Manetualain hele nala hataholi Israel asa
9
Ita fo nana mba'ak to Karistus, kokolak ndoos. De au ta kokolak pepekok neu ei. Au daleng boe nafada au nae, Manetualain Dula-dalen heti au daleng. 2-3 Au afada leo iak: au daleng hedis. Au ameda mabela leo ndiak, na, huu au asaneda au hataholi heheling. Te au nau fo au hataholi nusa Yahudi nggalaa boe oo nana mba'ak no Karistus, tehuu no'uk kala ta lamahele leu Ndia. Leo au bisa soi dalak fee sala, na au ahehele oke fo Manetualain huku au nggati sala. Ma au boe ahehele oke fo Manetualain tao kofe'e au ua Karistus, suek au hataholi nggala bisa nana mba'ak lo Ndia. 4 Naa te hataholi la sila, hataholi Israel, fo sila hataholi nusak esa fo ua-nalen nala neulau hiak. Manetualain so'u nala sala dadik neu Ndia anan nala leme lele uluk mai. Ana natudu Ndia koasa ina-huun ndia, neu sala. Ana mba'a heheluk mata-matak no sala. Ana fee Ndia Heti-heun neu sala. Sila lakaluku-lakatele lalelak leu Ndia, ma ala ono-lau Ndia. Ana helu so fo sangga natudu Ndia dale malolen neu sala.b 5 Ala konda leme ai bei-ba'in nala mai, fo ndia: ba'i Abraham, ba'i Isak, ma ba'i Yakob (hataholi la pake nade ‘Israel’ neme ndia naden mai). Ma Karistus, fo Manetualain helu memak neme makahulun mai so, fo sangga nadenun mai ndia, fo konda neme ita hataholi nusa Yahudi bei-ba'in nala mai. Karistus ndia boe, na ndia Manetualain fo mana palenda basa-basan. De nandaa, mete ma hataholi la so'uk koa-kiok neu Ndia losa dodoon neu. Tetebes!c6 Mae hataholi Israel asa no'uk bei ta simbok Karistus, tehuu hataholi ta bisa kokolak lae, Manetualain hehelun ndia ta dadi. Te boso mae hetuk, basa hataholi fo mana konda leme bei-ba'i Israel sila mai, sila Manetualain enan, do? Taa! Kada luma leme sila mai fo Manetualain hele nala Ndia enan, dadik hataholi nusa Israel tetebes. 7 Conto leo, hataholi no'uk kala konda leme ita ba'in Abraham mai. Tehuu sila basa sala ta Abraham numbu-sadun fo Manetualain hele nala sala. Te Manetualain nafada Abraham nae, “O numbu-sadum mala fo Au alelak kasa, kada sila fo konda leme o anam Isak mai.”d
8 Ndia sosoan nae, neme makahulun mai losa hatematak ia, ta basa numbu-saduk mana konda leme ita ba'in Abraham mai, fo dadik leu Manetualain anan nala. Kada numbu-saduk fo leme Manetualain hehelun neu Abraham, na ndia sila fo Manetualain tao dadik neu Ndia ana teteben nala. 9 Tehuu Manetualain mba'a heheluk no Abraham nae, “Meda teu mana maik, Au fali maing. Neu faik ndia, o saom Sara bonggi ana tou anak esa so.”e
10 Ta kada leo ndiak. Te ita ba'in Isak no ndia saon Ribka bonggi nala kakana kaduak. 11-12 Neu faik fo Ribka bei ta bonggi nala sala, ala bei ta tao dede'a malole do dede'a manggalauk. Mae leo ndiak, tehuu Manetualain nafada memak neu Ribka la'e-neu kakana kaduak fo ana kalua nakahuluk nae, “Dei fo ka'ak tao ues fee ndia fadin.” Manetualain nafada leo ndiak, fo natudu nae, mete ma Ana hele nala hataholi esa, na, Ana bubuluk so, Ana sangga pake hataholi ndia fo taon leo bee. Basa de Manetualain hele nala fadik ndia, fo dadik neu Ndia hataholin. Ana ta nahani sangga nita fadik nau tao leo bee, huu Manetualain bubuluk memak so.f 13 Te Manetualain kokolak nai Ndia Susula Malalaon la'e-neu kakana kaduak sila nae,
“Au hele ala Yakob,
tehuu au timba heni Esau.”g
14 De ita sangga tae hata bali? Fama hambu hataholi fo nau kokolak nae, “Manetualain naketu dede'ak ta no ndoos?” Ta bisa! 15 Makahulun ele Manetualain nafada ba'i Musa nae,
“Au aena haak atudu namemeda kasian neu hataholi fo Au mesa nggau hele alan.
Ma Au aena haak atudu dalek neu hataholi fo Au mesa nggau tudu alan.”h
16 Manetualain hele nala hataholi dadik Ndia enan, ta huu tungga hataholi ndia hihiin do, ndia tatao-nono'i malolen. Tehuu Manetualain hele nala hataholi huu tungga kada Ndia namemeda kasian. 17 Nai Susula Malalaok Manetualain kokolak no mane Masir nae, “Au so'u ala o dadik manek, huu Au nau pake o, fo o matudu Au koasang neu hataholi no'uk. No leo ndiak, na basa hataholi malai dae-bafok ia bisa soso'uk Au nadeng.”i
18 De mete ma Manetualain sangga natudu Ndia namemeda kasian neu hataholi esa, na, kada Ana taon. Ma mete ma sangga tao hataholi esa dale batuk, na, kada Ana taon.j
Manetualain bisa natudu namemeda kasian, tehuu Ana ta simbok manggalauk
19 Naa! Leo hambu hataholi sapa au nae, “Mete ma leo ndiak, na, Manetualain sangga tao hata esa, na see bisa laban Ndia? Ta hambu, hetu? Hatina de Ana soli salak neu ita? Ndia namabela seselik!”
20 Mete ma hambu mana dudu'a leo ndiak, na, au ataa leo iak: “O dudu'a mae o ia, see?! O sangga kokolak laban Manetualain, do?” Boso leo ndiak! Te nai Manetualain Susula Malalaon nana sulak nae, “Mete ma o tao hata esa, na, neme bee mai hata ndia dei fo natane nasafali hataholi mana taok ndia nae, ‘Hatina de o tao mala au leo iak!?”’k 21 Conto leo tukan mana tao ulek. Neme dae manu teik bubuak esa, de ana naena haak, fo sangga tao nggusi manggadilak esa, suek hataholi koan. Ndia boe naena haak pake dae bubuak ndia fo tao mamana kadafuk esa, tungga kada ndia hihiin.
22 Leo ndiak boe no Manetualain. Ana naena haak fo tao tungga Ndia hihiin. Ana nau natudu neu basa hataholi la nae, Ana luli, ma ta simbok hataholi tatao manggalauk sudi hata. Ndia boe nau fo hataholi bubuluk lae, Ndia naena koasa makadotok, ma naena haak boe fo nggale loak neu hataholi tatao manggalaun mata-matak. Tehuu hataholi mana tao manggalauk kala sila, kada lahani ndia fain fo lakalulutuk heni sala. 23 Ana tao leo ndiak, fo sangga natudu neu hataholi no'uk kala nae, Ana sangga natudu Ndia namemeda kasian neu hataholi luma. Sila ndia, fo Ana hele nala memak kasa so, fo sangga so'u dema-demak kasa. Ma Ana nau hataholi la bubuluk lae, Ndia mesak kana ana seli. 24 Te ita ia, fo Ana hele nala memak so, suek dadik neu Ndia hataholin nala. Ita ia, luma leme hataholi Yahudi la mai, ma luma leme hataholi nusa fe'ek kala mai boe. 25 Makahulun Manetualain pake mana kokolan Hosea, fo sulak la'e-neu hataholi ta Yahudi la nae,
“Hambu hataholi fo makahulun ta Au hataholing,
tehuu Au sangga oke sala ae,
‘Ei ia, Au hataholing.’
Ma hambu hataholi nusak fo makahulun Au ta sue sala,
tehuu Au sangga oke sala ae,
‘Ei ndia, hataholi nusak fo Au sue.”’l
26 Ndia boe sulak nae,
“Nai ndia,
nai mamanak fo Manetualain nafada sala nae,
‘Ei ndia, ta dadi Au hataholing!’
Dei fo Manetualain Masodak nau nafada sala nae,
‘Hatematak ia ei dadik Au ana nggala so!”’m
Ana kokolak nae leo ndia, huu Ana kasian neu hataholi ta Yahudi la.
27 Manetualain mana kokola fe'en, fo Yesaya, eki nitak la'e-neu hataholi nusa Israel nae,
“Mae hataholi Israel asa dadik makadotok,
sama leo salaek manai tasi bifin,
tehuu Manetualain kada tao nasoda sila luma,
neme sila sala-singgon nala mai.
28 Te dei fo ndia fain ana mai,
fo Manetualain naketu basa hataholi manai dae-bafok katematuan dede'an nala,
sama leo nafada memak so.
Tehuu Ana ta nahani nala dook,
te Ana tao nalan no lai-laik!”n
29 Makahulun ele, Yesaya boe nafada la'e-neu hataholi Yahudi la nae,
“Ita ua-nalen neulauk,
huu Manetualain fo Mana Koasa Nai Lain seli,
ela ita numbu-sadun nala luma lasoda.
Te mete ma ta leo ndiak, na, ita mana basak so,
sama leo kota Sodom ma kota Gomora.”o
Hala Malole feen neu hataholi nusa Israel fo ta nau lamanene Manetualain
30 De ita sangga tae hata bali? Lae, hataholi ta Yahudi la sudi leme bee mai, fo makahulun ta lasanggak fo nau malole lo Manetualain, na, hatematak ia ala malole lo Ndia so, huu ala lamahele leu Yesus Karistus. 31 Naa te hataholi Israel asa, soba tao tungga Musa Heti-heun so, de ala bisa malole lo Manetualain, tehuu ta dadi boe.
32-33 Hatina de ala ta bisa malole lo Manetualain? Huu kada ala sangga tao tungga Heti-heuk, fo ela Ana simbo nala sala leo hataholi dale ndoos, tehuu ala ta lamahele leu Yesus Karistus. De ndia nonook leo ala lakatunu la'e “batu nakatunuk”. Ia Manetualain Susula Malalaon maksut nae,
“Mete ia dei!
Au tao Hataholi esa
nai lete Sion, nai kota Yerusalem.
Hataholi ndia sama leo batu,
fo tao hataholi nakatunu.
Tehuu see namahele neu Ndia, na,
boso mae.”
Naa. Batu ndia, na ndia Yesus. Tehuu hataholi Israel asa timba heni Ndia. Ndia sama leo ala lakatunu, de ala tuda huu batu ndia.p