Lamatuak boe luli hataholi nusa Yahudi fo Ana hele nala sala so
2
O mamanene la'e-neu manggalauk mata-matak isinaak ndia so, hetu? Boe ma fama o dudu'a mae, “Awee'! Hataholi sila manggalaun ana seli so!” Mete ma o dudu'a leo ndiak, na, mata neuk bou! Te o mesa nggo manggalauk leo ndiak boe. Huu ndia de o ta maena to'ok fo masala'e o aom, mae o ia see. Mete ma o mae, hataholi fe'ek kala manggalauk de nandaa ala hambu huhukuk, na, boso lilii henin, te o boe oo soli salak neu o ao hehelim. Huu o boe oo tao manggalauk leo ndiak!a 2 Tehuu ita bubuluk boe, mete ma Manetualain huku hataholi mana tao manggalauk, na, neu ko Ana naketu sila dede'an no ndoos. 3 Do, leo bee? Fama o dudu'a mae, “Hataholi mana tao manggalauk nandaa hambu Manetualain huhukun.” Naa te o tao manggalauk sama leo sila boe. Ma o dudu'a mae, “Au ta hambu Manetualain huhukun.” Dudu'a leo ndiak neme bee mai?4 Manetualain natudu dale malolen neu o. Ma Ndia nggale loan ana seli la'e-neu o tatao-nono'im. Tehuu hatina de o suli Ndia no mata matahiik? Fama o ta malelak mae, Ana natudu dale malolen neu o, fo o la'o ela o salam mala, ma fali muni Ndia muu.
5 Tehuu o ia langga batuk, ma ta nau mamanene! Ma o ta nau la'o ela o salam faa boe! De o tao fo o huhukum boe ana tamba mabela bali. Neu dae-bafok fai babasan so, na dei fo Manetualain sangga timba-tai basa hataholi la sodan nala. Ma dei fo hataholi la bubuluk lae, Manetualain naketu hataholi la dede'an nala no ndoos. Faik ndia, Ana huku o mabela, huu Ana ta simbok o tatao-nono'im ndia. 6 O sodam leo beek, na dei fo Manetualain bala tungga o tatao-nono'im.b
7 Hataholi fo mana tao dede'a malole taa-taa, na dei fo Ana fee sala sodak tetebes fo ta mana ketuk. Sila boe oo simbo hada-holomata, nade malole, ma ala lasoda lakandondoo henin lo Ndia. 8 Tehuu Manetualain tana simbok hataholi fo mana tao manggalauk. Ana luli nalan seli neu sala, te ala kada lalelak lala'u ao. Ala ta tao tungga dede'a tetebes, te ala lalelak kada tao tungga dede'a manggalauk.
9 Basa hataholi fo mana tao dede'a manggalauk kala, na dei fo ala hambu toto'ak ma soe. Mae hataholi Yahudi la do, ta Yahudi la, la'e basa sala.c 10 Tehuu basa hataholi fo mana tao dede'a malole, na dei fo Manetualain so'u dema-demak kasa, ma fee sala hada-holomata fo lasoda lo sodak ma mole. Mae hataholi Yahudi do, hataholi ta Yahudi, na basa sala hambun. 11 Te Manetualain ta mete matak!d
12 Manetualain Heti-heun ndia, ana la'e basa hataholi la. Naa! Mete ma hambu hataholi ta bubuluk Heti-heuk ndia, de ana tao salak, na dei fo ana naelak dook neme Manetualain mai. Ma mete ma hambu hataholi bubuluk Heti-heuk ia, tehuu ana tao salak, na dei fo Manetualain pake Heti-heuk ndia bali, fo Ana naketu ndia huhukun. Sila boe dei fo laelak dook lo Manetualain, huu ala la'o lena Ndia Heti-heun so. 13 Mete ma nau malole no Manetualain, na, bei ta dai no kada namanene Ndia Heti-heun, hetu? Te hataholi musi tao tungga Ndia Heti-heun, bei fo Ana nau simbok kasa. Boso kada mamanene!
14 Mae hataholi ta Yahudi ta bubuluk Manetualain Heti-heun isin, tehuu hambu luma leme sila mai tao tungga Heti-heuk ndia. Te sila dalen nala lafada sala lae, bee ndia tetebes, ma bee ndia salak. 15 No leo ndiak, na ala latudu lae, Manetualain Heti-heun ndia nana sulak nai sila dalen dale, lolen leo Manetualain dula sila dalen. Sila dale hehelin nala boe, ala timba-tai hata fo ala taon. De mete ma ala tao salak, na, sila dudu'an nala lae ndia salak. Ma mete ma ala tao tetebes, na, sila dudu'an nala lae ndia tetebes. 16 De, neu dae-bafok fai babasan, ma Manetualain so'u nala Yesus Karistus dadik neu Mana Maketu Dede'ak, na Ana nau palisak lutu-lutuk dudu'ak fo nana nafunik nai hataholi la dalen nala. Au fee nanonolik leo ndiak, sama leo Lamatuak Hala Malolen.
Mae hataholi Yahudi la tao tungga Manetualain Heti-heun, tehuu ndia ta nasala'e nala sala
17 De ei hataholi Yahudi la, leo bee? Ei mateme soso'uk aok mae, kada ei mesa nggei to'u Manetualain Heti-heun fo Ana nakondan nesik ba'i Musa, hetu? Ei boe mateme mabafa la'e-neu ei natutin mia Manetualain. 18 Tetebes! Ei bubuluk Manetualain hihiin. Ei bubuluk bee ndia neulaun ana seli so. Ei bubuluk basa dede'ak kala ia so, huu mesen nala lanoli ei neme Manetualain Heti-heun mai so. 19 Ei mamahele aom mae, ei bisa matudu dalak neu hataholi fo ta bubuluk sangga bee neu. Ei taok ei aom mala sama leo banduk fo manggaledon nasa'a neu basa hataholi mana masoda nai makiuk dale. 20 Huu ei to'u Manetualain Heti-heun, de ei dudu'a mae ei bubuluk basa-basan, ma ei to'u basa hata fo tetebes, hetu? Huu ndia de ei dudu'a mae, ei bisa manoli hataholi nggoak, ma kakana anak fo ta mana bubuluk hata esa boe.
21 De au sangga atane leo iak: ei mahiik manoli hataholi fe'ek kala, tehuu hatina de ei mesa nggei ta nau manoli hata-hata?! Ei mahiik hene mimbar fo palenda mae, “Hataholi boso mamana'o.” Tehuu hatina de ei ndia mamana'o?! 22 Ei ndia fee nanonolik mae, “Boso hohongge.” Tehuu hatina de ei mesa nggei mambue hohongge?! Ei binci mia bua nana dokik kala, tehuu hatina de ei ndia ha'i mafufunik buas neme uma sosonggok mai?! 23 Ei mabafa la'e-neu Manetualain Heti-heun, tehuu hatina de ei mesa nggei la'o lena Heti-heuk ndia, ma makamamaek Manetualain leo ndiak?! 24 Te neme makahulun mai, nana sulak nai Manetualain Susula Malalaon nae, “Huu ei hataholi Yahudi la manggalaun nala, de hataholi fe'ek kala lahiik lakadadaek Manetualain nade malolen.”e
Mae hataholi Yahudi la sunat, te ndia ta nasala'e nala sala
25 Ei hataholi Yahudi la musi sunat tungga Manetualain Heti-heun, hetu? Ndia dadik tanda nae, ei maena haak fo simbok Manetualain hehelun. Tehuu mete ma ei la'o lena Manetualain Heti-heun, na, Manetualain ta simbok ei. Ei dadi leo hataholi ta Yahudi, ma sama leo hataholi fo ta nana sunat nitak. 26 Dudu'a neulalau! Mete ma hataholi fo ta nana sunat, tehuu ana tao tungga Manetualain Heti-heun, na, dei fo Manetualain simbok ndia leo hataholi Yahudi fo nana sunat so, hetu?! 27 Tehuu mata neuk bou! Mete ma hataholi ta Yahudi fo ta nana sunat, ana tao tungga Manetualain Heti-heun, na dei fo ala latudu hata? Ala latudu ei salam mala lae, mae ei hataholi Yahudi fo nana sunat so, ma ei to'u Heti-heuk ndia neme lele uluk mai, tehuu ei bei la'o lena Manetualain Heti-heun.
28 Boso dudu'a mae, hataholi fo mana dadik ba'i Abraham numbu-sadun, ma nana sunat nai loun, na ndia fo dadik neu Manetualain hataholi teteben. Taa! 29 Mana dadik Manetualain hataholi teteben, na ndia hataholi fo malole no Manetualain. Te sunat tetebes, fo mana tao hataholi dadik Manetualain anan ndia, na ta ndia tandan nai loun, tehuu tanda fo Manetualain Dula-dale Malalaon tataon nai dalen. Manetualain koa hataholi mata leo ndiak, te hataholi ta koan.f