Lasi Salanik kala lakabubua lai Yerusalem
15
Faik ndia, hataholi Salanik Yahudi hida leme dook mai, leme propensi Yudea mai leni Antiokia leu. Losa ndia, ala lanoli Lamatuak Yesus hataholin nala lae, “Ei mamahele neu Yesus so. Ndia malole boe. Tehuu ndia bei ta dai. Mete ma ei nau masoda tebe-tebe, na, ei boe oo musi sunat, tungga ai hadan, fo Lamatuak mesak kana feen nesik ba'i Musa so.”a2 Tehuu Paulus no Barnabas laban tingga-tingga hataholi sila kokolan nala. Ala lasisimbo bafak lalan seli. Boe ma Paulus asa lae, “Ei sala! Hataholi nusa fe'ek fo ta Yahudi, mana lamahele neu Yesus, ta paluu tungga hataholi Yahudi hada sunat!” Huu ala laban leo ndiak, boe ma lala halak fo ladenu Paulus no Barnabas ma nonoo fe'en hida leme Antiokia mai, fo leni dede'ak ia fee Lamatuak nadedenun nala ma lasi Salani fe'ek kala lai Yerusalem.
3 Huu ndia de hataholi Salanik malai Antiokia ladenu Paulus asa leni Yerusalem leu. Ala tungga madak lain, lesik propensi Fenisia ma propensi Samaria. Nai sila dalan ndia, ala tuli la'o-la'o nai hataholi kamahelek kala uman. De ala tui losa lutu-lutuk lae, “Hataholi ta Yahudi la boe oo fali so, fo lamahele neu Lamatuak!” Basa hataholi lamanene leo ndiak, boe ma lamahoko.
4 Ala losa Yerusalem, Yesus hataholin basa sala simbok kasa no malole. Lamatuak nadedenun nala, ma lasi Salanik kala boe oo simbok kasa. Boe ma Paulus asa tui basa hata fo Lamatuak tao fee sala so, losa hataholi fe'ek no'uk boe oo tungga Lamatuak Yesus so. Ma ala tui sila nasisimbo bafan la'e-neu sunat. 5 Hataholi fo mana lamanene Paulus asa tutuin ndia, hambu hataholi Salanik Yahudi hida leme paltei Farisi mai. Ala fo'a lambadeik, de kokolak lo hala malii lae, “Mamanene neulalau ee! Mete ma hambu hataholi ta Yahudi sudi see, fo nau tungga Yesus, ala musi tungga ita hada sunat, ma ita hadan heti-heu fe'en, fo Manetualain mesak kana nakondan nesik ba'i Musa so.”
6 Boe ma basa hataholi salanik kala lala halak, fo Lamatuak nadedenun nala, ma lasi Salanik kala lakabubua, fo timba-tai dede'ak ndia. 7 Boe ma latuka dudu'ak lutu-lutuk. Mate'en, boe ma Petrus fo'a nambadeik, de kokolak nae, “Tolanoo nggala ei! Ei mesa nggei bubuluk mae, makahulun Manetualain tudu nala au, neme ei laladan mai so, fo au uu tui-bengga Manetualain Tutui Malolen neu hataholi ta Yahudi la. Huu Manetualain nau fo ala lamahele neu Yesus boe.b 8 Manetualain bubuluk ita esa-esak dalen. Ma Ndia fee Dula-dale Malalaon neu sala, sama leo Ana fee ita so. No leo ndiak, ita bubuluk tae, Lamatuak simbok sila boe.c 9 Te Manetualain ta mete matak sila no ita. Ana ta tao fe'e sila leme ita mai. Ana tao nalalao dalen nala so, huu lamahele neu Yesus so boe, sama leo Ana tao nalalao ita dalen boe. 10-11 Leo bee? Mete ma Lamatuak simbok kasa so, hatina de ita bei nau fua tamba bali fo tao tambela sala no hada sunat ia? Naa te, mete ma nau kokolak no ndoos, ita to ita bei-ba'in nala ta tabe'i lemba basa ita anggaman heti-heun! De boso ita takaseti sala leo ndiak! Au sangga atane leo iak: Lamatuak nasala'e nala ita, huu ita tungga anggama heti-heun, do? Taa, hetu! Lamatuak Yesus nasala'e, huu Ana sue ma dalen malole neu ita. Boso mafalende henin! Lamatuak sue ma dalen malole neu hataholi fe'ek leo ndiak boe.”
12 Ala lamanene leo ndiak, boe ma ta hambu hataholi esa boe nau tamba dudu'ak bali.
Basa boe ma Paulus no Barnabas tui seluk bali, talo bee de Lamatuak pake sala so. Ala tui tanda heran nala, ma dede'ak fo ana seli, fo Manetualain taon nai hataholi ta Yahudi la laladan nala so. 13 Ala tui basa, boe ma hataholi esa, nade Yakobis, fo'a nambadeik de kokolak nae, “Tolanoo nggala ei! Ei mamanene au dei! 14 Ka'a Petrusd bei fo tui basa ita nae, Manetualain so'u nala hataholi ta Yahudi la so, fo fee sala maso dadik Lamatuak Yesus bobonggin nala. 15 Ndia nandaa no hata fo Manetualain mana kokolan nala, lafada memak neme makahulun mai so. Huu ala sulak so lae:
16 ‘Nandaa no fain, Au fali.
Huu Au nau ambadedei seluk mane Dauk palendan.
Huu ndia tititi-nonosin fo lakalulutuk ndia so,
Au sangga ambadedei seluk, ma tao atetea seluk ndia bali.
17-18 No tao leo ndiak, hataholi maleme nusa fe'ek boe oo mai fo sangga latonggo lo Au.
Te Au boe oo hele ala sala so, fo dadik Au hataholing.
Huu Manetualain kokolak leo ndiak neme makahulun mai so!’e
19-20 De neme au, Yakobis mai, leo iak: mete ma hataholi leme nusa fe'ek mai, nau maso dadik Manetualain hataholin, na, ita hataholi Yahudi boso takatoto'ak kasa. Ita boso tao tambela sala ma tadenu sala tungga ita hada sunat. De ita musi sulak susulak esa, fo haitua fee sala tae, ala ta paluu tungga basa ita hada Yahudin heti-heun. Ita boe oo fee nasanenedak neu sala tae, ala boso tao eok lo hataholi fo ta sila saon. Ala ta bole la'a mbaa sosonggok. Ala ta bole la'a banda daan. Ma ala ta bole la'a mbaa neme banda nana kidu nisak mai boe.f 21 Mete ma ita tao heti-heuk leo iak, ia ta dede'a beuk bali. Hataholi no'uk bubuluk so, ita hataholi Yahudi la hadan memak leo ndiak so. Huu ba'i Musa sala heti-heun ndia, ita lees nai basa uma huhule-haladoik, tungga fai hahae tao ues sudi nai bee. De hataholi nusa fe'ek kala no'uk bubuluk so. Au kokolang kada leo ndiak. Makasi!”
Susulak fee hataholi ta Yahudi fo kamahelek kala
22 Basa boe ma Lamatuak nadedenun nala, ma lasi fe'ek kala lala halak lo basa hataholi salanik malai Yerusalem, fo sangga ladenu hataholi fo neu nafada sila nakeketun neu hataholi salanik sudi nai bee. Boe ma ala sangga hataholi fo salanik kala fee hadak, fo nandaa no ues ndia. De ala hele lala hataholi dua. Esa nade Silas, ma esa bali nade Yudas (fo loken lae, Barsabas boe). Boe ma ladenu dua sala leu sama-sama lo Paulus ma Barnabas. 23 Ala leni susulak fee hataholi nusa fe'ek malai kota Antiokia nai propensi Siria, losa dook nai propensi Kilikia. Susulak ndia liin leo iak:
“Soda-molek neme ai mai, Lamatuak Yesus nadedenun nala, ma lasi Salani fe'ek kala malai kota Yerusalem ia. Ai sulak susulak ia fee ei, fo ai sue ei sama leo ai tolanoo hehelin.
24 Ai sulak susulak ia, huu ai mamanene mae, hambu hataholi hida leme Yerusalem ia mai, leu latonggo lo ei nai ele so. Ala fee nanonolik ladabak, losa tao lakatoto'ak ma tao ei masapangga. Sadi kada ei bubuluk, ai ta madenu mitak hataholi sila. 25 Ledo-eik ai mamanene so mae, hambu hataholi tao lakatoto'ak ei leo ndiak, boe ma ai makabubua nai ia, fo timba-tai dede'ak ndia. Ai mala halak so, ma maketu basa dede'ak ndia so. De hatematak ia, ai hele mala hataholi so, fo leu lafada ei, ai nakeketun. Ala leu sama-sama lo Barnabas ma Paulus, fo ai suek. 26 Ita hataholi kaduan nala sila, lemba doidosok losa elaba'ik mate sala so. Ala hambu doidosok leo ndiak, huu ala tungga ita Lamatuan Yesus Karistus. 27 De ai madenu Yudas no Silas, fo suek lafada ei susulak ia isin.
28 Manetualain Dula-dale Malalaon nafada ai so, ma ai basa nggai makaheik leo ndiak mae, ei boso tungga basa ai hada Yahudin, conto leo hada sunat. Huu hadak sila tao nambela ei no sosoa taak. Tehuu hambu dede'ak esa do dua, fo memak ei musi masanedan:
29 Boso tao eok mia hataholi fo ta ei saom.
Boso mi'a mbaa sosonggok.
Boso mi'a daak.
Ma boso mi'a mbaa neme banda nana kidu nisak mai.
Mete ma ei manea aok neme basa dede'ak kala sila mai, na, ei ta tao nunute ei tolanoo Salani Yahudim mala. No leo ndiak, ei bisa makabubua neulalau mia sala. Ai susulan ia, kada leo ndiak. Soda-molek.”
30 Ala simbo lala susulak ndia, boe ma Paulus asa late'a, de la'o leni kota Antiokia leu. Ala losa ele, boe ma lakabubua lala basa hataholi salanik kala, de ala fee susulak ndia. 31 Ledo-eik ala lees basa susulak ndia, boe ma basa hataholi sila lamahoko, huu susulak isin tao natetea sila dalen so.
32 Yudas no Silas boe oo dadik Lamatuak mana kokolan. Dua sala tui no'un seli neu hataholi kamahelek manai kota ndia. Ala fee nanoli-nafadak, ma tao latetea hataholi la dalen nala. 33 Neu faik fo dua sala leo lai ndia doo-doo ana so, boe ma hataholi salanik malai Antiokia, mbo'i sala fo fali leni hataholi mana ladenu sila leu so. Ala mbo'i dua sala no sodak. 34 [Tehuu Silas kada nau leo nakandoo nai Antiokia.]g
35 Paulus no Barnabas leo faik hida nai ndia. Sila boe oo, tulun hataholi fe'ek fo mana fee nanonolik la'e-neu Lamatuak Yesus Dala Sodan.
Paulus no Barnabas lasidak
36 Neu faik fo Paulus no Barnabas leo doo-doo ana nai Antiokia so, boe ma Paulus kokolak neu Barnabas nae, “Ka'a! Mai fo ita fali teni basa mamanak, fo makahulun ita singgo titak. Ita teu tilo sudik ita tolanoon nala sodan. Ala leo beek, so? Te hataholi la bei ta dook lamahele neu Lamatuak Yesus. Fai maneuk ita mulai tanoli sala so. De mai fo teu tilo sala.” 37 Barnabas namanene Paulus noke leo ndiak, boe ma kada nakaheik. Barnabas nau noo Yohanis fo tungga no sala. (Ala loke Yohanis ia lae, Markus boe). 38 Tehuu Paulus ta nau. Huu fai maneuk neme propensi Pamfilia, Markus fo'a la'o ela sala.h 39 Paulus no Barnabas lasisimbo bafak lalan seli, losa dua sala lasidak. De Barnabas hela noo Markus, fo dua sala sa'e ofak losa pulu Siprus.
40 Tehuu Paulus noke no Silas. Ledo-eik ala sangga la'o, hataholi kamahelek kala malai Antiokia hule-haladoi loke Manetualain nanea sala ma natudu Ndia dale malolen neu sala boe. Ala hule-haladoi basa, boe ma dua sala la'o. 41 Boe ma ala ndule propensi Siria no propensi Kilikia. Sudi nai bee, ala tao latetea hataholi kamahelek kala dalen.