Paulus nalelela aok no ka'a inak Priskila ma ka'a Akila nai kota Korintus
18
1-3 Faik ndia, hambu mane ina-huuk esa, neme mana palenda Roma mai, nade Kladius. Ana manggalau hataholi Yahudi la, boe ma ana husi kalua heni sala leme kota Roma mai, nai propensi Itali. Boe ma latanggela sudi bee leu. Hambu hataholi Yahudi esa, nade Akila ma saon nade Priskila. Dua sala lalai tungga leme propensi Itali mai, leni kota esa leu, nade Korintus. Akila ia neme propensi Pontus mai. Ndia uen mana tao buas neme banda louk mai.Faik ndia boe oo, Paulus la'o ela kota Atena, de ana la'o neni kota Korintus neu. Nai ndia, Paulus nalelela aok no Akila ma Priskila, te ndia boe oo, mana tao buas neme banda louk mai. Ala leo sama-sama ma tao ues sama-sama.
4 Mete ma losa hataholi Yahudi la fai hahae tao uen so, na, Paulus maso neni sila uma huhule-haladoin neu. Nai ndia, ana soba kokoe hataholi Yahudi, ma hataholi fe'ek kala, fo lamahele neu Lamatuak Yesus.
5 Tehuu ledo-eik Silas no Timotius leme propensi Makedonia mai, Paulus hahae tao ues banda louk. Leledo-le'odaen ana nasambute nafada hataholi Yahudi la nae, “Hataholi fo ita basa nggata tahanin neme makahulun mai so, fo Manetualain helu sangga nadenun mai so, Ana mai so. Fo ndia Yesus!”
6 Tehuu hambu hataholi Yahudi fo laban nakandondoo Paulus, ma lambue kokolak latudan. Boe ma Paulus ngganggafu heni afu neme balo'an mai, fo dadik tanda nae, ana ta mbali sila so bali, huu ala ta nau simbok Hala Malole fo ana nafada neu sala. Boe ma ana kokolak nae, “Ei ia ana seli so! Ei tao makambambake ei ndi'i doom! Tehuu neme naa leo! Dei fo ei lemba aom ei sala-singgom. Au ta tanggon-natataak ua ei bali. Mulai hatematak ia, au dede'ang ta ua ei hataholi Yahudi la so bali. Au sangga uu anoli kada hataholi nusa fe'ek kala fo ta Yahudi la.”
7 Hambu uma esa nai uma huhule-haladoik ndia boboan. Maumak ndia, nade Titius Yustus. Ndia ta hataholi Yahudi, tehuu dalen dokodoe neu Manetualain. Ledo-eik Paulus la'o ela hataholi Yahudi la sila, boe ma ana maso neni ama Titius uman neu.
8 Ta dook boe ma, malangga uma huhule-haladoik ndia, namahele neu Lamatuak Yesus. Naden Krispus. Ndia uma isin basa sala lamahele boe, sama-sama lo hataholi Korintus fe'ek kala, fo mana lamanene neu Paulus. Boe ma Paulus heti fo salani basa sala.
9 Le'odaek esa, nonook leo nai me'is dale, Paulus namanene Manetualain kokolak nae,
“Paulus! O boso bii, ma o dalem boso ma'a-male mua ues ia, te o tanggon-natataan bei ta basan. O musi manoli makandoo hataholi la ia la'e-neu Au Tutui Maloleng ia. 10 Masanenedak, bou! Ta o mesa nggo tao ues. Te Au sama-sama ua o. Mae hataholi tao lakatoto'ak o, tehuu Au pasak eik ua o. Ma Au tao matak neu o leledo-le'odaen. Boso mafalende, Au hataholing no'uk nai kota ia.”
11 Paulus namanene leo ndiak, boe ma ana leo doo-doo ana neme kota Korintus. Ana fee nanonolik la'e-neu Manetualain Dala Sodan nai ndia losa teuk esa seselik. 12 Faik ndia, ala so'u lala hataholi esa dadik nggubenol nai propensi Akaya, nade Galio.a Hambu hataholi Yahudi hida boe oo lala halak, fo hela loo Paulus neni nggubenol neu, nai mamana maketu dede'ak. 13 De ala kalaak Paulus lae, “Hataholi ia fufudi hataholi no'uk so, fo tungga anggama beuk. Naa te mana palenda Roma, ta manaku anggama ndia!”
14 Tehuu ledo-eik Paulus sangga hu'a bafan fo nasala'e aon, boe ma nggubenol tete tutik kokolan. Ana ka'i memak hataholi mana kalaak Paulus nae, “Wei! Ei hataholi Yahudi la, pasa ndi'i dook! Mete ma ei nau mini dede'ak fo hataholi tao manggalauk, do hataholi lakanisa, na, au musi amanene ei dede'am. 15 Tehuu dede'ak fo ei minik ia, ei dede'a uma dale hehelim! Kada ei masisimbo bafak la'e-neu anggama Yahudi heti-heun, no dede'a-kokolan nala, ma naden nala. Dede'ak ndia, mana palenda manai ia dede'an ta ndia!”b
16 Basa boe ma nggubenol husi kalua heni sala, leme mamana maketu dede'ak ndia mai. 17 Boe ma hataholi Yunani malai ndia, humu lala hataholi esa, nade Sostenes. Ndia ndia, hataholi Yahudi uma huhule-haladoin malanggan. De ala hela loon, fo mbombokon neu nggubenol matan. Tehuu nggubenol ta mbali sala.
Paulus neme Korintus mai, de neni Antiokia neu bali, nai propensi Siria
18-19 Basa boe ma Paulus leo nakandoo nai Korintus. Tehuu doo-doo boe ma ana nate'a hataholi kamahelek manai ndia. Basa de ana no Priskila ma Akila lahani ofak sama-sama fo leni kota esa leu, nade Kengkrea. Nai ndia, Paulus nggeu momoik langgan fo dadik tanda nae, hata fo makahulun ana helu neu Manetualain so, hatematak ia ana tao basan so.c Boe ma ala sa'e ofak, fo leni kota Efesus leu. Losa ndia, ala konda leme ofak mai. Boe ma Paulus la'o ela nonoo kaduan nala sila, de maso neni hataholi Yahudi uma huhule-haladoin neu. Nai ndia, ana natuka dudu'ak no hataholi Yahudi la. 20 Ala lakokola leo ndiak, boe ma hataholi Yahudi la loke, fo Paulus leo dook faa no sala. Tehuu ana timban no banggana'uk. 21 Boe ma ana nate'a nae, “Tolanoo nggala ei! Boso ha'i dalek, baa! Mete ma Manetualain soi dalak, dei fo au mai tilo ei bali.” Kokolak leo ndiak, boe ma ana la'o ela Efesus.d
22 Boe ma ana sa'e ofak nakandoo, losa kota Kaisarea. De ana konda nai ndia. Basa de neni Yerusalem neu, fo ana fee soda-molek neu hataholi kamahelek kala lai ndia. Basa boe ma ana fali neni kota Antiokia neu. 23 Ana leo doo-doo neme ndia, boe ma ana la'o ndule propensi Galati ma propensi Frigia. Nai ele, ana tao natetea hataholi kamahelek kala dalen.
Apolos nai kota Efesus ma Korintus
24 Faik ndia, hambu hataholi Yahudi esa neme kota Aleksandria mai, nai propensi Masir ele. Naden Apolos. Ndia ndia, hataholi mana kokolak malelak. Ndia boe oo nalelak lutu-lutuk Manetualain Susula Malalaon isin. Ndia bei fo losa nai kota Efesus. 25 Ana namanene nitak tutuik la'e-neu Yesus, ma nahiik tui seluk neu hataholi fe'ek. Ana tui fengga-fenggak ma hata fo ana kokolak ndia memak tetebes. Kada ndia bei ta bubuluk dede'ak no'uk. Kada ana bubuluk Yohanis salani hataholi, mete ma ala hahae leme sila sala-singgon nala mai so. 26 Boe ma la'i esa, ana kokolak ta babaa nai hataholi Yahudi uma huhule-haladoin. Priskila no Akila boe oo lamanenen lai ndia. Ala hule-haladoi basa, boe ma loke ndia neni sila uman neu. Nai ndia lafada feen basa Lamatuak Yesus Dala Sodan, losa dede'a lutu-lutuk kala.
27 Basa boe ma Apolos naketun fo neni propensi Akaya neu. Hataholi kamahelek manai Efesus dalek esa lo ndia hihiin. Boe ma ala tao susulak esa fee sila tolanoon hataholi kamahelek lai Akaya, fo loke sala simbok Apolos no malole. To'u nala susulak ndia, boe ma ana la'o. Losa Akaya, ana tulun tebe-tebe hataholi kamahelek malai ndia. 28 Ana natane-nataak dede'ak no hataholi Yahudi nai ndia, nai hataholi no'uk matan boe, tehuu ala ta senggi ndia. Ana nahiik pake Manetualain Susula Malalaon, fo nanoli sala nae, “Hataholi fo Manetualain helun sangga nadenun mai so, fo ita tahanin dook ia so, ndia Yesus!”