2 Au ha'i conto neme sao touk ma sao inak heti-heun mai. Mete ma inak esa sao tungga heti-heuk, na, dua sala sao losa mate. Tehuu mete ma saon maten so, na, ina falu ndia ta nana mba'ak no heti-heuk ndia so bali. Ndia bole sao seluk. 3 Tehuu mete ma ana sao no hataholi fe'ek, naa te saon bei kasodak, na, tungga heti-heuk, ana hohongge ndia so. Tehuu mete ma saon maten so, na, heti-heu sasaok ta la'e ndia so bali. Ana nakambo'ik ndia so. Ma mete ma ana sao hataholi fe'ek, na, tungga heti-heuk ana ta hohongge.

4 Leo ndiak boe no ei kamahelek kala! Karistus maten so. Ndia sama leo ei boe oo mate no'u mia Ndia, ma la'o ela ei soda laam. De hoholo-lalanek heti-heun ta la'e ei so bali. Hatematak ia ei makambo'ik mima heti-heuk ndia mai, ma nana mba'ak mia Karistus, fo mana nasoda fali neme Ndia mamaten mai so. Dede'ak ia, sama leo ina falu mana sao seluk. Dede'an ta so. De hatematak ia, basa hata fo ei taok ndia soa-neu Manetualain.

5 Te makahulun ita kada tao tungga ita aon hihiin. Huu ita talelak heti-heuk, de ndia tao nala ita tahiik soba la'o lena heti-heuk kala sila, fo tao dede'a ta ndoos. Naa! Ita salan ndia, tao nala Manetualain heok nasadea ita. 6 Makahulun ita musi tao tungga heti-heuk. Tehuu hatematak ia heti-heuk ndia ta la'e ita bali, te ita mbo'i heni ita soda laan so. Tungga dala laak hihiin, na, Musa heti-heun fo nana sulak nai Manetualain Susula Malalaon nana mba'ak no ita. Tehuu tungga dala beuk hihiin, na ita takambo'ik teme heti-heuk ndia mai so. Te Manetualain Dula-dale Malalaon heti ita! Huu ndia de hatematak ia, ita kada tao ues soa-neu Manetualain.

7 De ita sangga tae hata? Fama ita dudu'a tae, “Heti-heuk fo Manetualain fee neu Musa ndia, sala!” Taa! Te kada Manetualain Heti-heun bisa tulun au fo bisa bubuluk basa dede'a ndoos, do ta ndoos. Conto leo heti-heuk esa nae, “Boso mahiik ha'i mala hataholi hatan.” Tehuu neme bee mai au bubuluk ahiik mata leo ndiak sala, mete ma au ta bubuluk ndia heti-heun? Ta bisa!^a 8 Tehuu heti-heuk ndia le'a-nole nala dede'a manggalauk kala manai au daleng, losa au ahiik soba la'o lenan, fo ndia au ahiik ha'i ala hataholi fe'ek enan mata-matak. Mete ma ta hambu heti-heuk fo ka'i, na, salak manai hataholi dalen ta naena koasa fo heti hataholi.

9 Nai au soda makahulung, au ta bubuluk Manetualain Heti-heun. Dook bei fo au bubuluk Ndia Heti-heun, ma faik au ameda ae, au la'o lena Heti-heuk ndia, ma tao salak. Faik au tao salak leo ndiak, na, au hambu huhuku mates. 10 Boe ma au daleng nakalulutuk, te au bubuluk ae, au mesa nggau ta bisa malole ua Manetualain, huu kada tao tungga Ndia Heti-heun. Au andaa hambu Manetualain nasan, fo ndia huku mate, huu au la'o lena Ndia Heti-heun so. Naa te Heti-heuk ndia nana taok, fo suek tao nala hataholi bisa lasoda ndoos. Tehuu soa-neu au, Heti-heuk ndia tao nakalulutu au, de tao nala Manetualain nasadea au. 11 Heti-heuk ndia memak natudu dala sodak tetebes. Tehuu hambu manggalauk nasoda nai au daleng dale, de au kedi seluk au ao heheling, fo dudu'a ae, au bisa malole ua Manetualain, sadi au tao tungga Ndia Heti-heun. Boe ma leo bali Heti-heuk ndia mesak kana tao, losa Manetualain nunute au, ma ta nau nakabubua no au.^b

12 De mete ma isinaak hataholi lae, “Heti-heuk fo Manetualain fee neu Musa ndia, sala”, na, au ataa ae, “Taa! Manetualain Heti-heun ndia malalaok!” Ma basa palenda manai Heti-heuk ndia, malalaok tebe, ma malole boe.

13 Fama ei dudu'a boe mae, Heti-heuk ndia tao nala Manetualain heok nasadea au, hetu? Taa! Te mae au bubuluk Heti-heuk ndia, tehuu au bei mbali manggalauk fo manai au daleng, losa au tao sala-singgok. Naa, au tatao salang ndia, tao nala Manetualain heok nasadea au. Heti-heuk memak malole, te ndia natudu dede'a manggalauk kala fo tao nala ita taelak dook teme Manetualain mai. De neu faik fo Manetualain natudu dala sodak tetebes, na Heti-heuk ndia tao nanggaleledo nae, dede'a manggalauk manai ita dalen nala ndia, ta malole.

14 Ita bubuluk, Heti-heuk fo Manetualain feen neu ba'i Musa, konda neme Manetualain Dula-dalen mai. Tehuu au kada hataholi basa faik, fo au daleng ta matea. De au mbali dede'a manggalauk manai au daleng fo kabook, losa au tao salak. Ndia sama leo salak dadik neu au malanggang, ma au dadik neu salak atan. 15 Au amanggonggoak. Au ta bubuluk hata fo au taon. Au ta tao tungga hata fo au nau taon. Tehuu au tao tungga hata fo au ta nau tao tungga sana.^c 16 Mete ma au tao tungga hata fo au ta nau tao sana, na, au manaku ae, Manetualain Heti-heun ndia, ndoos. 17 De au ta ndia heti au ao heheling. Te manggalauk fo mana masoda nai au daleng dale ndia heti au!

18 Au bubuluk so ae, ta hambu dede'a malole nai au daleng. Te au ia, hataholi dale manggalauk. Nau do ta nau, au ta bisa akaseti au aong fo tao ndoos. Au nau tao dede'a ndoos. Au nau, tehuu ta dadik ndoos! 19 Au ahiik tao malole, tehuu au ta tao sana. Ma au ta nau tao manggalauk, tehuu kada au taon! 20 Naa! Mete ma au tao tungga hata fo au ta nau taon, na, ndia ta huu au mesa nggau, tehuu manggalauk fo mana nasoda nai au daleng.

21 Ndia natudun leo iak: mae au nau tao dede'a malole, tehuu manggalauk manai au daleng ndia ana laban. 22 Naa te au daleng namahoko nalan seli, mete ma au dudu'a la'e-neu Manetualain Heti-heun. 23 Tehuu nonook leo hambu koasa nai au daleng ndia tao nakalulutu au. Au ahiik nau tao malole, tehuu tana dadi. Ndia nonook leo koasa fo manai au daleng, ana humu nala au fo nau nakaseti au fo kada tungga ndia. 24 Awii, kasian ee! Au ia hataholi mana doidosok! See bisa nakambo'ik au neme koasa manggalauk mana masoda nai au daleng, fo tao nala Manetualain nunute au, losa Ana heok nasadea au?

25 Tehuu, awii! Manetualain mesak kana soi dalak so fo mbo'i heni au! Makasi no'un seli neu Ndia, huu ita Lamatuan Yesus Karistus bisa nasala'e nala au! De mete ma au asoda fo tia-dea neu au aong, na au doidoso. Mae au ahiik tao tungga basa Manetualain Heti-heun, tehuu hambu koasa manggalauk manai au daleng fufudi au fo tao salak akandondoo henin.