Conto neme ba'i Abraham mai. Ana malole no Manetualain, huu namahele neu Ndia
4
De ita bisa ha'i conto neme hataholi Yahudi la bei-ba'in Abraham sodan mai, ndia natudu ita fo bisa malole to Manetualain, kada nesik tamahele teu Karistus.2 Ita bubuluk so, neu faik fo Manetualain kee-dede nala Abraham dadik hataholi dale ndoos, ta huu Ana nita Abraham tatao malolen. Mete ma Manetualain kee-dede nala Abraham dadik hataholi dale ndoos tungga ndia tatao malolen, na, ana bisa koao nai hataholi matan. Tehuu ita bubuluk tae, Abraham tao salak boe, de ana ta bisa koao nai Manetualain matan. 3 Sama leo nana sulak nai Manetualain Susula Malalaon nae,
“Huu Abraham namahele neu Manetualain,
de Manetualain kee-dede nala ndia dadik hataholi dale ndoos fo malole no Ndia.”a
4 Hataholi mana tao ues, na ana simbo ndia nggadin. Nggadin ndia ta doi parseen, tehuu doik fo malanggan nggati neu hataholi ndia sosotan. Te hataholi mana tao ues, haak ndia. 5 Manetualain naena haak nae, hataholi fo namahele neu Yesus Karistus, na bisa ana malole fali no Ndia, mae makahulun hataholi ndia tao salak so, ma tana mbali Manetualain. Ta hambu dede'ak esa fo hataholi bisa taon, fo ana malole no Manetualain. Hataholi musi namahele neu Yesus Karistus, bei fo Manetualain kee-dede ndia dadik hataholi dale ndoos, ma Ana simbo nala ndia.
6 Mane Dauk boe nafada nae, hataholi fo dalen namahoko neu ledo-eik Manetualain kee-dede sala nae, sila ndia, hataholi dale ndoos, mae tala tao hata esa boe. Te Dauk sulak nae:
7 “Mae hataholi la ia la'o lena Manetualain Heti-heun,
tehuu Ana koka heni sila sala-singgon nala so.
Huu ndia de sila ndia mana hambu nanalak no'un seli!
Hataholi mana tao manggalauk kala,
Manetualain nafalende heni sila sala-singgon nala.
8 Te mete ma Manetualain ta hingga hataholi la sala-singgon nala,
na, hataholi la sila hambu nanalak tetebes!”b
9 Naa, fama ei dudu'a mae, kada hataholi Yahudi la nana sunat fo bisa hambu nanalak, na ala malole lo Manetualain, do? Ma hataholi nusa fe'ek fo ta nana sunat, na ta bisa, do? Taa! Dudu'a leo ndiak, sala ndia! Huu ndia de ai fee nasanenedak neu ei mae, huu Abraham namahele neu Manetualain, de Manetualain kee-dede nala ndia dadik hataholi dale ndoos fo malole no Ndia. 10 Faik bee fo Manetualain kee-dede nala Abraham leo ndiak? Ledo-eik ana sunat so do, ledo-eik ana bei ta sunat? Teteben, na ta neu faik fo ana sunat basa so, tehuu neu faik fo bei ta sunat.
11 Tetebes! Neu faik fo Abraham bei ta sunat, Manetualain kee-dede nala ndia dadik hataholi dale ndoos fo malole no Manetualain so. Dook bali, bei fo ana sunat fo dadik tanda nae, ndia ana dadik hataholi kamahelek neu Manetualain. No leo ndiak de Abraham soi dalak neu basa hataholi kamahelek kala leu Manetualain. Te Manetualain simbok basa hataholi fo lamahele neu Ndia, fo ala malole lo Ndia, mae ala sunat, do taa.c 12 Abraham soi dalak fee ai hataholi Yahudi nana sunat. Ta huu ai nana sunat, tehuu ai mamahele miu Karistus, sama leo Abraham namahele neu Manetualain, neu faik fo ana bei ta sunat.
Mete ma ita tamahele teu Manetualain, na, ita simbok hata fo Ana heluk ndia
13 Manetualain mba'a heheluk no Abraham, ma ndia numbu-sadun nae, dook te dae-bafok katematuan dadik sila pusakan. Manetualain helu leo ndiak, huu Abraham namahele neu Ndia, basa de Manetualain kee-dede nala ndia nae, hataholi dale ndoos fo malole no Ndia. Tehuu Manetualain ta helu leo ndiak, huu Abraham tao tungga Ndia Heti-heun nala.d
14 Hataholi ta bisa simbo nala Manetualain pusakan fo Ndia heluk nesik Ndia Heti-heun. Mete ma leo ndiak, na, ita namahehelen teu Ndia hehelun sosoan ta boe.e 15 Manetualain Heti-heun nai bee, na nai ndia hambu hataholi la'o lena Heti-heuk ndia. Mete ma hataholi la'o lena Heti-heuk ndia, na, Manetualain huku sala. Ma mete ma Manetualain Heti-heun ta nai ndia, na, neu ko ta hambu hataholi la'o lena Heti-heuk ndia.
16 Huu ndia de ita musi tamahele teu Ndia. Te namahehelek sosoan lena basa-basan. Manetualain nau natudu hiak Ndia dale malolen neu hataholi fo namahele neu Ndia. Ma mete ma ita tamahele teu Ndia fo sama leo Abraham, na, neu ko ita simbo hata fo Ana heluk ndia, mae ita hataholi Yahudi mana to'u Manetualain Heti-heun do, hataholi ta Yahudi boe. De ita basa nggata fo kamahelek, sama leo Abraham numbu-sadun.f 17 Nai Manetualain Susula Malalaon, Ana helu Abraham so nae, “Au tao o dadik hataholi nusak no'uk bei-ba'in nala.” Abraham namahele neu Manetualain. Boe ma dook te Manetualain tao Ndia hehelun dadi. Ndia boe oo tao nasoda falik hataholi mana matek. Ndia kada kokolak fo hata bei ta, na ana dadi leo.g
18 Sama leo nana sulak nai Manetualain Susula Malalaon nae, “Numbu-saduk makadotok, dei fo leme o mai.” Huu ndia de Abraham namahele neu Manetualain, ma nahani mbea-mbea Ndia, mae ndia anan bei taa. De Manetualain tao nala ndia fo dadik neu “hataholi nusak no'uk numbu-sadun.”h 19 Abraham namahele teas neu Manetualain, mae ana bubuluk ndia ao-inan lasik so, ma teun natun esa so. Ma Sara ana manan namatuu so, ma ndia boe namalasi so.i 20 Tehuu Abraham namahehelen ta nanggongga faa boe. Ana dudu'a nae, Manetualain bisa tao natetu Ndia hehelun. Ndia namahehelen boe natea, neu ledo-eik ana so'u dema-demak Manetualain naden. 21 Abraham namahele tebe-tebe nae, hata fo Manetualain heluk ndia so, na Ana nabe'i tao tunggan. 22 Huu ndia de Manetualain kee-dede nala Abraham dadik hataholi dale ndoos fo malole no Ndia.
23 Tehuu Manetualain Susula Malalaon nae, Manetualain tana hingga leo ndiak kada neu Abraham mesak kana, 24 tehuu Ana fee ita boe! Mete ma ita tamahele teu Ndia, na, Ana kee-dede nala ita dadik hataholi dale ndoos fo malole to Ndia. Manetualain tao nasoda falik Yesus fo ita Lamatuan neme Ndia mamaten mai. 25 Yesus maten, huu ita tatao salan. Basa boe ma Ana nasoda fali, de soi dalak, fo suek ita tatutik seluk to Manetualain.j