2 Boe ma natane sala nae, “Tolanoo nggala ei. Fai maneuk, neu faik fo ei mamahele Lamatuak Yesus, ei boe oo simbo Manetualain Dula-dale Malalaon do, taa?”

Ala lataa lae, “Taa. Ai bei ta mamanene mitak lae, hambu Manetualain Dulan leo ndiak.”

3 Boe ma Paulus natane bali nae, “Mete ma leo ndiak, ala salani ei pake salanik bee?”

Boe ma lataa lae, “Ala salani ai tungga Yohanis tataon.”

4 Boe ma Paulus nafada nae, “Mamanene dei! Yohanis salani hataholi fo dadik tanda nae, ala hahae leme sila sala-singgon nala mai so. Tehuu masaneda leo iak! Tungga faik, ndia mesak kana nanoli hataholi Israel asa nae, ala musi lamahele neu Yesus, Hataholi ndia dei fo Manetualain nadenun mai.”^a

5 Ala lamanene leo ndiak, boe ma loke Paulus salani sala, fo ala maso dadik neu Lamatuak Yesus bobonggin nala. 6 Neu faik fo Paulus tao liman neu sala ma hule-haladoi, boe ma Manetualain Dula-dale Malalaon konda neu sala. De ala mulai kokolak pake dede'ak mata-matak, fo ala bei ta bubuluk litak. Ma Manetualain pake sala, fo lafada hata fo dei fo dadi. 7 Basa sala hataholi sanahulu dua.

8 Ledo-eik Paulus leo nai kota Efesus, ana nateme maso nai hataholi Yahudi la uma huhule-haladoin, fo nanoli sala lutu-lutuk la'e-neu Manetualain palendan. Ndia boe oo kokolak ta pake babaak. Ana tao leo ndiak losa bulak telu. 9 Tehuu hambu hataholi fo ta simbok ndia nanonolin, de ala laban ndia. Ala mbau-edo hataholi lai ndia boe, fo boso tungga Yesus Dala Sodan. Huu ndia de Paulus no hataholi kamahelek kala, la'o ela uma huhule-haladoik ndia. Boe ma leu lakabubua nai uma sakola esa. Maumak ndia, nade Tiranus. 10 Paulus nanoli sala leo ndiak losa teuk dua, losa hataholi malai nusa Asia katematuan, lamanene Lamatuak Yesus Tutui Malolen so. Mana mamanenek sila, hataholi Yahudi ma hataholi ta Yahudi boe.

11 Faik ndia, Manetualain fee Paulus koasa fo ana tao tanda heran mata-matak fo ana seli. 12 Conto leo, mete ma hataholi tonda nala Paulus popoi langgan, do kalikeen, fo ala tao buas ndia neu hataholi kamahedik, na, hataholi sila hedin nala mopo tutik. Losa nitu manggalauk kala boe oo, kalua la'o ela hataholi sila.

13-14 Nai ndia, hambu hataholi Yahudi la malangga anggaman esa, no ana tou anan hitu. Malangga anggama ndia, nade Sakewa. Anan nala lateme leni sudi bee leu, fo ala husi kalua heni nitu neme hataholi mai. Ala soba-soba husi nitu pake Yesus naden boe lae, “O malelak Yesus fo Paulus nafadak ndia, do? Hatematak ia au palenda o, pake Yesus naden, fo o kalua muma hataholi ia mai leo!” Ma hambu hataholi malela Yahudi fe'ek hida soba tao leo ndiak boe.

15 La'i esa, ledo-eik Sakewa anan nala palenda leo ndiak, boe ma nitu manggalauk nataa nae, “Au alelak Yesus. Au alelak Paulus boe. Tehuu ei ia, see?” 16 Boe ma hataholi nitu nalak ndia, luli nalan seli. De ana neu heta ma habo fee sala. Ana tao nahina sala, ma sii heni badun nala losa lalai lalenggu-pikok no makaholak leme uma ndia mai.

17 Boe ma tutuik ndia, natanggela neme bafak mai neni bafak neu, losa basa hataholi malai kota Efesus bubuluk; mae hataholi Yahudi, ma ta Yahudi la boe oo bubuluk. Keke'un, kada sudi see namanene tutuik ndia, ala bii ma heran. Boe ma ala koa-kio Lamatuak Yesus, huu Ana fee koasa ina-huuk neu Paulus so. 18 Basa boe ma hataholi kamahele beuk kala sila, leni tolanoo kamahelen nala leu so, de lambombo'a dalek, boe ma manaku salan nala. 19 Neme sila mai, hambu mana mateme pake malela makiuk. De lakabua lala sila susula malela makiun nala, fo hotu heni sala. Mete ma hingga susulak kala sila, na, belin doi lilo fulak lifun lima hulu.^b

20 Basa boe ma hataholi la latutuik la'e-neu Manetualain Hala Malolen leledo-le'odaen, sudi nai bee. Boe ma hataholi kamahelek kala boe lamano'u. Te Manetualain Dede'a-kokolan ndia, maso losa hataholi dalen ma le'a-nolen ina-huuk.

21 Basa boe ma Paulus naketun fo fali neni Yerusalem neu. Tehuu dalen dokodoe fo nakahuluk neni propensi Makedonia, ma propensi Akaya neu, bei fo ana la'o nakandoo neni Yerusalem neu. Ana dudu'a memak so nae, “Malolenak au uu tilo hataholi kamahelek kala nai mamanak ia dei. Te mae leo beek boe oo, au musi losa kota Roma.” 22 Boe ma ana nadenu nonoon dua lakahuluk leni Makedonia leu, ndia Timotius ma Erastus. Tehuu ndia mesak kana bei leo nala dook bali nai propensi Asia.

23 Faik ndia, dede'a ina-huuk esa toda nai kota Efesus, la'e-neu Yesus Dala Sodan. 24 Dede'ak ndia okan leo iak: nai ndia, hambu tuka lilo fulak esa, nade Demitrius. Ana nateme tao uma sosonggo kadi'ik neme lilo fulak mai, fo se'o fee hataholi Efesus, suek ala songgo nitu lalais esa, nade Artemis. Huu ndia bua sese'on nala laku nakandoo, de ana pake mana tao ues no'uk. Huu ndia de doik maso nakandoo neni ndia neu. 25 La'i esa, Demetrius nakabubua nala tukan nala, ma tukan fe'ek kala, boe ma kokolak neu sala nae, “Ama ma basa tolanoo nggala ei! Ei bubuluk so mae, ita sodan neulauk leo iak, huu doik no'uk maso neme ita bua sese'on ia mai. 26 Tehuu hatematak ia, ita tita to ita mata de'e hehelin so, ma tamanene to ita ndi'i doo hehelin so, ndia huu Paulus kokolan. Ana le'a-nole nala hataholi no'uk kala nae, buas fo ita taok ia, sosoan taa. Ana nae, bua nana dokik fo ita taok ia, kada nitu lalais pepekok. Ta kada hataholi malai kota Efesus lamanene ndia, tehuu hataholi malai propensi Asia katematuan boe oo, lamanenen so. 27 De mamanene neulalau, bou! Dei fo ita dadik hata bali, mete ma hataholi no'uk lambue tungga lakandoo Paulus asa? Neu ko hataholi ta nau hasa ita bua sese'on ia so bali! Masanedak, bou! Hatematak ia, hataholi no'uk lakaluku-lakatele neu ita nitu lalain mana'a Artemis. Nai propensi Asia katematuan losa dae-bafok bu'un nala boe oo, hataholi la lambue mai koa ndia nai ndia uma ina sosonggon, fo nai ita kotan Efesus ia. De boso losak hataholi ta mbali ndia so, boe ma ala ta leni ia mai so bali.”

28 Ala lamanene leo ndiak, boe ma dalen nala latobi tutik. De ala eki lae, “Sodak Artemis! Artemis fo mana'a! Ita hataholi Efesus koa-kio Artemis!” 29 Hataholi lamanene ala eki-eki leo ndiak, boe ma hataholi mulai lalai sudi leme bee mai, fo leu lakabubua lai ndia, losa kota ndia henuk no hataholi la. Tehuu basa sala lasapangga. Boe ma hataholi mulai tao nahuuk tungga-tungga dalak, losa kota moo ina-huun. Ala humu lala hataholi dua, de hela loo sala leni ndia leu. Dua sala naden, Gayus ma Aristarkus. Hataholi la humu lala sala, huu dua sala ia, Paulus ana mana tunggan leme Makedonia mai. 30 Paulus namanene leo ndiak, boe ma ana nau maso neni hataholi mana tao nahuuk kala laladan neu, tehuu hataholi kamahelek malai ndia ta mbo'i sana neu. 31 Hambu hataholi ina-huuk hida, leme propensi Asia mai lalelak Paulus no malole. Ala ladenu hataholi fo leu lafada lae, Paulus ta bole maso neni dae moo ndia neu, nai hataholi no'uk fo mana tao nahuuk sila.

32 Boe ma nai dae moo ina-huuk ndia, hataholi mulai sangga dede'ak ndia huu-okan. Hambu luma eki pepekok lae, “Leo iak!” Fe'ek eki lae, “Leo ndiak.” Naa te no'uk boe oo ta bubuluk dede'ak ndia huu-okan leo beek. Sila kada latungga dea. 33 Nai ndia boe oo hambu hataholi Yahudi la mulai bii, huu ala dudu'a lae, boso losak hataholi no'uk kala dei fo kalaak hataholi Yahudi dadik mana nggenggefuk nai dede'ak ia. Huu ndia de ala fee hataholi esa mata neu, fo dadik sila mana kokolan. Hataholi ndia, nade Aleksander. Ala loken fo nasala'e sala nae, dede'ak ndia ta huu hataholi Yahudi. Boe ma Aleksander so'uk liman, fo ala boso langgilo. De ana soba kokolak fo nasala'e hataholi Yahudi la. 34 Tehuu ledo-eik ala bubuluk ndia hataholi Yahudi, boe ma ala eki lo hala malii bali lae, “Sodak Artemis! Artemis fo mana'a! Ita hataholi Efesus koa-kio Artemis!” Ala eki leo ndiak, losa li'u dua.

35-36 Basa boe ma malangga mana palenda neme kota Efesus mai, nambadeik de kokolak tao nee-nee hataholi sila. Ana kokolak nae, “Ka'a-fadi nggala ei malai kota Efesus. Basa hataholi bubuluk so lae, ita nitu lalain Artemis mata-aon isi-isik tuda neme lalai mai, fo neni ita mai. De ita hataholi Efesus ia, takaboi neulalau ndia. Ta hambu hataholi esa boe, bisa fe'a heni ita haak nanean, huu ndia dadik neu tutuik, fo basa hataholi bubuluk memak so. Hatina de ei eki leo iak? Mae hataholi kokolak pepekok tungga sila hihiin, tehuu ei boso tao nahuuk madabak leo iak. 37 Ei hela mia hataholi kaduak kala ia mai, sama leo ala tao manggalauk. Naa te ala ta lamana'o hata-hata neme Artemis uma ina sosonggon mai. Sila boe oo, ta kokolak latuda ita nitu lalain mana'a nade malolen. De ei nau soli salak hata neu sala? 38 Masaneda neulalau, bou! Ita taena mamana maketu dede'ak. Hataholi mana maketu dede'ak boe oo lahani. De mete ma Demitrius asa nau tao dede'ak, na, ala musi tungga ndia heti-heun, fo leni dede'ak ndia neni mamana maketu dede'ak neu. 39 Ma mete ma hambu dede'a fe'ek, fo ala sangga so'un, na, elan fo ala hetin lo lasi hadak kala. 40 Boso losak, mana palenda Roma soli salak neu ita, huu naodek ia. Mete ma ala nau sangga bubuluk dede'ak ia huu-okan, na, ita tataa tae hata? Huu dede'ak ia huu-okan taa!” 41 Malanggan ndia kokolak basa leo ndiak, boe ma nadenu basa hataholi la nggela. De ala nggela tutik.