Paulus asa fali leni propensi Makedonia leu
20
Neu faik fo hataholi ta tao nahuuk so bali, kota Efesus ndia linok fali sama leo basa faik. Boe ma Paulus nakabubua nala hataholi kamahelek kala malai ndia, de tao natetea dalen nala. Basa boe ma nate'a, de ana la'o neni propensi Makedonia neu. 2 Neu ndia, ana ndule basa nggolok, fo tao natetea hataholi kamahelek kala dalen. Ana tao leo ndiak losa ana maso neni nusa Yunani neu. 3 Ana leo nai ndia losa bulak telu. Boe ma ana nahehele, fo sangga sa'e ofak neni propensi Siria neu, tehuu ana namanene nae, hataholi Yahudi la lala halak fo sangga tao lisan. Ana namanene leo ndiak, boe ma ana ta nau sa'e ofak nakandoo neni propensi Siria neu. De kada la'o fali nesik propensi Makedonia.4 Hambu hataholi bubua kadi'ik esa tungga Paulus. Ndia Timotius; ama Pirus anan Sopater, neme kota Berea mai; hataholi dua leme kota Tesalonika mai, nade Aristarkus ma Sekundus; hataholi esa neme kota Derbe mai, nade Gayus; ma hataholi dua leme propensi Asia mai, fo ndia Tikikus ma Trofimus.
5-6 Basa boe ma au (fo ndia Lukas mana sulak susulak ia), atonggo seluk ua Paulus neme kota Filipi nai propensi Makedonia. Boe ma Paulus ana mana tunggan nala la'o lakahuluk, de lahani ai leme kota Troas nai tasi selik. Ledo-eik hataholi Yahudi fai ina-huun Paskaa seli so, boe ma ai dua nggai sa'e ofak mini kota Troas miu. Faik ndia, ai sa'e ofak faik lima. Ledo-eik ai losa Troas, ai konda mima ofak mai. Boe ma ai matonggo seluk mia ai nonoo fe'en nala, de ai leo sosoda ina esa neme ndia.
Ta'e anak Yutikus tuda neme jendela lain mai neme kota Troas
7 Faik ndia, la'e Sosoda ina. Paulus naketun so nae, “Tolanoo nggala ei. Fo'a mai au sangga la'o akandoo.” De basa ai hataholi kamahelek makabubua fo sangga mi'a-minu. Huu Paulus sangga la'o so, de kokolak no ai losa fatilada. 8 Ai makabubua nai uma esa tada katelun. Le'odaen ndia, ala dede banduk no'un seli. 9 Faik ndia, ta'e anak esa, nade Yutikus, nanggatuuk neme jendela. Ndia boe oo tungga namanene Paulus. Tehuu ta dook boe ma matan nambela, de ana sunggu namanee. Kada nggengge neuk, te ana tuda neme jendela ndia mai. Boe ma mate tutik kana. 10 Basa de Paulus konda, de holu nala ta'e anak ndia. Boe ma ana kokolak nae, “Boso bii. Ana ta mate.” 11-12 Ai basa nggai mamahoko, huu ta'e anak ndia ta mate. Basa boe ma ala loo falik kana neni uman neu. De ai basa nggai hene seluk mini uma tadan lain miu, fo manggatuuk mi'a sama-sama. Boe ma Paulus tuti kokolan losa fo'a fafain. Ledo sadu, boe ma ai mate'a fo sangga la'o.
Neme kota Troas mai neni kota Miletus neu
13 Basa boe ma ai mala halak fo ai la'ok mababa'ek losa ai matonggo bali nai kota esa, nade Asos. Boe ma ai sa'e ofak mini Asos miu. Tehuu Paulus kada la'o eik neni ele neu.
14 Neu faik fo ai matonggo mia Paulus neme Asos, boe ma ana sa'e ofak lain neu, de ai makandoo mini kota Metilene miu. 15 Neme Metilene mai, ai sa'e ofak makandoo. Boe ma fo'a mai ai ofan deka-deka no pulu esa, nade Kios. Neu binesan, boe ma ai makandoo mini pulu Samos miu. Neu balideman, boe ma ai losa kota Miletus. 16 Tehuu Paulus dokodoe nalan seli so, fo losa lai-lai nai Yerusalem, suek ana bisa tungga fai ina-huu Pentakosta nai ele. Boe ma ana ta nau nggali heni fai, fo la'ok neni kota Efesus neu, huu ndia fain ta so bali.
Paulus kokolak no lasi Salanik kala nai kota Efesus
17 De nai Melitus, Paulus haitua halak fee lasi Salanik kala nai Efesus, fo ala mai latonggo lo ndia. 18 Ledo-eik ala losa, boe ma Paulus nafada sala nae, “Basa tolanoo nggala ei! Ei bubuluk au dala sodang so, mulai neme fai sososan fo au heta au eing nai propensi Asia losa hatematak ia. 19 Ei boe oo bubuluk au tao ues mbilu-mbuse nai ei laladam, tehuu au ta soso'u itak au aong. Nai Au ueng ia, au luung tuda no'uk, ma au lemba toto'ak no'uk. Au boe oo hambu doidosok no'uk, neme hataholi Yahudi la dudu'a manggalaun mai. 20 Neu faik fo au anoli ei, au kalua heni basa hata fo malole, fo au bubuluk feen neu ei. Ma au boe oo anoli ei ta no babaak. Au boe oo, uni hataholi la esa-esak uman uu, fo au asanenedak kasa la'e-neu Lamatuak hihiin. 21 Au boe oo afada hataholi Yahudi, ma hataholi ta Yahudi ae, ala musi hahae leme sila sala-singgon nala mai, fo fali tungga Manetualain. Ma sila boe oo, musi lamahele Lamatuak Yesus, fo mana naena haak palenda ita.
22 Au sangga afada leo iak: hatematak ia, au sangga uni Yerusalem uu, huu Manetualain Dulan hela no au uni ele uu. Kada au tungga, mae au ta bubuluk hata fo dei fo dadi neu au nai ele. 23 Tehuu neme kota esa mai neni kota esa neu, Manetualain Dula-dale Malalaon nafada nakahuluk au so nae, dei fo au maso bui ma lemba doidosok no'uk nai ele. 24 Au bubuluk neu ko leo ndiak so, huu Lamatuak Yesus fua basa ues ia neu au alung, fo au uu afada Hala Malole ae, Lamatuak sue ita ma dalen malole neu ita boe. Mete ma au ta tungga Ndia hihiin, fo tao basa Ndia uen ia, na, au ameda au sodang sosoan taa.b
25 Hatematak ia au bubuluk ae, ei ta mita au so bali. Ei fo au fee nanonolik doo basa ia so, la'e-neu maso dadik Lamatuak bobonggin. 26-28 Huu ndia de mamanene neulalau. Au tao basa au ueng neu ei so. De hatematak ia, ei mesa nggei musi tao ues makandoo. Mete ma hambu hataholi neme ei mai, fo ta maso Manetualain bobonggin, na, ei ndia tanggon-mataak! Te au salang ta ndia. Masanedak neulalau! Huu au afada memak basa Manetualain hihiin neu ei so. Ta hambu hata esa boe fo afunin neu ei. De ei musi manea matalolole ei soda hehelim, ma makaboi matalolole basa hataholi, fo Manetualain Dula-dale Malalaon nadenu ei fo manea. Boso mafalende mae, Lamatuak Yesus mate so, fo bae ketu hataholi la sila no Ndia daa hehelin. Ndia boe oo hele nala ei, fo manea sala sama leo mana hoo lopo-linu ndia bi'i-lombon nala. 29 De hatematak ia, au la'o ela ei. Tehuu masanedak, bou! Dei fo hambu hataholi mai, fo fee nanonolik nadabak nai ei laladam mala. Ala maso sama leo busa manggalauk, fo maso neni bi'i-lombo lalaen dale neu. 30 Hambu hataholi masapepekok leo ndiak, neme deak mai. Tehuu masanedak, huu hambu luma sadu leme ei laladam mala mai boe. Ala fee nanonolik ta malole neu ei. Ala nau fo kada hataholi tungga sila. Huu ndia de ala soba-soba hela hataholi, fo boso tungga Yesus bali. 31 Huu ndia de ei musi manea matalolole ei aom. Boso mafalende, te au leo sama-sama ua ei losa teuk telu so. Au boe oo, fee ei nanoli-nafadak leledo-le'odaen, ma au ta dudu'a au sosotang. Au luung tuda no'uk so, huu ei.
32 Hatematak ia, ita sangga taba'ek so. De au fee ei basa nggei neu Manetualain liman, fo Ana nakaboi ei. Ma ei musi to'u tea-tea basa hata fo au afada ei neme sososan mai so, la'e-neu Manetualain dale malolen. Manetualain naena koasa fo tao natea ei. Ndia boe oo helu basa so, fo fee baba'e-babatik neu Ndia hataholin nala. De mete ma ei tungga makandoo Ndia no dale malalaok, neu ko ei boe oo hambu Ndia baba'e-babatin.
33 Neu faik fo au tao ues nai ei laladam mala, au ta dale hedi ha'i ei buam esa boe. Au ta oke sudik ei bua lilo mbilas do, lilo fulak do, balo'as do, sudi hata. 34 Ei boe oo bubuluk, neu faik fo au leo ua ei, au tao ues mbilu-mbuse alan seli, fo suek au bisa asoda. Ta kada soa-neu au mesa nggau, tehuu au tao ues fo akaboi sila mana tungga au boe. 35 De no basa dede'ak ia, au atudu dalak so, fo ei boe oo tungga tulu-fali hataholi mana to'a-taak, fo ta mana hambu daik. Masaneda neulalau Lamatuak Yesus kokolan nae, ‘Malolenak ita fee lena heni ita simbo.”’
36 Paulus kokolak nate'e leo ndiak, boe ma ana sendek, de hule-haladoi sama-sama no sala, ma noke fo Manetualain nanea basa sala. 37-38 Boe ma basa sala dale hedi, huu Paulus kokolak so nae, dei fo sila ta latonggo lo ndia so bali. De ledo-eik ala sangga laba'ek so, boe ma ala holu lala Paulus, de idun ma lamatani lasakekedu. Basa boe ma ala loo aic mini ofak lain miu.