Hataholi bisa malole no Manetualain, sadi ala lamahele neu Yesus Karistus
5
Huu ita tamahele teu Manetualain, de Ana kee-dede nala ita dadik hataholi dale ndoos. Boe ma ita dalen nala dadik malalaok so, neu Manetualain, huu ita Lamatuan Yesus Karistus fo Manetualain nadenun mai, suek Ana soi dalak fo ita bisa mole-dame to Ndia. 2 Karistus natudu Ndia dale malolen neu ita leo ndiak, huu ita tamahele teu Ndia dei. Huu ndia de ita dalen nala bisa latea. Ma ita boe oo tamahoko, huu ita bubuluk tae, neu ko Manetualain sangga so'u nala ita fo tameda tungga Ndia malolen.3 Mae ita hambu toto'ak mata-matak, tehuu ita dalen nala lamahoko lakandoo. Te ita bubuluk tae, ita tanoli teme toto'ak mai, dei fo ita bisa takatataka. 4 Mete ma ita takatataka nai toto'ak, na, ndia tao nala ita ta tuda, ma ita sodan tao namahoko Manetualain dalen. Mete ma ita sodan matea lena leo ndiak, na, ndia tao nala ita namahehelen boe natea nae, dei fo Manetualain nau natudu Ndia dale malolen neu ita. 5 Mete ma ita namahehelen tean leo ndiak, na, ita ta mae. Te Manetualain fee Ndia Dula-dale Malalaon neu ita, fo ita bisa bubuluk nai ita dalen nala tae, Ana sue ita nalan seli.
6 Ana natudu susuen leo iak: Ana nadenu Karistus, fo Ana mate soa-neu ita, mae ita sodan ta mana mbali neu Manetualain, ma ita ta tabe'i tao neulalau ita aon fo malole to Manetualain. 7 Dudu'a neulalau dei! Te kada hambu hataholi luma lai dae-bafok ia fo nau mate nggati ndia nonoon fo dale ndoos. Fama hambu hataholi luma ala nau mate nggati, fo tulun hataholi dale malole. 8 Tehuu Manetualain natudu Ndia susuen fo ana seli neu ita. Huu neu faik fo ita bei tao salak, de Karistus mate nggati ita.
9 Manetualain kee-dede nala ita dadik hataholi dale ndoos fo malole to Ndia, huu Karistus tao nafaa heni daan fo Ana mate nggati ita. Naa te mete ma hambu hataholi tao salak, na, Manetualain luli. Tehuu Karistus tao leo ndiak, na ita mana tao salak, ta hambu huhukuk bali.
10 Makahulun ita mana musuk to Manetualain. Tehuu Manetualain Ana kisan maten fo nakasufu Manetualain dalen, suek ita bisa mole-dame to Ndia. De hatematak ia, ita ta mana musuk, tehuu ita talole seluk so. Huu Karistus nasoda fali so, de neu dae-bafok fai babasan Ana tao nasoda ita, fo suek ita ta hambu huhukuk ndia bali. 11 Ta kada leo ndiak! Ita dalen nala bisa lamahoko lae, “Manetualain ndia, ana seli!” huu ita nana mba'ak to Ndia. Ita bisa dadik teu Ndia hataholin, huu ita Lamatuan Yesus Karistus mate nggati ita so, fo tao ita mole-dame to Manetualain.
Mete ma ita takasasama Adam no Karistus, na, hambu sama, ma hambu fe'ek
12 Neme lele uluk mai, na hataholi sososak ndia ba'i Adam, fo ana mulai tao salak. Huu ndia de Manetualain ta ela ndia nasoda nakandoo. Basa de mulai neme faik ndia mai, basa hataholi manai dae-bafok ia tao salak tungga leo ndiak. Ma huu ala tao salak sama leo ndia, de sila basa sala boe oo musi mate leo ndiak.a 13 Lele uluk, neu faik fo Manetualain bei ta nakonda Ndia Heti-heun nala, hataholi la tao salak nai dae-bafok katematuan. Tehuu Heti-heuk bei ta, de ta hambu hataholi sala nala nana hinggak. 14 Neme ba'i Adam mai losa ba'i Musa, simbok Manetualain Heti-heun, de neu ko basa hataholi la musi mate. Mae sila ta la'o lena Manetualain palendan, fo Ana feen neu Adam, tehuu ala bei tao salak fe'ek mata-matak. Huu ndia de ala musi mate, sama leo Adam boe.
Naa, mete ma ita takasasama ba'i Adam no Lamatuak Yesus, na, hambu sama, ma hambu fe'ek. Te Adam boe oo sama leo salaok esa, fo ana natudu Yesus mata-aon, de neu ko ana sadu mai. 15 Tehuu Adam tatao salan, ta sama leo Yesus tatao malolen neu ita. Te hataholi esak fo Adam ia la'o lena Manetualain palendan. Huu ndia de basa hataholi la musi mate. Tehuu Hataholi esak ia bali, fo ndia Yesus Karistus tao malole mata-matak fee ita, ma ta nahani hataholi bala Ndia malolen. Hata fo Ndia taon dai neu basa hataholi la, te Manetualain nahiik tao malole fee ita. 16 Manetualain fee ita ndia, na fe'ek no salak fo Adam tataon ndia. Neu faik fo ana tao salak, boe ma Manetualain naketun nae, “O sala so. De o musi hambu huhukuk!” Tehuu mae hataholi tao salak makadotok, huu Manetualain palisak basa hataholi sodan nala, tehuu Ana bei nau natudu Ndia dale malolen, de naketu nae, “Au kee-dede ala o ta kasalak. De hatematak ia o makambo'ik, ma o ta hambu huhukuk so bali. Mai fo malole falik mua Au!” 17 De hataholi esak, fo Adam ia, tao salak, huu la'o lena Manetualain palendan. Huu ndia de hatematak ia, basa hataholi musi mate. Tehuu Hataholi esak ia bali, fo Yesus Karistus, tatao malolen, de ita bisa malole to Manetualain. Ndia sama leo Ana fee hiak ita buas esa. Ana nau fee hada-holomata neu ita, fo ita bisa tasoda sama leo ita dadik teu Manek nonoon nala.
18 De hataholi esa tao salak, na ana soi dalak fo basa hataholi la musi nana husik leme Manetualain matan mai. Tehuu neme Hataholi esak ia bali tataon tetebes fo Ana soi dalak, suek basa hataholi la bisa malole bali lo Manetualain, de lasoda tebe-tebe lo Ndia. 19 Au maksut leo iak: Adam ndia, na hataholi esa fo ta nau namanene neu Manetualain, boe ma ana la'o lena Ndia palendan. Ma hataholi no'uk boe tungga tao salak sama leo ndia. Yesus ndia, na Hataholi esa fo namanene neu Manetualain, de Ana tao tungga Ndia hihiin. Ndia ndia soi dalak, suek hataholi no'uk kala bisa malole fali lo Manetualain.
20 Manetualain nakonda Ndia Heti-heun neu ba'i Musa, fo hataholi la bubuluk tebe-tebe, bee ndia sala. Tehuu sudi nai bee hataholi salan boe namano'u, de nai ndia boe oo Manetualain natudu Ndia dale malolen no'uk. 21 Makahulun, manggalauk manai hataholi dalen naena koasa fo ana heti sala, losa ala tao salak, fo nenenin huku mate. Tehuu hatematak ia, tatao malole fo ita Lamatuan Yesus Karistus taok ndia, na Manetualain paken fo natudu Ndia dale malolen neu ita. Ma tatao malole ndia naena koasa fo heti ita, de ita malole to Ndia takandondoo henin.