“Ama nggubenol fo au fee hada-holomata! Doo basa ia so, mulai neme ama to'u palenda nai ia, ama bubuluk nakahuluk so, hata fo malole fee ai. Boe ma ama tao dede'a malole no'uk so boe, losa ai hataholi Yahudi bisa masoda mia mole, namahokok, ma ndoo-ndoo so. De ai nau pake faik ia, fo moke makasi no'uk neu ama nggubenol. Te see bali, fo bisa tao malole no'uk leo ndiak sudi nai bee, sama leo ama. 4 Tehuu mae au ta paluu pake fai no'uk, au kokolak akandoo kada ndia isin. De au oke ama mamanene neulalau dede'ak, fo au nau afada la'e-neu Paulus ia.

5 Leo iak, ama. Soa-neu ai hataholi Yahudi, na Paulus ia, sama leo hedis esa, fo lali neme mamanak esa mai neni mamanak fe'ek neu. Ana hii laban ai anggaman, ma tao naodek ai hadan sudi nai bee. Kada neni bee neu, neu ko hataholi Yahudi la ladede'a esa no esa. Ndia ia, malangga mana tui-bengga esa neme paltei anggama, fo tungga hataholi esa neme Nasaret mai, fo ai mae, ‘paltei Nasarani’. Tehuu hata fo ala fee nanonolik ndia, nasala ina-huuk no hata fo ai anggaman nanonolin. 6 Hataholi ia soba tao nanggenggeo ai Uma Ina Huhule-haladoin fo malalaok so, ma no hataholi dinitiu dalek leu. Huu ndia de ai humu malan. [Tungga ai hihiin, ai sangga hukun pake ai heti-heu hehelin. 7 Tehuu malangga soldadu Lisias, mai namoa nalan neme ai liman mai. 8 Boe ma ana palenda nae, mete ma hambu see sangga nadede'a no Paulus, na, ala musi mai lasale ama nai Kaisarea. Ndia maksut, ela ama nggubenol palisak matan dede'ak ia.]^a De hatematak ia, ai mai nai ia, fo ama palisak dede'ak ia. Dei fo ama bubuluk aon nae, basa hata fo ai kokolak ia, memak tetebes.

Kada leo ndiak. Makasi ama.”

9 Tertulus kokolak basa leo ndiak, boe ma hataholi Yahudi fe'ek kala lakaheik kokolan lae, “Tetebes, ama! Memak leo ndiak.”

10 Boe ma nggubenol tuduk liman neu Paulus nae, “Hatematak ia au mbo'i o fo masala'e aom.”

Boe ma Paulus nambadeik, de mulai kokolak nae, “Ama nggubenol! Ama palenda nai ai propensin ia, dook ia so. De ama bubuluk no teteben, ai hataholi Yahudi nanggatutuu-nambadedein nai ia so. Huu ndia de au ta bii asala'e aong nai ama matan. 11 Meda faik sanahulu dua maneuk, au uni Yerusalem uu fo hule-haladoi nai Uma Ina Huhule-haladoik. Ama bisa kada matane hataholi mana tungga hule-haladoi faik ndia. 12 Au ta asisimbo bafak ua sudi see, nai Uma Ina Huhule-haladoik ndia. Ma au ta akabubua hataholi, fo tao naodek nai uma huhule-haladoi fe'ek kala. Leo ndiak boe nai Yerusalem, au ta tao naodek hata-hata.

13 Tehuu hatematak ia, hataholi la ia sangga latuda au. Hata fo ala kokolak isinaak ndia, butin ta faa boe. 14 Leo iak, ama nggubenol. Au musi manaku dede'ak esa neu ama. Au tungga paltei beuk esa fo hataholi foin lae, ‘Lamatuak Yesus Dala Sodan’. Au hule-haladoi neu Manetualain, sama leo au bei-ba'i nggala hule-haladoi neu Ndia. Au boe oo tungga basa ba'i Musa heti-heun, ma au amahele tebe-tebe hata fo Manetualain mana kokola lele ulun nala, sulak elan neu ai so. 15 Au amahena neu Manetualain sama leo hataholi la ia boe, fo hatematak ia, lambadeik lai ia fo laban au. Ai mamahele mae, dei fo Manetualain tao nasoda hataholi mana matek; hataholi neulauk, do hataholi manggalauk, kada sama. 16 Huu ndia de au asusua tingga-tingga, fo suek au bisa asoda no dale ndoos, nai Manetualain ma hataholi matan. No leo ndiak, ta hambu hataholi bisa tao natuda au.

17 Au tao ues teuk hida nai dae Israel deak, bei fo au fali uni Yerusalem uu. Neu faik fo au mai, au uni doik fo hataholi la lakabubua, fo tulu-fali ai hataholin nala fo mana to'a-taak. Boe ma au uni Uma Ina Huhule-haladoik uu, fo sangga hule-haladoi, ma sangga fee tunu-hotu mata-matak neu Manetualain nai ndia. 18 Ledo-eik au tao alalao au aong nai Uma Ina Huhule-haladoik tungga ai hadan heti-heun, boe ma ala mai fo sangga humu au. Tehuu faik ndia, ta hambu hataholi no'uk lai ndia, ma ta hambu mana tao naodek hata-hata boe!^b 19 Malai ndia kada hataholi Yahudi hida leme propensi Asia mai, fo sangga hule-haladoi nai ndia boe. De mete ma memak sila ladede'a lo au, na, sila ndia musi ladede'a lo au nai ia. Ta sila ama sala ia. 20 Tehuu hataholi la sila ta mai. De ama matane sudik hataholi la ia, au salang hata? Fai maneuk, ledo-eik ala palisak au neme mamana maketu dede'a anggama, ala ta hambu au salang esa boe. Ama matane sala leo! 21 Fama kada hambu dede'ak esa, fo tao sala laode, ma ta lamahoko lo au. Ledo-eik au kokolak no hala malii ae, ‘Ei sangga huku au, huu au amahele ae, Manetualain bisa tao nasoda hataholi mana matek!”’^c

22 Paulus kokolak leo ndiak, tehuu nggubenol Feliks boe oo bubuluk so, la'e-neu ‘Lamatuak Yesus Dala Sodan’, boe ma ana nate'e nakabubuak nae, “Leo iak! Au sangga oke malangga soldadu Lisias, fo au amanene tutuin dei. Mete ma au akokola basa ua ndia so, bei fo au bisa aketu dede'ak ia.” 23 Boe ma nadenu soldadu pangga ina-huuk esa neu kena Paulus. Tehuu ana palenda fo fee lelak faa neu Paulus, ma boso ka'i nonoon nala mai ono-lau ndia.

24 Nggubenol Feliks saon, hataholi Yahudi, nade Drusila. Seli faik hida so, boe ma ana sangga lelak fo no saon nau kokolak lo Paulus. De nadenu loo Paulus neu nasale dua sala. Boe ma Paulus nafada sala, dalan leo beek fo hataholi bisa lamahele Yesus Karistus, ndia Hataholi fo Manetualain helu memak neme makahulun mai so. 25 Ndia boe oo nafada dalan leo beek fo hataholi nasoda ndoos, ma leo beek fo hataholi bisa nanea aon, fo boso tao salak. Ndia boe oo nafada nae, dei fo Manetualain sangga huku basa hataholi.

Ledo-eik Feliks namanene leo ndiak, boe ma ana bii nalan seli. De nafada Paulus nae, “Paulus. Dai so. Kada losa ia leo! Mete ma hambu lelak, dei fo au oke o bali.” 26 Faik ndia, Feliks sangga dalak fo Paulus kosun nenik doik, suek ana mbo'in. De nambue noke nakandoo Paulus fo kokolak no ndia.

27 Tehuu tungga dalak fe'ek, nggubenol Feliks boe oo, ha'i hataholi Yahudi malanggan nala dalen. Huu ndia de ana ta naketu lai-lai Paulus dede'an. Ana ela dede'ak ndia ende losa teuk dua. Basa boe ma nggubenol beuk mai nggati Feliks. Naden, Porkius Festus. Tehuu ala bei kena lakandoo Paulus boe.