huhuku belak. Dei fo Ana huku hataholi fo mana tudak, fo ta nau malole no Ndia. Tehuu soa-neu ei hataholi ta Yahudi la, Manetualain natudu Ndia dale malolen neu ei, sadi ei nana mba'ak nakandoo mia Ndia, ma feen lelak fo ela Ana tao malole fee ei. Tehuu mete ma ei ta feen lelak fo ela Ana tao leo ndiak, na, Ndia boe oo nau beta heni ei mima Ndia huun mai. 23 Leo ndiak boe no hataholi Yahudi la. Mete ma ala hondak fo mulai lamahele neu Karistus, na, dei fo Manetualain nau nakadidita falik sila neu ai huu isi-isik ndia. Te Ndia naena koasa fo bisa tao leo ndiak! 24 Te ei fo hataholi ta Yahudi, sama leo ndanak neme setun fui fo makahulun ana moli aon nai osi deak. Mae ai fui fe'ek mesak kana ma ai manai osi mesak kasa fe'e, tehuu Manetualain hele nala dua sala, fo Ana nakadiditak kasa neu ai setun malole fo Ana selen nai Ndia osin. Mete ma hataholi ta Yahudi bisa dadik leo ndiak, na, nakalenak bali no hataholi Yahudi la. Ndia bisa lena bali, mete ma Manetualain nakadiditak falik kasa leu ai huu dadadin.
Dei fo hataholi Yahudi la malole falik lo Manetualain
25 Tolanook kala malai Roma! Au afada dede'ak namaninok neu ei, fo ei boso koao, mae ei malelak. Leo iak: hatematak ia hataholi Yahudi la dale batuk, ma tala nau lamahele neu Karistus. Tehuu ala ta leo ndiak lakandondoo henin. Tungga Manetualain hihiin, basa hataholi ta Yahudi la fo Manetualain hele nala sala so, musi lamahele neu Karistus dei. Mete ma sila dedesin nala mana daik, na, bei fo hataholi Yahudi la lamahele neu Ndia boe. 26 De mete ma fain ndia losa so, na, dei fo Manetualain nasala'e nala basa hataholi Yahudi la leme sala-singgon nala mai. Ndia sama leo nana sulak nai Susula Malalaok so nae,
“Dei fo hambu Hataholi esa mai,
fo nasala'e nala ita teme soe mai.
Ana neme lete Sion mai, nai kota Yerusalem.
Ndia dei fo tao Yakob numbu-sadun nala hondak.
Ala musi hondak, huu ala lasoda ta mbali Au,
ma ala heok lasadea Au dala soda tetebeng.g
27 Au nau koka heni sila sala-singgon nala.
Te Au mba'a heheluk ua sila leo ndiak.”h
28 Neu faik fo hataholi Yahudi la lamanene Karistus Hala Malolen, na, ala tao aon nala leo musu fo laban Ndia. No leo ndiak, na ala fee lelak leu ei fo ta Yahudi la! Mae leo ndiak, tehuu Manetualain bei sue sala, huu Ana sue sila bei-ba'in nala, ma Ana hele nala sala fo dadik neu Ndia hataholin nala. 29 Mete ma Manetualain fee heni hata esa, na, Ana ta hela falik kana. Ma mete ma Ana noke nala hataholi so, fo maso dadik Ndia hataholin, na, Ana ta husi heni sala bali.
30 Makahulun ei hataholi ta Yahudi la ta nau mamanene Manetualain. Tehuu hatematak ia ei mana simbo Manetualain namemeda kasian, huu hataholi Yahudi la fo ta nau lamanene Ndia. 31 De hatematak ia sila ia, ta tao tungga Manetualain hihiin. Huu ndia de Manetualain bei nau natudu Ndia namemeda kasian neu ei. Ma dei fo Ndia boe oo nau kasian neu sala bali. 32 Hatematak ia Manetualain suli hataholi Yahudi, na, sama leo hataholi ta Yahudi. Te sila basa sala ta tao tungga Ndia hihiin, sama leo sila nana longgak, de ta bubuluk dala kaluan. Ana ela sala leo ndiak, fo bisa natudu namemeda kasian neu basa hataholi la.
Manetualain malolen ana seli!
33 Manetualain malelan ana seli!
Ma Ndia boe pake Ndia malelan fo tao dede'a malole.
Ta hambu hataholi fo bisa nalelak tebe-tebe Ndia.
Ta hambu hataholi fo bubuluk tebe-tebe Ndia nakeketu dede'an.
Ta hambu hataholi esa boe fo bubuluk,
hatina de Ana tao dede'ak esa.i
34 Ta hambu hataholi fo bubuluk tebe-tebe ita Lamatuan dudu'an.
Ta hambu esa boe fo bisa nanoli-nafada neu Ndia.j
35 Ta hambu hataholi fo bisa fee hiak Manetualain buas esa.
Ta hambu hataholi fo bisa nakaseti Manetualain fo bala falik!k
36 Te basa-basan naoka neme Manetualain mai!
Basan dadi, huu Ndia!
Basa hata fo ita taon,
na ita taon soa-neu Ndia.
Ita so'uk koa-kiok neu Ndia,
losa dodoon neu!
Tetebes leo ndiak!l