Paulus no Barnabas lai kota Ikonium
14
Ledo-eik Paulus no Barnabas losa kota Ikonium, boe ma ala maso leni hataholi Yahudi uma huhule-haladoin leu. Nai ndia, ala kokolak lala no'un seli la'e-neu Manetualain Hala Malolen losa hataholi Yahudi ma hataholi nusa fe'ek no'uk boe oo, lamahele neu Yesus. 2 Tehuu nai ndia hambu hataholi Yahudi hida lamahele mate neu sila anggaman, fo ta simbok Paulus asa kokolan. Boe ma ala mbau-edo hataholi fe'ek kala, fo ala binci lalan seli neu hataholi fo mana lamahele neu Yesus. 3 Tehuu Paulus asa ta bii. Ala tui-bengga lakandoo Lamatuak Yesus Tutui Malolen neu sudi see. Lafada lae, Lamatuak Yesus dalen nana soik neu basa hataholi. Ndia boe oo fee koasan fo ala bisa tao tanda heran mata-matak, fo suek hataholi no'uk kala bubuluk lae, Lamatuak pake sala.Faik ndia Paulus asa leo lala dook nai kota ndia. 4 Basa boe ma hambu hataholi bubuak dua lai kota ndia. Bubuak esa tungga hataholi Yahudi fo lamahele mate neu sila anggaman; ma esa bali lasala'e mate-mate lo Lamatuak nadedenun nala. Bubua kaduak kala sila lasisimbo bafak lakandoo.
5 Boe ma hambu hataholi Yahudi hida fo lamahele mate neu sila anggaman lambeda dede'ak lo hataholi fe'ek kala ma malanggan nala boe, fo tao lakatoto'ak Lamatuak Yesus nadedenun nala. Sila boe oo nau mbia Paulus asa lenik batu. 6 Tehuu hambu hataholi lafada Paulus asa lae, hambu hataholi bubuak esa sangga tao manggalauk neu sala. Boe ma lalai leu lasulu aon nala nai Propensi Likonia, nai kota Listra ma kota Derbe, ma nggolok kala mana dekak nai ndia. 7 Nai ndia boe oo, ala tui-bengga Lamatuak Yesus Tutui Malolen.
Paulus asa lai kota Listra ma Derbe
8 Losa kota Listra, Paulus no Barnabas latonggo lo touk esa. Ein dua sala lu'uk, mulai neme inan bonggin mai. De ana bei ta la'ok nitak. 9 Hataholi ndia nanggatuuk fo namanene Paulus tutuin. Boe ma Paulus meten ma dudu'a nae, “Hataholi ia namahehelen bisa tao nahai ndia!” 10 Boe ma Paulus noken nae, “Ka'a! Mambadeik leo!” Hataholi ndia namanene leo ndiak, boe ma ana fo'a tutik, de ana mulai la'ok.
11 Ledo-eik hataholi la lita Paulus tao leo ndiak, boe ma basa sala lamanggonggoak. De ala kokolak lenik sila dede'a Likonian lae, “Ei mamanene dei! Hataholi kaduak kala ia nitu lalais mana konda neni dae-bafok mai, pake hataholi aon!” 12 Hataholi la sila kokolak leo ndiak, huu lae hetuk Barnabas sama leo nitu lalais esa, nade Seus. Boe ma Paulus fo mana kokolak, lae hetuk ndia nitu lalais Hermes.a 13 Nai kota deak lelesu mba'an, hambu uma sosonggok esa soa-neu sila nitu lalain Seus. Seus mana songgon nala lita Paulus asa, boe ma leni bungga ma hela leni sapi mane ina-huuk hida, fo sangga songgo sala. Boe ma hataholi no'uk tungga mana songgo ndia, fo leu songgo Lamatuak Yesus nadedenun nala.b
14 Tehuu ledo-eik ala bubuluk lae, hataholi la sila sangga songgo sala, boe ma Paulus no Barnabas sapa sala. De lalai leni hataholi no'uk kala matan leu, boe ma ala sii sida badu hehelin nala, fo dadik tanda lae, ala ta lakaheik lo hata fo hataholi la sangga taon. Boe ma dua sala eki lae, 15 “Wii! Hatina de ei tao leo iak? Boso mae hetuk ai ia nitu lalais. Ai ia hataholi basa faik sama leo ei boe. Ai mini ia mai fo mafada ei tutui neulauk esa. Ei musi heok masadea ela ei nitu lalaim mala, fo sosoa taak kala. Ei musi fali tungga Manetualain, fo kasodak tetebes. Huu Ndia ndia nakadadadik lalai ma dae-bafok no basa isin nala.c 16 Neme makahulun mai, hataholi nusak kala lasoda tungga sila hihii hehelin nala. Manetualain boe oo ela sala leo ndiak. 17 Tehuu Lamatuak ta nafalende fee sala tanda mata-matak, fo basa hataholi nusak kala bubuluk lae, Lamatuak ndia malole. Ndia ndia nakonda uda fee ita. Ana fee ita osin nala buna-boan neulauk. Ndia ndia fee ita ta'a, ma tao ita basa nggata dalen nala lamahoko!”
18 Mae Paulus no Barnabas ka'i sala so, fo boso tao leo ndiak, tehuu hataholi la sila lasuu fo leni sosonggok ndia fee sala.
19 Faik ndia, hambu hataholi Yahudi hida, leme kota Antiokia ma kota Ikonium mai, leni kota Listra leu. Ala mbau-edo hataholi no'uk sila fo tungga laban Lamatuak Yesus nadedenun nala. De ala mbia batu neu Paulus. Lae hetuk maten so, boe ma ala hela loon, fo mbian neni kota deak neu.
20 Tehuu ledo-eik Yesus hataholi kamahelen nala lambadeik e'o Paulus, boe ma ana fo'a. Basa boe ma ana maso fali neni kota neu. Fo'a mai, ndia ma Barnabas la'o sama-sama leni kota fe'ek leu, nade Derbe.
Paulus no Barnabas fali leni salanik malai kota Antiokia leu, nai propensi Siria
21 Nai Derbe, Paulus no Barnabas tui-bengga Lamatuak Yesus Tutui Malolen. De hataholi no'uk lamahele Ndia. Boe ma dua sala leni Listra leu seluk. Neme ele mai, ala fali leni Ikonium leu. Leme ndia mai, ala la'ok lakandoo leni Antiokia leu nai propensi Pisidia. 22 Nai ndia, ala kokolak lo hataholi mana tungga Yesus fo latetea dalen nala. Lasanenedak kasa lae, “Tolanoo nggala ei! Mete ma ita maso dadik Manetualain hataholin, na, boso dudu'a tae, ita ta hambu toto'ak bali. Te mae leo beek boe oo, ita musi hambu toto'ak. Tehuu ita musi takatataka, fo tungga takandoo Yesus.” Dua sala fee nanonolik leo ndiak neu Yesus hataholin nala malai kota ndia.
23 Boe ma Paulus no Barnabas mulai sangga hataholi, fo so'u sala dadik malanggan nai salanik esa-esak. Ala hule-haladoi ma puasa, fo sangga Lamatuak hihiin. Ala lalaa liman nala ma hule-haladoi, fo so'u hataholi fo Lamatuak tudun so, fo dadik malangga salanik.d
24 Basa boe ma Paulus no Barnabas la'o ela propensi Pisidia fo la'o lakandoo leni propensi Pamfilia leu. 25 Ala losa kota esa, nade Perga. Nai ndia ala tui-bengga Lamatuak Tutui Malolen. Basa boe ma ala la'ok lakandoo, ta doo anak, boe ma ala losa nai kota Atalia. 26 Nai ndia, ala sa'e ofak fo fali leni kota Antiokia leu nai propensi Siria. Fai maneuk, Lamatuak Yesus hataholin nala malai Antiokia ndia ladenu sala, ma fee sala leu Lamatuak liman fo Ana nanea natalolole sala. De hatematak ia, Paulus asa sangga fali, fo lafada salanik Antiokia lae, ala tao basa sila uen so.
27 Losa Antiokia, boe ma Paulus asa lakabubua lala basa Lamatuak hataholin nala malai ndia. Basa boe ma ala tui loa-naluk basa hata fo Lamatuak tao fee sala so. Lae, Lamatuak soi dalak so, fo hataholi ta Yahudi la lamahele Yesus boe. 28 Basa boe ma Paulus no Barnabas leo dook lo Lamatuak Yesus hataholi kamahelen nala malai ndia.