Yakobis mamaten; Petrus maso bui; ma hataholi kamahelek kala huhule-haladoin
12
Lelek ndia boe oo, mane Herodesa mulai tao Lamatuak Yesus hataholin luma doidoso lalan seli. 2 Ana palenda hataholi, fo leu tao lisa Yakobis lenik tafa. Yakobis ndia, Yohanis ka'an. 3 Ledo-eik Herodes nita nae, Yakobis mamaten tao namahoko hataholi Yahudi malanggan nala, de ana boe tao lena-lenak bali. Nandaa no fai ina-huuk fo ala seseik lae, Feta Loti Ta Pake Lalu Teik,b boe ma ana nadenu hataholi leu humu lala Petrus bali. 4 Humu lalan, boe ma landeen neni bui dale neu. De ala hele lala soldadu bubuak haa, fo lanea langganggatik Petrus leledo-le'odaen. Soldadu bubuak esa, na hataholi haa. Herodes hihiin mete ma feta ndia nate'e so, na, bei fo naketu Petrus dede'an nai hataholi no'uk matan. 5 De ledo-eik ala kena Petrus neme bui dale, Lamatuak Yesus hataholin nala hule-haladoi ta lamaketu, loke fo Manetualain mete Petrus.cManetualain kalua heni Petrus neme bui dale mai
6 Fo'a mai, boe ma Herodes sangga naketu Petrus dede'an neu hataholi no'uk kala matan. Tehuu le'odaen ndia, ala mba'a Petrus lenik tali besi dua nai bui dale. Boe ma ana sunggu nai soldadu dua laladan. Ma soldadu fe'ek kala lanea lai lelesu bafan.
7 Kada nggengge neuk, te Manetualain ata nusa sodan esa mai nambadeik nai ndia, boe ma kama ndia nandela nasa'a. De ata nusa sodak ndia fafae Petrus nae, “Petrus! Fo'a lai-lai!” Ledo-eik ndia boe oo, tali besi mbo'i henin tutik neme Petrus liman mai. 8 Basa boe ma ata ndia nadenun nae, “Pake o badum! Ma pake o tabu eim!” Petrus pake basa, boe ma ata ndia nadenun bali nae, “Pake o badu deam, fo mai tungga au leo!”
9 Boe ma Petrus tungga ata ndia, fo kalua leme bui dale mai. Tehuu Petrus nae hetuk kada nalame'i ndia. Naa te tetebes dadi leo ndiak. 10 Ledo-eik ala la'o seli mamana nanea kaesan ma kaduan, boe ma ala losa lelesu besi. Lelesu ndia kada ana soi aon, de dua sala kalua tungga dalak mana neni kota neu. Kada nggengge neuk, te Manetualain atan ndia la'o ela Petrus mesak kana nai ndia.
11 Ata ndia mopon, boe ma Petrus namedak nae, “Memak tetebes! Hatematak ia, bei fo au bubuluk. Lamatuak tetebes nadenu atan mai so, fo nakambo'ik au neme Herodes liman mai. Lamatuak tao leo ndiak, suek hataholi Yahudi la dudu'a menggalaun ta la'e au.”
12 Basa leo ndiak, boe ma Petrus neni ina Maria uman neu. Ndia ndia Yohanis inan. Yohanis nade fe'en Markus. Nai ndia hataholi no'uk lakabubua, fo hule-haladoi loke Lamatuak tulun Petrus no dede'an. 13 Losa uma ndia, boe ma Petrus dedele lelesu, ma nanggou neme lelesu mba'a mai. Boe ma ina mana ono-lauk esa nade Rode, neu titilo see mana maik ndia. 14 Ana namanene Petrus halan ndia, boe ma nalelak memak kana. Ana namahoko nalan seli, de nalaik lai-lai dalek neu, fo nafada hataholi la nae, “Wee! Petrus nambadeik nai deak!” Tehuu ana nasapangga, de nafalende soi lelesu fee Petrus.
15 Tehuu lataa lae, “Ta bisa! Boso makalalamba leo ndiak!”
Tehuu inak ndia mate-mate nae, “Taa! Tetebes Petrus halan ndia! Nai deak ele!”
Tehuu ala ta mbali, de lae, “Fama ndia kada Manetualain ata nusa sodan, fo mana manea Petrus.”
16 Ala bei latuik, te Petrus eki nakandoo losa leu soi lelesu. Soi lala lelesu boe ma lamanggonggoak huu Petrus ndindia. 17 Petrus baba'ak liman neu sala, fo suek ala nee-nee. Boe ma ana tui talo bee de losa Manetualain kalua heni ndia neme bui dale mai. De nadenu sala nae, “Ei miu mafada basa dede'ak kala ia neu Yakobis ma nadedenuk kala!” Basa boe ma Petrus kalua neni mamana fe'ek neu.
18 Fo'a fafain, ledo-eik soldadu mana manea la lita lae, Petrus taak kana so bali, boe ma lamanggonggoak, ma ala bii lalan seli, huu ala ta bubuluk dei fo ala dadik hata. 19 Ledo-eik Herodes bubuluk dede'ak ndia, boe ma ana palenda sala leu sangga Petrus. Tehuu ta latonggo lo ndia. Boe ma Herodes palenda fo leu palisak soldadu mana maneak kala sila. Palisak basa, boe ma ana nadenu fo tao lisa basa soldadu mana maneak kala sila.
Basa boe ma Herodes la'o ela Yudea, fo neu leo nai kota Kaisarea.
Mane Herodes Agripa mamaten
20 Faik ndia hambu hataholi leme kota dua mai, nade Tirus ma Sidon, lahiik hasa nana'ak nai mane Herodes nusan. Tehuu manek musu no sala dook ia so. Boe ma ala lala halak fo sangga dalak leu dame lo ndia. De ala hele lala hataholi bubuak esa, fo leu latonggo lo Herodes. Losa Kaisarea, ala leu latia-laik lo hataholi uma dalek esa, nade Blastus. Ndia ndia malanggan nai manek uman. Ala lambeda dede'ak lo Blastus fo dadik neu sila mana kokoen, fo soi dalak fee sala, fo bisa latonggo lo Herodes.
21 Boe ma Herodes nakaheik simbok kasa, de ala hele lala faik esa fo latonggo. Faik ndia ala tao tatao ina-huuk. Herodes pake balo'a manen, de nanggatuuk neu kadela manen. Boe ma ana mulai nakokola no sala. 22 Hataholi la lamanene halan, boe ma ala mulai koa soso'uk kana lae, “Mamanene halan ndia! Naa ia hala hataholik ta ia, te ia nitu lalais halan ia!” 23 Kada nggengge neuk te Manetualain ata nusa sodan esa mai de fee Herodes hedis esa, huu ana simbok kokoak ndia ma ana seti heni Manetualain. Boe ma ulek kala la'a heni Herodes aon losa maten.
24 No basa mana dadik kala sila, boe ma Manetualain Tutui Malolen boe namaloa, ma hataholi mana tungga Lamatuak Yesus Dala Sodan, boe lamano'u.
25 Barnabas no Saulus leni basa hataholi Antiokia la tutulu-fafalin leni Yerusalem leu, boe ma ala fali leni Antiokia leu. Ala loo hataholi mulik esa nade Yohanis, tehuu lateme loken lae, Markus.