Nai pulu Malta
28
Ledo-eik ai basa nggai losa madak lain mia sodak, bei fo ai bubuluk mae, pulu ndia, nade Malta. 2 Nusak ndia hataholin nala soluk ai no malole. Huu hambu uda ma manilik ana seli, de ala tao ha'i ina-huuk nai tasi bifi ndia, boe ma loke ai fo ai miu dala ha'i. 3 Paulus boe oo neu hehele ai, fo taon neu ha'i. Tehuu ledo-eik ana ndae ai la leu ha'i lain, kada nggengge neuk, mengge kalasok esa pula mai, huu ta nakatataka ha'i matobin. Boe ma mengge ndia kiki nakadita neu Paulus liman. 4 Ledo-eik hataholi Malta lita mengge kalasok ndia nakadita londa-londa neu Paulus liman, boe ma lakokola esa no esa lae, “Hataholi ia neu ko mana makanisak. Mae ana nakambo'ik neme tasi manggalaun mai, tehuu memak ndia uan ndia. Huu ndia de ana ta bisa nasoda bali! See tao manggalauk, na, ana musi lemba ndia buna-boan.” 5-6 Hataholi la sila dudu'a lae, neu ko doo-doo anak bali, te Paulus liman mbae, ma kada nggengge neuk te maten.
Tehuu Paulus mbilu heni mengge ndia neni ha'i dale neu. Ma ta nameda hedis faa boe. Boe ma hataholi la sila lahani doo-doo anak, tehuu Paulus ta hata-hata. Boe ma ala dudu'a lae, “Boso losak ndia ia, nitu lalais, bou!”
7 Ta dook neme mamanak ndia mai, hambu nggubenol uman nala ma dae loak. Nggubenol ndia, nade Publius. Ana mai soluk ai neme tasi bifi, boe ma noke ai miu leo tataak nai ndia uman. Ana ono-lau ai faik telu nai ndia.
8 Faik ndia, nggubenol ama bonggin sumai, ma sali ta hahae. Boe ma Paulus neu tilon nai kaman. Basa boe ma ana tao liman neu hataholi kamahedik ndia, de hule-haladoi feen. Boe ma hataholi ndia hai tutik. 9 Ledo-eik ala lita nggubenol aman hai so, boe ma hataholi kamahedi fe'ek kala leni Paulus mai. Ala loke fo tulun sila, boe ma ana tao nahai sala. 10a Basa boe ma hataholi la latudu sila namemeda makasin, ma leni fee ai bua palsen no'un seli.
Paulus asa sa'e ofak la'o ela Malta fo leni Itali leu
10b-11 Ai leo nai Malta bulak telu, losa fai lii ma ani sanggu hahae. Faik ndia, hambu ofak esa neme kota Aleksandria mai, fo see nai pulu ndia so, neu fai lii. Ofak ndia naden, Kakana Kaduak,a huu hambu bua nana dokik nitu lalais kakana kaduak, nai ofak ndia langgan. Boe ma ai sangga sa'e ofak ndia, fo makandoo mini Roma miu. De ledo-eik ai sangga sa'e ofak, boe ma hataholi Malta la leni fee ai lepa-nggee, ma balo'a fe'ek fo ai paluun nai ofak lain.
12 Ai ofan la'ok koe-koe, boe ma losa kota Sirakusa nai pulu Sisilia. Ai see tataak nai ndia faik telu. 13 Neme ndia mai, ai tungga-tungga Sisilia tasi bifin, boe ma ai losa kota Regium. Fo'a mai, ani konas fumbu nalan seli, de ai ofan dusi lai-lai. Binesan ai losa kota namo esa, nade Putioli. 14 Nai ndia, ai konda neme ofak mai. Boe ma ai miu sangga Yesus hataholin nala lai ndia. Ledo-eik ai matonggo mia sala, boe ma ala loke fo ai leo mia sala. De ai leo tataak sosoda ina esa nai ndia. Basa boe ma ai la'o eik makandoo mini Roma miu. 15 Neu faik fo Yesus hataholin nala manai Roma lamanene lae, ai mini ele miu, boe ma ala mai soluk ai nai dala laladak. Luma ala hambu ai mima Pasa Apius; fe'ek kala hambu ai mima mamanak esa, nade Pasanggarahan Telu.b Neu faik fo Paulus nita sala, boe ma noke makasi no'uk neu Manetualain, ma dalen dadik natea.
Paulus nai Roma
16 Losa Roma, [soldadu la landee hataholi leni bui dale leu.]c Tehuu Paulus taa. Ala mbo'in fo bole seba uma esa. Nai ndia, ana leo no soldadu esa, fo nanea nakandoon. Dua sala liman beke selik nana mba'a nenik tali besi.d
17 Basa faik telu, boe ma Paulus noke lasi-lasi Yahudi malai ndia, fo mai latonggo loon. Neu faik fo lakabubua so, boe ma nafada sala nae, “Basa tolanoo nggala ei! Au nai ia, huu hataholi Yahudi malanggan nala, humu lala au neme Yerusalem. Boe ma ala fee au uu mana palenda liman. Naa te au ta tao salak hata-hata! Au ta tao hata-hata fo laban ita nusa hehelin. Ma au boe oo ta laban ita hadan heti-heun, fo ita simbon neme ita bei-ba'in nala mai so. 18 Mana palenda palisak au dede'ang ia neme ele so. Tehuu ala ta hambu au salang esa boe, fo nandaa huku mate. Huu ndia de ala sangga mbo'i au so. 19 Tehuu hataholi Yahudi malanggan nala timba heni mana palenda nakeketun, fo sangga mbo'i au, huu ndia de nau ta nau, au musi akahehenek uni mana palenda ina-huuk mai. Au tao leo ndiak, tehuu au ta dudu'a fo sangga kalaak au nusa heheling.e 20 Dede'ak ndia tao losa au akabubua tolanook kala nai ia. Fo suek ita bisa takokola aok la'e-neu hata fo hataholi Yahudi la lahanik kana: ndia ita basa nggata tamahena neu Manek fo Manetualain nau nadenun mai, fo nasala'e nala ita nusa Israel. Huu dede'ak ia, de ala mba'a au nenik tali besi ia.”
21 Boe ma lataa lae, “Losa hatematak ia, ai bei ta simbo susulak esa neme Yudea mai boe, fo lafada tolanook dede'an ia. Leo ndiak boe oo, tolanook kala mana leme ele mai, ta kokolak hata-hata la'e-neu tolanook Paulus. 22 Tehuu ai hii mamanene hata fo tolanook namahelen, huu ai mamanene sudi nai bee so lae, hataholi la timba heni hata fo paltei Salanik kala fee nanonolik. Tehuu teteben leo beek, ai bei ta bubuluk. De tolanook tulun mafada ai dei.”
23 Basa boe ma lala halak sama-sama, fo hele lala faik esa, fo ala sangga latonggo bali. Losa fain, boe ma hataholi no'un seli mai lakabubua leme Paulus uman. De ana mulai tui sala Manetualain palendan. Boe ma ana pake lalanek no'uk neme ba'i Musa susulan nala mai, ma neme Manetualain mana kokola fe'en nala susulan mai, fo sangga tao sala lamahele neu Yesus. Ana kokolak neme fafain mai losa bobok.
24 Ledo-eik lamanene basa Paulus kokolan, boe ma hambu luma lamahele, tehuu luma taa. 25 Sila esa laban esa, losa hambu luma nau fali. Tehuu Paulus kokolak nae, “Memak ei masisimbo bafam ia, nandaa no hata fo makahulun Manetualain Dula-dale Malalaon nafada ba'i Yesaya 26 nae,
‘O muu mafada hataholi nusak Yahudi ia mae,
“Dei fo ei mambue mamanene makandondoo henin Au kokolang,
tehuu ta malelak faa boe!
Ei mambue mete makandondoo henin hata fo Au taok,
tehuu ei ta mbali sana.”
27 Huu hataholi nusak ia, dalen nala lakababatu so.
Ndi'i doon nala, ta lamanene so bali!
Ma matan nala lakambombokek nisak so!
Elan fo suek ta lamanene bali;
Ma elan fo matan nala, ta lita bali.
Ma elan fo dalen nala mboke lakandoo.
Losa ala ta bubuluk dalak fali leni Au mai bali.
De talo bee fo Au bisa tao atalolole sala bali?”’f
28 Basa de Paulus nate'e kokolan nae, “De leo iak, tolanoo nggala ei! Ei musi bubuluk mae, hatematak ia Manetualain boe oo, sadia nasala'e nala hataholi nusak ta Yahudi la, huu sila boe oo nau lamanene Ndia.” 29 [Paulus kokolak nate'e leo ndiak, boe ma hataholi la sila fali. Tehuu dudu'an nala ta latonggo, huu ala laban esa no esa.]g
30 Paulus leo nai ndia uma seseban losa teuk dua. Ana simbok no namahokok basa hataholi fo mana mai sangga latonggo lo ndia.
31 No leo ndiak, ana hambu lelak fo tui sala Manetualain palendan, ma nanoli sala Lamatuak Yesus Dala Sodan. Ana nambalani kokolak manggaledok ma ta nakatoto'ak hata-hata.
Ama Teofilus fo malole. Au tutuing losa kada ia.
Makasi.
Neme au mai, Lukas