Mae hataholi Yahudi la laena haak simbo pusaka neme Manetualain hehelun mai, tehuu ndia boe ta nasala'e nala sala
3
Mete ma leo ndiak, na, hataholi Yahudi mana sunat ndia, nanalan hata? Fama ei dudu'a mae, hataholi Yahudi hambu no'un lena ma malolen lena neme hataholi ta Yahudi la mai, hetu? 2 Tetebes! De hataholi Yahudi la nanalan nala nai dede'ak no'uk. Kaesan, huu Manetualain fee ues neu hataholi Yahudi fo sulak, ma nanea neulalau Ndia Dede'a-kokolan. 3 De leo bee? Fama ei dudu'a mae, Manetualain ta tao natetu Ndia hehelun, huu hambu hataholi Yahudi luma ta lamahele Ndia, do? Ta dadi! 4 Mae basa hataholi manai dae-bafok ia masapepekok kala, tehuu Manetualain mesak kana kokolak tetebes nakandondoo henin! Masaneda, te nana sulak nai Susula Malalaok dalek la'e-neu Manetualain aon nae,“Hambu hataholi soli salak nae,
Ndia ta naketu dede'ak no ndoos.
Tehuu dei fo ala bubuluk lae,
hata fo Ana kokolak ndia, memak tetebes.
Neu ko Ana senggi,
huu Ndia ta bisa kokolak sala.”a
5 Tehuu mete ma ita sala-singgon nakasasaman no Manetualain tatao-nono'in, na, ndia natudu manggaledok neu basa hataholi la nae, hata fo Manetualain taok ndia, memak tetebes. Huu ndia de hataholi luma kokolak lae, Manetualain ta ndoos, mete ma Ana huku ita mana tao salak. 6 Ta dadi leo ndiak! Manetualain ta sala, mete ma Ana huku ita. Te Ndia naena haak fo huku hataholi mana tao salak nai dae-bafok ia.
7 Naa! Mete ma au kokolak pepekok, na, salak ndia natudu nae, Manetualain huhukun ndia, tetebes. Ndia natudu koasa ina-huun. Tehuu mete ma leo ndiak, na boso dudu'a mae, Manetualain ta bole huku tatao salak ndia. 8 Mete ma tungga dede'a leo ndiak, na, ei tungga hataholi fo nae, “Ela fo ita tao manggalauk no'uk, fo ela neulauk boe oo namano'u!” Hataholi fo mana kokolak leo ndiak, nandaa hukun. Tehuu hambu hataholi kokolak nakalulutu au nadeng nae, au anoli hataholi leo ndiak.
Ta hambu hataholi esa boe dale ndoos, te basan mana tao salak
9 De leo bee? Ei dudu'a mae, ita hataholi Yahudi la neulaun lena heni hataholi ta Yahudi la, do? Ta dadi! Te au atudu ei ae, basa hataholi la tuda leni salak leu, mae ndia hataholi Yahudi do, hataholi ta Yahudi. 10 Sama leo nana sulak nai Manetualain Susula Malalaon nae,
“Ta hambu hataholi fo nasoda no ndoos nakandoo.
Ta esa boe!
11 Ta hambu hataholi bubuluk no teteben la'e-neu Manetualain.
Ta hambu esa boe sangga nalelak Manetualain.
12 Sila basa sala heok leme dala soda ndoos mai.
De basa sala ta mana dadadik kala so bali.
Ta hambu hataholi natudu ndia dale malolen.
Ta esa boe!b
13 Sila kokolan nala laboo mbulu,
sama leo lates fo hataholi la kali seluk kana.
Sila bafan nala lalelak kada kokolak dede'a pepekok.
Sila dede'a kokolan nala kalua leme sila bafan nala mai,
sama leo mengge lason.c
14 Sila bafan nala lalelak kada a'ali hataholi,
ma kokolak kabook fo kada tao dale hedi hataholi,
te ndia kalua neme sila dale kaboon nala mai.d
15 Tala bii sangga tao lisa hataholi.
16 Leni sudi bee leu, na,
ala lahiik tao nahuuk nai ndia,
ma ala tao toto'a mata-matak kala leu hataholi.
17 Ala lasoda ta mole-dame lalelak,
ma dalen nala lameda ta neulauk.e
18 Tala bisa lakatataka lala aon nala,
huu ala ta lameda bii faa boe neu Manetualain.”f
19 Naa! Ita bubuluk tae, Manetualain fee Ndia Heti-heun neu hataholi Yahudi fo musi tao tungga Heti-heuk sila. No leo ndiak, mete ma ala la'o lenan, na, ta hambu to'ok hata-hata bali. Dei fo basa hataholi malai dae-bafok ia musi lasale Manetualain, fo Ana naketu sila dede'an nae, sila sala, do taa. 20 Manetualain Heti-heun ndia natudu nae, ita basa nggata tao salak. Huu ndia de ta hambu hataholi esa boe fo bisa kokolak nae, “Manetualain kee-dede nala au dadik hataholi dale ndoos.” Ma ta hambu hataholi esa boe kokolak nae, “Au tao tungga basa Ndia Heti-heun.”g
Ita musi tamahele teu Lamatuak Yesus dei, bei fo Manetualain kee-dede nala ita dadik hataholi dale ndoos
21 Boso mamanggonggoak la'e-neu Manetualain dala dudu'an fo natudu dalak, suek ita bisa talole fali to Ndia. Teteben, na ita bisa talole to Ndia, ta huu ita tungga Ndia Heti-heun. Te Ndia Heti-heun mesak kana nana sulak leo ndiak, ma Ndia mana kokola lele ulun nala lafada leo ndiak nai Manetualain Susula Malalaon. 22 Manetualain kee-dede nala ita dadik hataholi dale ndoos, ma mana malole no Ndia, neu faik fo ita tamahele teu Yesus Karistus. Ndia ta mete matak, te Ana tao leo ndiak neu basa hataholi fo mana mamahelek neu Yesus leo ndiak.h
23 Manetualain ndia, malalaok. Ma Manetualain heti-heun, na ndia ita musi malalaok boe, bei fo Ndia bisa simbo nala ita. Tehuu basa hataholi la tao salak. Huu ndia de mae basa hataholi mana soba-soba tao aok malole no Manetualain, tehuu ta bisa losa nai Manetualain heti-heun fo manai lain seli ndia. 24 Mae leo ndiak, tehuu Manetualain mesak kana natudu Ndia dale malolen, ma naketun nae, ita ta sala so. Ana simbo nala ita leo ndiak, huu Yesus Karistus soi nala ita teme ita sala-singgon nala mai so.
25-26 Manetualain tudu nala Yesus so, fo dadik tunu-hotuk fo bae ita hutan, suek koka heni ita salan nala. Tehuu ita musi tamahele teu Ndia tae, Ana tanggon nala ita huhukun. De daan faa henin, ma Ana mate nggati ita. No leo ndiak, na Manetualain natudu nae, hata fo Ana naketun ndia so, tetebes. Makahulun, Ana nggale loak nalan seli, boe ma Ana hele fo koka heni sala-singgok kala fo hataholi la taon nai lele uluk so. Tehuu mete ma Ana ta huku hataholi kasalak kala, na, Ndia ta ndoos. De Ana soi dalak, fo ela Yesus Karistus bisa lemba nala ita hataholi kasalak kala sala-singgon nala huhukun. Hatematak ia, Ana natudu basa hataholi la nae, Ana tao ndoos nakandondoo henin. Boe ma basa hataholi kasalak kala fo lamahele leu Yesus, na Ana naketu nalan fo kee-dede sala dadik hataholi dale ndoos.
27 De leo bee? Fama ei dudu'a mae ei bisa kokolak koaok, huu Manetualain simbo nala ei so, do? Ta bisa! Ndia ta bisa natudu Heti-heuk esa fo tao ei malole mia Manetualain. Boso dudu'a mae, Manetualain bisa simbok ei, huu ei tao dede'a malole. Kada ita bisa tatudu Heti-heuk fo nae, Manetualain simbo nala ita, huu ita tamahele teu Yesus. Leo ndiak leo!
28 Huu ndia de hatematak ia ita bubuluk so leo iak: hataholi malole no Manetualain, huu lamahele neu Ndia, te ta huu kada ala tao tungga Ndia Heti-heun.
29 Naa, au sangga atane leo iak: Manetualain simbok kada hataholi Yahudi do, Ndia boe oo simbok hataholi fe'ek kala? Tetebes! Ana simbok basa hataholi la.
30 Te Manetualain ndia, kada esak. Ma kada dala kisak fo Ana simbok ita hataholi fo bisa malole to Ndia. Ana bisa malole no ita, huu ita tamahele teu Karistus. Dalak ndia, feen neu hataholi Yahudi ma hataholi ta Yahudi la boe.i
31 De au sangga atane leo iak: mete ma ita tamahele teu Manetualain, na, koka heni Ndia Heti-heun, do? Taa! Teteben, na ndia tao natetu Ndia Heti-heun.