Ita musi la'o ela ita salan nala, fo tasoda tungga Manetualain hihiin
6
De hatematak ia sangga mae hata bali? Fama ei dudu'a mae, “Manetualain nafalende heni ita sala nala so, huu Ndia dale malolen. Huu ndia de malolenak ita tao salak takandoo, fo ela dei fo Manetualain natudu Ndia dale malolen lena-lenak neu ita.” 2 Ta dadi! Ta nandaa mete ma ita tao salak takandoo, huu ita taketun so tae, ita tasadea la'o ela ita salan nala. Huu ita ta nana mba'ak to manggalauk ndia so bali, na ndia sama leo ita mate so. Te hataholi mana matek so, na ta bisa tao salak bali, hetu? Mete ma ita mate leo ndiak so, na, talo bee fo ita bisa tao salak bali? Ta bisa, hetu?3 Fama ei ta bubuluk mae, neu faik fo ita salani, na ndia dadik tanda nae, ita la'o ela ita soda laan fo dadik teu hataholi beuk, fo nana mba'ak to Yesus Karistus. Ndia sama leo ita mate no'u to Ndia. 4 Neu faik fo Karistus maten, de ala latoin. Ma neu faik fo ita salani, na ndia sama leo ita mate so fo la'o ela soda laak, de ala latoi ita. Naa, Manetualain pake koasa ina-huun fo tao nasoda falik Karistus neme mamaten mai. Amak Manetualain boe oo nahiik ita simbok Ndia koasan ndia, suek tasoda fali fo dadik hataholi beuk.a
5 Huu ndia sama leo, ita mate no'u to Yesus. De ita fo nana mba'ak to Ndia, neu ko neu dae-bafok fai babasan ita tasoda fali teme mamates mai, sama leo Ndia nasoda fali.
6 Makahulun, ita dadik hataholi mana tao salak mata-matak. Tehuu ita soda laan ndia, nakalulutuk basan so, sama leo ala mbaku mate ita nai ai ngganggek sama-sama to Karistus. Hatematak ia manggalauk manai ita dalen nala ta naena koasa fo ana heti ita so bali. Hatematak ia ita ta nana mba'ak sama leo ata, fo ta naena haak fo hele tao hata. Manggalauk nai ita dalen ta bisa nakaseti ita tao salak bali. 7 Mete ma hataholi maten so, na, ndia nakambo'ik so, hetu? Ta hambu esa boe fo bisa nakaseti ndia tao salak bali.
8 Huu ndia de sama leo ita mate no'u to Karistus, na ita tamahele tae, ita boe oo neu ko tasoda takandondoo henin to Ndia. 9 Ita bubuluk tae, huu Karistus nasoda fali neme Ndia mamaten mai, de Ana ta mate seluk bali. Te ta hambu hata esa bali naena koasa fo tao nisa Ndia. 10 Makahulun, Ana mate la'i esa so, fo koka heni salak koasan. Tehuu hatematak ia Ana nasoda fo natudu hada-holomata neu Manetualain.
11 Ei musi taok ei aom mala leo ndiak boe. Nonook leo ei mate so, huu ndia de salak ta naena koasa neu ei bali. De hatematak ia ei musi masoda fo matudu hada-holomata neu Manetualain, huu ei bei nana mba'ak mia Yesus Karistus.
12 Boso ela manggalauk manai o dalem naena koasa fo ana heti o, de kada o tungga o aom hihiin, fo tao manggalauk kala. Te neu ko o mate. 13 Ma o boso fee o ao-inam fo tao dede'a ta ndoos, te salak ndia. Tehuu kada fee o ao-inam neu Manetualain fo Ana heti o. Nonook leo o mate so, de o masoda fali. De pake o ao-inam tema-tema fo tao dede'a ndoos neu Manetualain. 14 Boso ela salak bisa heti ei, sama leo salak ndia dadik neu ei malanggam. Hatematak ia ei boso masoda tao tungga Musa heti-heun fo ei bisa malole fali mia Manetualain. Te ei masoda no ndoos, huu Manetualain natudu Ndia dale malolen neu ei. De hatematak ia Ndia dale malolen heti ei.
Ita dadik sama leo ata, fo tao ues tungga Manetualain hihiin
15 De leo bee? Fama ei dudu'a mae, “Huu ita ta nana mba'ak to Musa heti-heun bali, de ita tao salak takandoo. Te Manetualain bei nau natudu Ndia dale malolen neu ita!” Ei dudu'am leo ndiak, hetu? Au afada ei baa! Sala ndia!
16 Au ha'i conto neme malanggan no atan. Mete ma ei fee ei ao hehelim fo tao ues fee hataholi esa, na, ei musi mamanene ndia, ma tao ues tungga ndia hihiin. Huu ndia ndia, ei malanggam. Ma ei ia, ndia atan nala. Leo ndiak boe, de ei bisa hele fo tungga bee. Ei bisa hele fo tao salak, boe ma ei dadik salak atan. Tehuu mete ma ei hele leo ndiak, na ei tao ei aom dook mia Manetualain. Te ei bisa hele fo tao ndoos, ma dadik ata fo tao tungga hata fo Manetualain nadenu ei. Mete ma ei hele leo ndiak, na, ei bisa malole mia Ndia!
17 Makahulun ei ela salak heti ei, tehuu hatematak ia ei mamanene neu ei dalem dale, fo tao tungga hata fo hataholi salanik kala lanoli ei. Huu ndia de au oke makasi neu Manetualain. 18 Huu Manetualain nakambo'ik ei mima salak koasan mai, losa salak ta heti ei bali. De hatematak ia dede'a ndoos ndia heti ei.
19 Au kokolak ia, pake conto basa faik neme malanggan no atan, fo suek lofo anak ei malelak au maksut. Makahulun ei fee ei aom mala dadik ata fo tao salak, de Musa Heti-heun nae, ei dadik manggenggeok. Tehuu hatematak ia ei musi fee ei aom mala dadik ata fo kada masoda tao ndoos fo neni ei dadik malalaok nai Manetualain matan.
20 Makahulun, neu faik fo kada ei mamanene ma tao tungga salak hihiin, ei ta paluu mamanene ma tao tungga ndoon. 21 Naa, au sangga atane leo iak: Ei hambu buna-boa nanala hata fo malole neme ei tataom ndia mai? Ta hambu, hetu? Naa te buna-boak fo ei hambuk ndia, na kada ana tao nala ei mae. Huu ei tatao kasalam ndia, de sasai-main, Manetualain heok nasadea ei.
22 Tehuu hatematak ia Manetualain nakambo'ik heni ei mima malangga laak mai so, de ei ta paluu tao salak bali. Hatematak ia ei musi dadik Manetualain mana tao uen. Ndia sasai-main, na dei fo ei dadik malalaok miu Ndia, ma hambu sodak tetebes fo ta mana ketuk. 23 Neu faik fo ita tao salak, na Manetualain heok nasadea ita losa dodoon neu. Ita mate so! Tehuu Manetualain sadia dala kaluan esa neu ita. Te Ana nau fee hiak ita sodak tetebes fo ta mana ketuk. Ma ita hambu sodak ndia, mete ma ita maso dadik ita Lamatuan Yesus Karistus hataholin.