2 Mete ma ala losa mamanak esa fo hambu uma huhule-haladoik nai ndia, ma nandaa no fai hahae tao ues, na, Paulus nateme maso fo hule-haladoi tungga no hataholi la. Nai Tesalonika, ndia boe oo maso tungga neni sila uma huhule-haladoin neu. Boe ma ana natuka dudu'ak no sala lai ndia, pake Manetualain Dede'a-kokolan. Ana tungga hule-haladoi no sala leo ndiak, tungga-tungga fai hahae tao ues, losa sosoda ina telu tuti-tuti. 3 Ana nafada sala nae, “Mete ma ita palisak neulalau nai Manetualain Susula Malalaon ndia, na, ita bubuluk tae, ala kokolak neme makahulun mai so lae, Hataholi fo Manetualain helu sangga nadenun mai so, dei fo hambu toto'ak no'uk. Dei fo Ana mate. Tehuu basa ndia, Manetualain pake koasan fo tao nasoda falik kana. Hatematak ia ita bubuluk so tae, Hataholi fo Manetualain heluk ndia, ndia Yesus!”

4 Ala lamanene leo ndiak, hambu hataholi Yahudi simbok Paulus kokolan, boe ma ala leu lakabubua lo Paulus asa. Neme hataholi mana simbok ndia, hambu hataholi Yunani no'uk boe, fo dokodoe neu Lamatuak so, ma hambu inak hida le'a-nolen nala ina-huuk nai kota ndia.

5 Tehuu hataholi Yahudi malanggan nala malai ndia luli ma dale hedi. De ala mbau-edo mana leu-laak kala, fo tao nahuuk. Ledo-eik hataholi no'uk lakabubua so, ala mulai tao nahuuk nai kota ndia. Ala sangga Paulus no Silas, fo hela sala leni hataholi no'uk, fo mana manggalau lo sala. Boe ma leu sambu lala Yason uman, huu Paulus no Silas leo tataak nai ndia. 6-7 Tehuu ala ta hambu Paulus asa lai ndia. Boe ma ala hela lo Yason, ma hataholi kamahele fe'ek hida, leni mamana naketu dede'ak leu. Ala kalaak Yason asa lae, “Hatematak ia, hambu hataholi fo maneni ita kotan ia mai so. Leni sudi bee leu, ala tao nahuuk nai ndia. Hatematak ia, ala mai fo sangga ofe babalik ita heti-heun, boe ma nggatin no sila heti-heun. Yason simbok hataholi la ia, fo leo tataak nai ndia uman so. Tehuu basa sala laban ita heti-heun, huu ala ta nau manaku mane ina-huuk keser. Ala manaku kada sila malangga ina-huun esa, nade Yesus.”

8 Hataholi ina-huuk kala ma hataholi malai ndia lamanene leo ndiak, boe ma dudu'an nala kalambua. 9 Boe ma hataholi ina-huuk malai kota ndia, ladenu Yason no hataholi kamahelek kala, fo bae doik dadik tanda nae, ala ta tao nahuuk bali, ma helu ta bole lalai. Bae basa, boe ma hataholi la sila mbo'i Yason asa.

10 Le'odaek ndia, hataholi kamahelek malai kota Tesalonika dudu'a lae, malolenak ala ladenu Paulus no Silas, leni mamana fe'ek leu. Boe ma ala ladenu dua sala leni kota esa leu, nade Berea. Losa ndia, ala maso leni hataholi Yahudi uma huhule-haladoin leu. 11 Tehuu hataholi Yahudi malai Berea ndia, fe'e neme hataholi Tesalonika la mai. Hataholi la ia, hii lalan seli lamanene ma sadia simbok Paulus asa kokolan. Te ala lai Berea lamanene neulalau Paulus asa, ma mete neulalau Manetualain Susula Malalaon. Ala sangga bubuluk Paulus asa kokolan ndia tetebes, do taa. Huu ndia de, leledo-le'odaen ala palisak losa lutu-lutuk Manetualain Susula Malalaon. 12 Huu ndia de hataholi Yahudi no'uk malai ndia lamahele Yesus. Leo ndiak boe no hataholi Yunani la. Sila fo mana lamahele neu Yesus le'a-nolen ina-huuk. Hambu touk ma inak boe.

13 Tehuu faik ndia, hataholi Yahudi malai Tesalonika lamanene lae, Paulus asa fee nanonolik la'e-neu Manetualain Dede'a-kokolan nai Berea, boe ma ala mai tungga, de mbau-edo hataholi fo tao nahuuk nai ele bali. 14 Huu ndia de hataholi kamahelek kala manai Berea lai-lai loo Paulus neni tasi bifin neu. Tehuu Timotius no Silas leo lakandoo nai Berea. 15 Hataholi la sila loo Paulus losa kota esa, nade Atena. Boe ma ala la'o elan neu ndia, de ala fali leni Berea leu. Leni hala heheluk neme Paulus mai nae, Silas no Timotius mai lai-lai fo lakabubua loon.

16 Ledo-eik Paulus nahani Silas ma Timotius mamain nai Atena, dalen hedis, huu nita nai kota ndia hambu mamana sosonggok sudi nai bee.

17 Tehuu nai ndia hambu hataholi Yahudi hida, ma hataholi ta Yahudi hida hule-haladoi neu Manetualain. Paulus maso neni sila uma huhule-haladoin neu, boe ma natuka dudu'ak no sala. Tungga faik ana pasak neu boe, fo kokolak no sudi see fo neni ndia neu. 18 Boe ma ana natane-nataak no mesen hida leme bubuak dua nai kota ndia, fo ndia bubuak Epikuros ma bubuak Stoa.^a Tehuu ledo-eik ana kokolak la'e-neu Yesus nae, Ndia ndia nasoda fali neme mamaten mai so, boe ma hambu leme sila mai, mbula ambe nae, “Phueh! Memak mana masapepekok ba'in!” Hambu boe ala haumemee lae, “Awee! Hataholi ia nakaseti ita, fo songgo sila nitu lalai fuin nala!”

19-21 Hataholi Atena ma hataholi deak mana leo nai kota ia, mete ma lamanene hata beuk esa, conto leo nanonoli beuk, do dudu'a beuk, na, sila hataholi malelan nala lateme langgatuuk lakabubua, nai lete anak esa, nade Areopagus fo latuka dudu'ak loa naluk. Boe ma hambu leme sila mai loo Paulus leni ndia leu, de loken lae, “Soba mafada ai nanonoli beuk ndia! Te o kokolak dede'a beuk, fo tao mala ai masapangga. De ai moke fo o kokolak faa bali, fo suek ai bisa malelak.”

22-23 Boe ma Paulus nambadeik de kokolak nae, “Basa hataholi Atena la ei! Au la'ok ndule ei kotan ia so, ma au ita ae, memak ei hataholi manggate makalala'ok anggama. Au ita ei mamana sosonggom mala sudi nai bee. Tehuu au ita batu sosonggok esa nana sulak nae, ‘Ia sosonggok neu nitu lalais fo ita ta talelak kana.’ Ndandaan nae, ei songgo neu Manetualain so, naa te ei bei ta malelak Ndia. Ndia ndia au afadan neu ei.

24 Huu Ndia ndia, mana nakadadadik lalai ma dae-bafok no basa isin nala. Ndia boe oo naena haak palenda basa manai lalai ma dae-bafok. De Ana ta leo nai uma sosonggok, fo hataholi taok. 25 Ndia ndia fee ani hahaek ma fee sodak neu ita hataholi. Keke'un, Ndia ndia fee basa hata fo ita paluun. Tehuu Ndia mesak kana ta paluu hata-hata. De hataholi ta bisa tulu-fali Ndia.^b 26 Neme kada hataholi esa mai, Ana nakadadadik basa hataholi nusak manai dae-bafok katematuan. Ana ba'e fee hataholi nusak kala, esa-esak no daen. Ma Ana heti hataholi nusak kala nanggatutuu-nambadedein, esa-esak no fain.

27 Ana tao leo ndiak, huu Ana nau ita hataholi sangga fo talelak neulalau Ndia. Memak hataholi sangga-sangga, fama ala bisa latonggo lo Ndia. Ta bubuluk te Ndia ta dook neme ita mai. 28 Hambu hataholi kokolak nitak nae,

Hambu ei mana tao dede'a binim boe oo kokolak nitak nae,

29 Ndia memak tetebes. Ita basa nggata ia, Manetualain numbu-sadun. De boso dudu'a mae, Manetualain sama leo bua nana doki sosonggok fo hataholi dokin neme lilo mbilas, do lilo fulak, do batu, do tungga sila dudu'a hehelin. 30 Makahulun memak hataholi bei ta lalelak dede'ak ia. Huu ndia de Manetualain la'o ela sala lasoda lo nggoan sila. Tehuu hatematak ia, Ana ta nau ita tasoda leo ndiak bali. Huu ndia de Ana palenda nae, ita musi la'o ela sosonggok kala sila, boe ma tungga Ndia leo. 31 Ndia boe oo tudu faik esa, fo sangga huku basa dae-bafok ia isin, huu sala-singgon nala. Ma Ndia tudu memak Hataholi esa dadik Ndia Mana Maketu Dede'an. Dei fo Hataholi ndia naketu huhukuk no ndoos. Hatematak ia manggaledok so, Mana Maketu Dede'ak ndia, see. Huu ndia de Ana mate so, tehuu Manetualain tao nasoda falik Ndia so.”

32 Tehuu ledo-eik hataholi mana lakabubua lai ndia lamanene Paulus nae, “hambu Hataholi nasoda fali neme mamaten mai so”, boe ma ala hika haumemeen. Tehuu hambu hataholi hida tao dalek neu ndia boe. Lafada Paulus lae, “Ai bei mahiik mamanene ama kokolak dede'ak ndia bali. Tehuu fai fe'ek dei.” 33 Boe ma Paulus la'o ela mamanak ndia. 34 Tehuu hambu luma lakabubua loon, huu lamahele Lamatuak Yesus so. Neme sila mai, hambu mana maketu dede'ak esa nai Areopagus, nade Dionisius. Ma hambu inak esa, nade Damaris. Ma hambu hataholi fe'ek hida bali fo tungga sama-sama loo sala.