3 Mae ita tao tungga Musa Heti-heun, tehuu ndia ta bisa nakambo'ik ita teme sala-singgok koasan mai, huu ita kada hataholi basa faik, fo tao salak takandoo. Tehuu Manetualain soi dala kaluan. Ana nadenu Ana hehelin fo dadik neu hataholi basa faik sama leo ita. Mae ita hataholi basa faik fe'ek fo tao sala-singgok mata-matak, tehuu Yesus mesak kana ta tao nitak sala-singgok hata-hata. Lena-lenak bali, Ana dadik tunu-hotuk fo koka heni hataholi sala-singgon. 4 Manetualain nadenu Karistus so fo Ana mate, suek ita bisa tao basa dede'a ndoos, tungga Manetualain Heti-heun nala. De hatematak ia, ita tao dede'a tetebes sala tungga Manetualain Dula-dalen hihiin, ma ta tao tungga ita mesa nggata hihiin bali.

5 Hataholi fo lasoda tungga sila hihii hehelin nala ndia, na soda leo ndiak huu ala lalelak kada dudu'a dede'a manggalauk lakandondoo henin. Tehuu hataholi fo lasoda tungga Manetualain Dula-dalen hihiin, na sila kada lalelak dudu'a dede'ak kala fo tao namahoko Manetualain Dula-dalen. 6 Mete ma dede'a manggalauk kala heti hataholi dudu'a-a'afin, na, ndia sama leo hataholi ta nau namanene Manetualain Dula-dalen, huu ndia de tungga Manetualain, ndia dalen kamates so. Tehuu mete ma Manetualain Dula-dalen heti hataholi dudu'an, na, nasoda ndoos, ma ndia dalen ndoo-ndoo.

7 Ita hataholi hihii hehelin nala lalaba lalan seli lo Manetualain hihiin. De ita ta bisa takaseti ita aon fo tamanene Manetualain, huu ita mesa nggata ta bisa. 8 Mete ma hataholi hihii hehelin nala heti sala, na, nau do ta nau, ta bisa tao namahoko Manetualain dalen.

9 Tehuu ei ndia, hataholi fo ta masoda manggalauk tungga ei hihii hehelim mala bali. Te mete ma Manetualain Dula-dalen nasoda nai ei dalem mala, na, ei tao dede'ak kala fo tao namahoko Ndia. (Tehuu mete ma Karistus Dula-dalen ta nasoda nai hataholi dalen, na, ndia ta dadik Manetualain enan.) 10 Ei ao-mbaan dei fo ana mate, huu makahulun ei tatao salam mala. Tehuu hatematak ia Karistus nasoda nai ei dalem mala, de dei fo ei dalem mala lasoda lakandoo, huu Manetualain kee-dede nala ei, hataholi dale ndoos so, boe ma ei malole fali mia Ndia. 11 Te Manetualain ndia tao nasoda falik Yesus neme Ndia mamaten mai. De mae ita mate, mete ma Manetualain Dula-dalen nasoda nai ita dalen nala, na dei fo Ndia boe oo tao nasoda falik ita. Ndia ndandaan nae, Ana tao nasoda ita, sama leo Ana tao nasoda falik Karistus so.^a

12 De leo iak tolanoo nggala ei! Ita kahutak. Ta hutak fo tasoda tungga ita hataholi hihiin, tehuu hutak fo tasoda tungga Manetualain hihiin. 13 Mete ma ita tasoda tungga kada manggalauk manai ita dalen nala, na, neu ko Manetualain nau heok nasadea ita, ma huku mate ita! Tehuu mete ma ita ela Manetualain Dula-dalen tao nakalulutu sala-singgok koasan manai ita dalen nala, na, bei fo ita bisa tasoda ndoos.

14 Hataholi fo namanene neu Manetualain Dula-dalen fo Ana heti sala, na sila ndia, Manetualain anan nala. 15 Mete ma ita ela Manetualain Dula-dalen heti ita, na, Ana ta tao ita dadik leo ata fo tasoda to bibiik. Makahulun, ita leo ndiak. Tehuu no ita simbo tala Manetualain Dula-dalen fo heti ita so, de ita bubuluk tae ita dadik Manetualain anan nala so. Huu ndia de neu ko Ana nau namanene, mete ma ita token tae, “Ama bonggik!”^b

16 Ita dale hehelin nala lafada lae, ita dadik Manetualain anan nala. Ma Manetualain Dula-dalen boe nafada leo ndiak. 17 Mete ma ita dadik teu Manetualain anan nala, na, ndia ndandaan nae, dei fo ita simbo tala Ndia pusakan, huu Ana dadik neu ita Aman. Basa dei fo, mete ma Amak fee pusaka neu Anan Karistus, na, ita boe oo simbo pusaka ndia sama-sama to Karistus. Tehuu hambu dedeak esa bali: ita musi hambu doidosok sama leo Karistus boe hambu doidosok, fo ela Manetualain dei fo so'u dema-demak ita, sama leo Ana so'u dema-demak Karistus so.^c

18 Tehuu tungga au, na doidosok fo ita hambun hatematak ia sosoan taa, mete ma takasasaman no dede'a namahokok fo dei fo Manetualain feen neu ita nai nusa sodak. 19 Naa te basa hata fo Manetualain taon nai lalai ma nai dae-bafok so, lahani taa-taa ma dokodoe fo nau lita Ana natudu ana teteben nala, na, sila see. Te Ana nau natudu sala no dale namahokok. 20 Huu Manetualain nakadadadik lalai ma dae-bafok no basa isin nala, fo tao tungga Ndia maksut. Tehuu ta dadi leo ndiak. Memak dae-bafok basa isin nala nau, tehuu tungga Manetualain hihiin, na Ana huku basa sala, ma ela sala lakalulutuk. Mae leo ndiak boe, tehuu bei hambu namahenak.^d 21 Hatematak ia, basa hata fo Manetualain taok ndia lakalulutuk so, ma ta hambu dala kaluan. Tehuu dei fo Manetualain nau mbo'i heni sala, fo ta lakalulutuk bali, tehuu ala dadik beuk ma neulauk tungga Ndia maksut. Ndia boe nau so'u dema-demak Ndia anan nala, fo sila boe lakambo'ik leme makalulutuk kala mai.

22 Te ita bubuluk so tae, hambu to'a-taak ma doidosok no'uk nai dae-bafok ia. Neme makahulun mai losa hatematak ia, basa hata fo Manetualain taok ndia, langgahuhu'u lameda hedis, neu faik fo lahani taa-taa fo Manetualain tao basan dadik beuk. Ndia sama leo inak nahohoo nameda hedis, neu faik fo nahani taa-taa fo sangga bonggi anan. 23 Ta kada dae-bafok mesak kana nahani taa-taa, tehuu ita boe oo tahani taa-taa leo ndiak. Manetualain fee nakahuluk Ndia Dula-dalen neu ita so. Mae leo ndiak boe, tehuu ita bei tahohoo nai ita dalen nala. Te ita tahehele taa-taa fo tahani Manetualain so'u nala ita dadik teu Ndia ana teteben nala, ma mbo'i ita aon nala teme basa makalulutuk kala mai.^e

24 Neu faik fo Manetualain nasala'e nala ita, Ndia boe nafada nae, dei fo Ana taon leo bee. Tehuu hatematak ia, ita bei tahani taa-taa dede'ak fo bei ta dadi. Mete ma dede'ak fo ita tamahenak dadi so, na, ita ta paluu tahani so bali. Huu hataholi ta nahani taa-taa dede'ak mana dadik so, hetu? 25 Tehuu mete ma ita tahani taa-taa dede'ak fo bei ta dadi, na, ita bei bisa tahele to nggale loak.

26 Leo ndiak boe, neu faik fo ita bei tahani taa-taa, na Manetualain Dula-dalen boe fali nala ita, huu ita ta balakaik, ma ta hule-haladoi talelak no teteben. Tehuu Manetualain Dula-dalen mesak kana hule-haladoi nggati ita, suek kada ita tahohoo, ma ta bubuluk hule-haladoi pake dede'a de'ek hata. 27 Manetualain mesak kana bubuluk basa hata fo ita sangga kokolak nai ita dalen. Ndia boe bubuluk Ndia Dula-dalen dudu'an. Huu ndia de Ana bubuluk basa dede'ak kala, fo Ndia Dula-dalen sangga kokolak fo fali nala ita. Te Manetualain Dula-dalen dudu'an, sama leo Manetualain mesak kana dudu'an. Ma Ndia Dula-dalen hule-haladoi neu Manetualain, fo noke Manetualain fali nala hataholi kamahelek kala. Te Ndia Dula-dalen huhule-haladoin tungga Manetualain hihiin.

28 Hatematak ia ita bubuluk so leo iak: Manetualain tao nala basan dadik malole neu hataholi mana sue Ndia. Te neme lele uluk mai Manetualain heti memak basan tungga Ndia hihiin soa-neu hataholi fo Ana noke nalan dadik Ndia enan. 29 Makahulun ele, Ana nalelak kasa so, ma Ana hele nala memak kasa fo tao nala sala lamata-ao sama leo Ndia Anan, fo ndia Karistus. Te Karistus fo ana uluk, ma fe'ek kala dadik Ndia fadin. 30 Manetualain nalelak hataholi sila neme lele uluk mai so, de noke nala sala, suek dadik leu Ndia hataholin nala. Ma hataholi la sila fo makahulun kasalak kala, Ana tao nala sala dadik hataholi dale ndoos, fo ala malole fali lo Ndia. Ma Ndia boe so'u dema-demak kasa.

31 De ita sangga tae hata bali la'e-neu dede'ak kala sila? Manetualain nanea mate-mate no ita. De mete ma leo ndiak, na, see bisa laban ita bali? Ta hambu, hetu? 32 Manetualain ta nakalelee nala Ndia Ana hehelin. Tehuu Ana fee Ndia Anan mate dadik neu tunu-hotuk, suek fali nala ita basa nggata. Huu Manetualain tana nakalelee nala Ndia Anan faa boe, de ita bubuluk tae, neu ko Ana fee hiak ita basa dede'a malole la. Tetebes, hetu?

33 Mete ma hambu hataholi fo soli salak neu hataholi la fo Manetualain hele nalak kala so, na, ndia sosoan taa. Te Manetualain mesak kana kee-dede nala ita dadik hataholi dale ndoos so, fo ta hambu sala-singgon nala so bali, suek ita malole to Ndia.

34 Mete ma hambu hataholi soli salak neu hataholi la fo Manetualain hele nalak kala so nae, “Manetualain musi huku ei,” na, soli salak ndia sosoan taa. Te Yesus Karistus maten so. Nakalenak bali, Manetualain tao nasoda fali kana neme Ndia mamaten mai. Basa de Manetualain so'u nala Ndia, fo nanggatuuk neu mamana nana hadak nalan seli nai Ndia boboa konan. Nai ndia, Ndia boe hule-haladoi taa-taa fee ita.

35 Mete ma hambu hataholi do, dede'ak do, fo soba nakaseti Karistus fo tana sue ita bali, na, nakasetik ndia sosoan taa. Te mae ita hambu dede'ak do, toto'ak do, doidosok do, ndoes do, balo'as taa do, hambu soe do, hataholi sangga nakanisa do, tehuu Karistus sue nahele ita. Ta hambu esa boe fo bisa ana tao nala Ndia hahae sue ita! 36 Nai Manetualain Susula Malalaon nana sulak nae,

37 De mae ita hambu toto'ak leo beek boe, tehuu ita senggi so, huu Karistus sue nala ita ana seli!

38 Au bubuluk teteben so leo iak: ta hambu dede'ak esa boe fo bisa tao Manetualain hahae Ndia susuen neu ita. Mae ita tasoda do, mate do, hambu ata nusa sodak do, mana to'u palenda do, hambu koasa do, dede'a hatematak ia do, dede'a mana maik do, 39 koasa manai lalai do, koasa manai dae-bafok do, bua fe'ek fo Manetualain tao nala sala so -- ta hambu esa boe oo bisa tao kofe'e ita teme Manetualain mai, fo tao nala Ndia ta sue ita bali! Huu ita nana mba'ak to ita Lamatuan Yesus Karistus, fo Manetualain nadenun mai so.