10
Tolanoo nggala ei! Au ahiik hata soa-neu hataholi Israel asa? Au hule-haladoi fo suek ela Manetualain nasala'e nala sala leme sila sala-singgon nala mai. Mete ma ana dadi leo ndiak, na, bei fo au daleng namahoko!2 Au bisa afada dede'ak ia la'e-neu hataholi la hada-tataon: ala manggate nau tungga Manetualain. Mae ala manggate leo ndiak, tehuu ta bubuluk dala teteben. 3 Huu sila ta bubuluk dala sodak teteben, fo mana tao hataholi bisa malole lo Manetualain, de ala soi sila dala hehelin nala fo sangga soba-soba malole lo Ndia. No leo ndiak, na ala ta nau lamanene leu Ndia.
4 Mete ma hataholi kada tao tungga Heti-heuk, fo suek Manetualain simbok kasa, na, ndia bei ta dai. Huu ndia de Karistus tao natetu basa Manetualain Heti-heun, fo ela ita bisa malole to Manetualain. Boe ma hatematak ia, basa hataholi fo lamahele leu Karistus bisa malole lo Manetualain.
Manetualain nau nasala'e nala basa hataholi leme sila sala-singgon nala mai
5 Naa, makahulun ba'i Musa natudu dalak nai Susula Malalaok, fo hataholi bisa malole lo Manetualain, sadi ala tao tungga basa Heti-heuk kala. Ana sulak nae, “Hataholi mana tao tungga basa Heti-heuk kala, na, dei fo ala hambu sodak tetebes.”a
6 Tehuu Manetualain Susula Malalaon natudu dala fe'ek boe nae, hataholi bisa malole lo Manetualain, sadi ala lamahele leu Karistus. Nana sulak nae, “Boso matane mae, ‘See bisa hene neni nusa sodak neu?”’ (Ndia nonook leo hataholi sangga hene neu nafada Karistus nae, ita hataholi tahiik Ana konda mai fo nasala'e nala ita). 7 Susula Malalaok boe nana sulak nae, “Hahae matane mae, ‘See nau konda neni Bolo Naraka neu nai mamana hataholi mana matek kala?”’ (Ndia nonook leo hataholi sangga konda neu fo noo falik Karistus neni lain mai neme Ndia mamaten mai, fo Ana nasala'e nala ita.)
8 De leo bee, te nai Manetualain Susula Malalaon boe nana sulak nae, “Manetualain hehelun nai o matam so! Te heheluk ndia nai o bafam ma o dalem.” Ita tafada heheluk ndia neu hataholi ndia so tae, “Mete ma o sangga masoda, na, o musi mamahele muu Karistus!”b 9 Mete ma o manaku pake o bafa hehelim mae, “Yesus ndia, na au Lamatuang,” ma o mamahele nai o dalem mae, Manetualain tao nasoda falik Yesus Karistus neme mamaten mai so, na, Manetualain nasala'e nala o muma o sala-singgom mala mai. 10 Mete ma o pake o dalem fo mamahele Karistus, na, Manetualain kee-dede nala o dadik hataholi dale ndoos fo malole mua Ndia. Ma mete ma o pake o bafam fo manaku mae, Yesus dadik o Lamatuam fo naena haak palenda o, na, Manetualain nasala'e nala o muma o sala-singgom mala mai. 11 Nai Manetualain Susula Malalaon nana sulak nae, “Hataholi fo namahele neu Manetualain, na dei fo ta hambu mamaek, te Manetualain sangga tao basa dede'ak kala fo Ana kokolak kana so, ala dadi.”c 12 Hataholi Yahudi la, ma hataholi ta Yahudi la, leo esak. Ta hambu mana fe'ek. Hambu kada Lamatuak esa, ma Ana dadik Lamatuak neu basa hataholi nusak kala. Ana nau natudu dale malolen makadotok neu basa hataholi fo mana noke Ana tulu-fali sala. 13 Te nai Susula Malalaok nana sulak nae, “Basa hataholi la mana noke Manetualain tulu-fali sala, na dei fo Ana nasala'e nala sala leme sila sala-singgon nala mai.”d
14 Tehuu hataholi ta bisa noke tulu-falik neme hataholi esa mai, mete ma ala bei ta lamahelen. Ma ala ta bisa lamahelen, mete ma ala bei ta lamanene litak la'e-neu ndia. Ala ta lamanene ndia, mete ma ta hambu hataholi nafada sala. 15 Ala ta bisa lafada hataholi, mete ma ta hambu mana nadenu sala. Nai Susula Malalaok nana sulak nae, “Mete ma hambu hataholi mai neni hala malole, na, sila mamain ndia, lolen ana seli!”e
16 Tehuu ei bubuluk so mae, hambu hataholi Israel luma ta nau lamanene Manetualain Hala Malolen. Sama leo Manetualain mana kokolan Yesaya sulak nae,
“Lamatuak ei!
Hataholi la ta nau lamahele heheluk
fo ala lamanenen neme ai mai so!”f
17 De mete ma see nau namahele neu Manetualain, na, musi namanene Ndia Dede'a-kokolan dei. Ma mete ma see nau namanene Manetualain hehelun, na, musi namanene la'e-neu Karistus dei.
18 Au atane sudik leo iak: fama ei dudu'a mae, hataholi Israel asa ta lamanene litak la'e-neu Karistus, do? Neu ko ala lamanene so! Sama leo nana sulak nai Manetualain Susula Malalaon neme makahulun mai nae,
“Manetualain mana kokolan nala hehelun la'e-neu Manetualain
nakambela nai dae-bafok katematuan so;
Sila dede'a-kokolan nala
losa nai dae-bafok bu'un nala so.”g
19 Au sangga atane dede'ak esa bali ae, “Hataholi Israel asa tala bubuluk Manetualain dalan, do?” Ba'i Musa ndia, na hataholi sososak fo ana sulak la'e-neu dede'ak ndia nae, Manetualain nafada hataholi Israel asa leo iak:
“Au sangga tao dede'ak esa
soa-neu hataholi nusa fe'ek kala.
Dede'ak ndia dei fo ana tao nala ei dale hedi.
Ma Au sangga tao dede'ak esa,
soa-neu hataholi fo ei taok kana leo nggoak.
Dede'ak ndia dei fo ana tao nala ei mamenggu nisik.”h
20 Nai fai makabuin, ba'i Yesaya sulak manggaledok la'e-neu hataholi ta Yahudi nae,
“Hambu hataholi fo makahulun tana nasanggak Au,
tehuu ala latonggo lo Au so.
Hambu hataholi fo makahulun tana noke fo nita Au,
tehuu Au atudu Au aong neu sala so.”i
21 Tehuu la'e-neu hataholi Israel asa, Manetualain nafada sala so leo iak:
“Leledo-le'odaen, Au akambembela Au limang,
fo ahani taa-taa hataholi Israel asa leni Au mai.
Tehuu tala nau lamanene Au,
ma sila boe lahiik laban Au.”j