Hataholi Antiokia ladenu Barnabas no Saulus
13
Nai kota Antiokia, hataholi no'uk lamahele Lamatuak Yesus so. Hambu hataholi hida fo Manetualain pake sala dadik Ndia mana kokolan, ma hambu hida bali fo Ana pake sala lanoli hataholi. Basa sala sila:Barnabas,
Simeon, fo hataholi lateme loken lae, ‘Tou nggeok’.a
Lukius, neme kota Kirene mai,
Manahem, fo lakaboin neme kadi'i anan mai sama-sama no mane Herodes,b
ma Saulus.
2 Faik esa, ala puasa ma lakabubua fo lakaluku-lakatele neu Manetualain. Boe ma Manetualain Dula-dale Malalaon nafada sala nae, “Hele mala Barnabas no Saulus. Te Au ueng no'un seli. Ma ala musi tao ues fo Au sangga heti fee sala.”
3 Ledo-eik ala puasa ma hule-haladoi basa, boe ma ala lalaa liman nala neu Barnabas ma Saulus fo tabis asa. Boe ma ala ladenu dua sala leu lakalala'ok Lamatuak uen.
Barnabas no Saulus leni pulu Siprus leu
4-5 Neu faik fo Manetualain Dula-dale Malalaon palenda Barnabas no Saulus fo dua sala la'ok lafeok, sososan leni kota esa leu nai tasi bifin, nade Seleukia. Yohanis (hataholi fo ala loken lae, Markus boe) tungga sama-sama no sala boe. Losa ndia, ala sa'e ofak leni pulu Siprus leu, boe ma ala konda nai kota esa, nade Salamis. Nai ndia, ala lateme maso leni hataholi Yahudi la uma huhule-haladoin leu, fo lanoli hataholi la la'e-neu Manetualain Dede'a-kokolan.
6-8 Boe ma ala tuli la'o-la'o leme nggolok esa mai, leni nggolok esa leu, ala losa kota esa nai pulu ndia mbedan seli, nade Pafos. Nggubenol leo nai kota ndia. Naden Sergius Paulus. Ndia ndia malelak. Ledo-eik namanene nae, Barnabas asa mai nai ndia kotan, boe ma nadenu hataholi fo leu loke sala, te dalen dokodoe nau namanene Manetualain nanoli-nafadan so.
Tehuu hambu hataholi Yahudi esa nai ndia boe, nade Bar Yesus (nade fe'en nai dede'a Yunani nae, ‘Elimas’). Ndia ndia kamodo mamates. Ana nateme pepeko hataholi nae, ndia boe oo Manetualain mana kokolan. Ndia natia-lai malole no nggubenol. De ledo-eik Barnabas asa mai, ana mbau-edo nggubenol fo suek boso simbok kasa. Ana soba le'a-nole nggubenol fo boso namahele Yesus.
9 Tehuu Manetualain Dula-dale Malalaon fee koasa neu Saulus (fo loken lae Paulus boe), nakabubulak matan fo mete nahelek kamodo mamates ndia. Boe ma ana kokolak nae, 10 “Heeh! Elimas! O nitu anan! Mana masapepekok! Losa faik bee fo o bei nau masapepeko hataholi? O laban basa hata fo malole! Huu leo ndiak, ai bubuluk o tungga nitu la malangga ina-huun! O boso tao leo ndiak bali! O boso soba-soba makalelee Manetualain dala ndoon bali! 11 Wei! O mamanene, baa! Dei fo Manetualain huku o. Dei fo o matam mboke, ma o ta mita hata esa boe, losa faik hida.”
Paulus kokolak nate'e leo ndiak, boe ma mboke tutik hataholi ndia matan. De nafadadaba sangga hataholi to'u liman fo nalala'on.
12 Ledo-eik nggubenol nita no mata hehelin leo ndiak, ma namanene Barnabas asa fee nanonolik la'e-neu Yesus, boe ma ana heran nalan seli, de namahele Yesus.
Ala leni Tutui Malole neni kota Antiokia fe'ek neu, nai propensi Pisidia
13 Paulus asa leme kota Pafos nai pulu Siprus mai, ala sa'e ofak leni kota esa leu nai propensi Pamfilia, nade Perga. Nai ndia, ala konda leme ofak mai, boe ma Yohanis Markus la'o ela sala fo fali neni Yerusalem neu. 14 Leme Perga mai, ala la'ok tungga madak lain leni Antiokia leu nai propensi Pisidia.
Ala losa kota ndia. Nandaa no hataholi Yahudi la fai hahae tao uen, boe ma ala tungga leu hule-haladoi nai hataholi Yahudi la uma huhule-haladoin. 15 Faik ndia, ala lees nai ba'i Musa susulan, ma Manetualain mana kokola fe'en nala susulan. Boe ma uma huhule-haladoik ndia malanggan nala loke Paulus asa lae, “Ama nggala ei. Mete ma ei hambu heheluk fee ai, na, ai moke no hadak fo ei kokolak matetea ai basa nggai manai ia dalen nala.”
Paulus mulai kokolak fee hataholi Yahudi la lai Antiokia
16 Boe ma Paulus nambadeik neu mata. De ana so'uk liman, fo hule sala nee-nee. Boe ma ana mulai kokolak nae, “Tolanoo Israel asa ei! Ma ina-ama fe'ek kala mana maso anggama Yahudi so, huu ei dalem boe oo dokodoe neu hataholi Israel Manetualain. Au oke ei pasak ndi'i doom, fo mamanene au!
17 Manetualain hele nala ita hataholi Israel bei-ba'in nala leme makahulun mai so. Neu faik fo leu leo leme dae Masir, fo ta sila nusa hehelin, Manetualain fee sala leo lo soda-molek, losa numbu-sadun nala boe lamano'u. Boe ma Manetualain pake koasa ina-huun fo noo sala kalua leme Masir mai.c 18 Basa de ala leo lali-lali nai mamana louk losa teuk haa hulu. Mae sila langga batu lakandoo, tehuu Manetualain noo sala no nggale loak.d 19 Boe ma Manetualain tao nakalulutu hataholi nusak hitu nai dae Kana'an. Boe ma baba'e daen nala neu ita bei-ba'in nala, fo dadik sila dae pusakan.e 20 Lasoda leo ndiak losa teuk 450.
Basa boe ma Manetualain so'u fee sala mana maketu dede'ak kala, fo lakalala'ok kasa losa Manetualain so'u nala mana kokolan esa, nade Semuel.f 21 Neu faik fo Semuel dadik Manetualain mana kokolan, ita bei-ba'in nala lahiik fo hambu manek esa. Boe ma Manetualain so'u nala Kis anan, nade Saul, neme leo Benyamin mai. Saul to'u palenda teuk 40.g 22 Boe ma Manetualain hai henin. De Manetualain so'u Isai anan, nade Dauk, fo nggatin dadik mane beuk. Manetualain bubuluk tetebes Dauk dalen nae, ‘Isai anan Dauk ia, nandaa no Au daleng. Neu ko ana tao tungga basa Au hihiing.’h 23 Faik ndia, Manetualain helu sangga nadenu Dauk tititi-nonosin esa, fo nasala'e nala hataholi Israel leme sala-singgon nala mai. Au nau afada basa tolanook kala ae, Dauk tititi-nonosin fo Manetualain heluk, ndia Yesus.”
Paulus nae Yesus ndia, Hataholi fo Manetualain helu sangga nadenun mai
24 Paulus tuti kokolan nae, “Neu faik fo Lamatuak Yesus bei ta mulai tao uen, hambu hataholi esa, nade Yohanis, neu nafada hataholi Israel asa nae, ala musi hahae leme sala-singgon nala mai, ma fali fo tungga Manetualain. Boe ma ala musi salani fo dadik tanda lae, sila malole lo Manetualain so.i 25 Tehuu ledo-eik Yohanis uen sangga basan so, ana nafada hataholi la nae, ‘Boso ei dudu'a mae au ia, Hataholi fo Manetualain helu neme makahulun mai so, fo sangga nadenun mai. Masaneda neulalau! Ei musi mahani Hataholi esa fo dei fo sangga mai. Ndia ana seli lena heni au, losa dadik kada Ndia atan boe oo, au ta andaa.’j k
26 Tolanoo nggala ei! Ei memak ba'i Abraham tititi-nonosin, ma ei fe'ek fo dalem mala dokodoe neu Manetualain. Mamanene au dei! Manetualain nafada dede'ak ia neu ita so, fo ita bubuluk Ndia dala sodan. Ana nasala'e nala ita neme ita sala-singgon nala mai. 27 Neme makahulun mai, Manetualain pake mana kokolan nala so, fo ala sulak lafada hataholi la'e-neu Hataholi fo Manetualain helu sangga nadenun mai. Boe ma ita malangga anggaman nala, ma hataholi fe'ek lai Yerusalem, lees bali-bali so hata fo mana kokolak kala sulak kana so. Tungga fai hahae tao ues, ala maso leni uma huhule-haladoik leu, fo ala lees la'e-neu Hataholi ndia nai Manetualain Susula Malalaon. Tehuu ala ta lalelak la'e, Hataholi fo Manetualain helu sangga nadenun mai so, ndia Yesus. Boe ma ala sangga dalak fo huku lisan. Naa te dede'ak ia boe oo, nandaa no hata fo Manetualain mana kokolan nala sulak kana so. 28 Ala sangga dede'ak lo Yesus fo nau tao latudan, tehuu ala ta hambu salan faa boe. Mae leo ndiak boe oo, ala leu loke nggubenol Pilatus fo tao lisan.l 29 Nggubenol nakaheik, boe ma ala mbaku londa Yesus neme ai ngganggek losa maten. Tehuu basa ia, nandaa no hata fo Manetualain mana kokolan nala sulak kana so. Basa de lakonda mbombolan neme ai ngganggek mai, de ala ko'o leu mbedan nai lates dale.m 30 Tehuu Manetualain pake koasan, fo tao nasoda falik Yesus neme mamaten mai.
31 Ledo-eik Yesus nasoda fali so, Ana natudu aon la'i no'uk neu hataholi la. Sila ndia mai sama-sama lo Ndia so, leme propensi Galelea mai, leni Yerusalem leu. Ma hatematak ia, sila ndia dadik sakasii neu hataholi Israel asa.”n
Paulus natudu nae, Lamatuak pake mana kokolan nala so, fo lafada memak la'e-neu Yesus
32-33 Paulus tuti kokolan nae, “Leo iak! Ai dua nggai ia, fo au ua Barnabas, mima dook mai so, fo mafada ei suek ei bubuluk mae, hata fo Manetualain helu neu ita bei-ba'in nala so, hatematak ia basan dadi so. Manetualain tao nasoda falik Yesus neme mamaten mai so. Nai Sosoda Koa-kio nomer kaduan, Manetualain pake hataholi fo sulak la'e-neu Yesus so, Hataholi fo Ana helu sangga nadenun mai nae:
‘O ia, Au anang.
Faik ia Au so'u ala O fo to'u palenda.’o
34 Neme makahulun mai Manetualain boe oo helu basa so nae, dei fo Ndia sangga tao nasoda falik Hataholi fo Ana helu sangga nadenun mai so, ma Hataholi ndia ta mate bali. Huu ndia de Manetualain pake mana kokolan so, fo sulak nae,
‘Neme makahulun mai Au mba'a heheluk ua mane Dauk fo sangga feen baba'e-babatik.
De hatematak ia Au boe oo sangga mba'a heheluk ndia bali ua o, huu o ia dadik Dauk tititi-nonosin.’p
35 Hambu Sosoda Koa-kio fe'ek nae,
‘Lamatuak ta ela O Hataholi Malalaon mbombolan, fo noe sasalak nai laten dale.’q
36-37 Teteben leo iak: Sosoda Koa-kiok ia ta tudu kada Dauk mesak kana! Ita bubuluk leo ndiak, huu mane Dauk tao dede'a neulauk no'uk fee ndia nusan nala so, basa boe ma ana mate, de latoin. Ma mbombolan noe henin so. De ita bubuluk tae, Sosoda Koa-kiok ndia ta tuduk Dauk, tehuu tuduk hataholi fe'ek. Hataholi fo ana tuduk ndia, mete ma maten so, dei fo Manetualain tao nasoda falik kana. Huu ndia de mbombolan ta noe faa boe.
38-39 De tolanoo nggala ei, mamanene neulalau! Hataholi ndia, ndia Yesus! Mete ma ita tamahele neu Ndia, bei fo Ndia nau lemba sala-singgok, fo mete ma tungga teteben, na, ita musi lemba aon. No leo ndiak, Manetualain koka heni ita salan nala. Tehuu ita bubuluk so tae, mae ita tungga basa ba'i Musa heti-heun, kada ndia mesak kana ta bisa tao ita malole nai Manetualain matan. 40-41 Huu ndia de ei musi dudu'a neulalaun. Boso losak hata fo Manetualain mana kokola makahulun nala lafada so, tuda la'e ei. Ala sulak so lae,
‘Mata neuk neu ei mana haumemeek kala, fo mahiik suli hataholi no mata ikok!
Huu Au, Manetualain, tao dede'ak kala fo hataholi heran lalan seli;
tehuu dei fo ei simbok ei baba'em, fo ei mate nduadak.
Au tao dede'ak esa, neu faik fo ei bei masoda,
tehuu ei ta nau simbok.
Mae hataholi lafada so boe oo, ei ta nau malelak.r
Malolenak ei dudu'a neulalau dede'ak kala ia, fo suek ei heran boe.’
De tolanoo nggala ei. Dudu'a neulalau hata fo isinaak au afadak so. Boso mbia heni hata fo isinaak ei mamanenen so, sama leo mana haumemeek kala tataon. Au kokolang leo ndiak leo. Makasi no'uk!”
42 Paulus no Barnabas kokolak basa, boe ma lambadeik fo sangga la'o ela uma huhule-haladoik ndia. De hataholi malai ndia loke fo dua sala fali main nai sosoda ina mana maik, fo lafada lutu-lutuk bali, la'e-neu hata fo isinaak ala kokolak ndia so. 43 Ledo-eik ala kalua leme uma huhule-haladoik ndia mai, hambu hataholi no'uk leme ndia mai tungga Paulus no Barnabas. Boe ma dua sala fee sala nanoli-nafadak lae, “Ita bubuluk tae, Lamatuak dalen malolen seli neu ita. Huu ndia de ei boe oo musi to'u mahele Ndia.”
Hataholi Yahudi malanggan nala timba heni Paulus asa
44 Neu sosoda ina mana maik, nandaa no hataholi Yahudi fai hahae tao uen, elaba'ik basa hataholi malai kota ndia mai fo sangga lamanene Lamatuak Dede'a-kokolan. 45 Tehuu ledo-eik hataholi Yahudi malanggan nala lita hataholi no'uk lahiik mai lamanene Paulus asa, boe ma ala dale hedi. De neu faik fo Paulus bei kola-kola, ala laban Paulus no huu-okan taa, ma ala kokolak latuda Paulus asa.
46 Tehuu Paulus asa ta heok, ma ala kokolak ta babaa bali. Ala lae, “Memak Manetualain soi dalak nakahuluk fee ita hataholi Yahudi so, ma Ana fee Hala Malole neu ita. Ma memak ndia nandaa! Tehuu ei ta nau simbok. De no ei hele leo ndiak, ei matudu mae, ei ta mandaa hambu sodak makandoo mia Manetualain. De hatematak ia, ai sangga mini Hala Malole fee hataholi nusa fe'ek kala, huu ei timba henin so. 47 Huu Manetualain nadenu ai so, sama leo Yesaya sulak so nae,
‘Au so'u ei so, fo dadik sama leo banduk fo mini manggaledok neu hataholi nusa fe'ek kala, fo ta hataholi Yahudi,
fo suek ei loti tao manggaleledo dalak mana neni Au mai,
fo suek Au mbo'i heni sala leme sala-singgon nala mai.
Ma ei boe oo, musi matudu dalak ndia nai dae-bafok neme mbedan seli mai neni mbedan seli neu.”’s
48 Ledo-eik hataholi nusa fe'ek kala fo ta Yahudi lamanene leo ndiak, boe ma lamahoko lalan seli. De ala koa-kio Manetualain lae, “Koa-kio Lamatuak! Lamatuak Hala Malolen ndia, lolen seli!” Ma nai ndia, hambu hataholi la fo Manetualain naketu neme makahulun mai so, fo bisa lasoda lakandoo lo Ndia. Boe ma basa sala lamahele Lamatuak Yesus.
49 Manetualain Dede'a-kokolan natanggela neme bafak mai neni bafak neu nai basa nusak ndia.
50 Nai kota ndia, hambu hataholi ina-huuk kala, touk ma inak. Hambu luma dokodoe Lamatuak. Tehuu hataholi Yahudi malanggan nala, mai fo mbau-edo hataholi ina-huuk kala sila, losa ala husi kalua heni Paulus no Barnabas leme sila nusan mai. 51 Ala kalua leme kota ndia mai, boe ma dua sala tao tatao hadak esa, ma sasambu heni afu neme ein nala mai fo dadik tanda nae, hataholi malai kota ndia ta nau lamanene dua sala. Boe ma ala heok lasadea la'o ela kota ndia. De leni kota fe'ek esa leu, nade Ikonium.t
52 Tehuu hataholi fo mana lamahele Lamatuak Yesus nai Antiokia so, dalen nala lamahoko, huu Manetualain Dula-dale Malalaon natetea dalen nala.