3 Faik esa, meda li'u telu ledo bobon, sama leo ana nalame'i, nita no manggaledok, Manetualain ata nusa sodan esa mai, de noken nae, “Kornelis!”

4 Kornelis nita ata nusa sodak ndia, boe ma ana bii nalan seli. De nataa nae, “Hata, Ama?”

Ata nusa sodak ndia nataa nae, “Manetualain namanene o huhule-haladoim mala so, ma Ndia nasaneda o dale malolen neu basa hataholi. Boe ma Lamatuak mete o boe. 5 De hatematak ia, madenu hataholi neni kota Yope neu, fo leu loke lo hataholi esa mai, naden Simon Petrus. 6 Ana leo tataak nai uma esa nai tasi bifin, no hataholi esa mana tao nalalao banda loun. Ndia naden Simon boe.”

7 Ledo-eik ata nusa sodak ndia la'o ela Kornelis, boe ma noke ndia hataholi mana tao uen dua ma soldadu esa fo dalen dokodoe neu Manetualain. 8 Kornelis tui nate'e sala basa dede'ak ndia, boe ma nadenu sala leni kota Yope leu.

9 Basa de fo'a mai, meda ledo namatetu, Kornelis nadedenun nala dekak lo Yope so. Faik ndia, Petrus hene neni Simon uman tadan lain neu, fo hule-haladoi.

10 Ana hule-haladoi, tehuu nameda ndoe boe. Ana nahani hataholi la tao nana'ak neu mei lain. Ledo-eik ana bei hule-haladoi leo ndiak, boe ma Manetualain natudun nonook leo nalame'i. 11 Ana nita sama leo lalai natahu'ak, boe ma tema maloa esa toda mai, fo nana mbiik neu bu'un haa sala. Boe ma temak ndia mulai konda mai. 12 Nai temak ndia, ana nita banda mata-matak, ndia banda ei haak, banda mana lae-lodok, ma mbuik mata-matak.

13 Boe ma namanene halak esa nadenun nae, “Petrus! Fo'a leo! Hala banda la ia, fo mu'a leo!”

14 Tehuu Petrus nataa nae, “Ta bisa, Ama! Boso leo ndiak! Au bei ta u'a itak banda mata leo ndiak! Ai hataholi Yahudi maluli basa banda sila!”

15 Tehuu halak ndia bala nae, “Mete ma Manetualain kokolak so nae, hata esa malalaok, na, o boso mae ndia manggenggeok bali!” 16 Temak ndia toda leo ndiak losa la'i telu, boe ma nana so'u falik neni lalai neu.

17 Basa boe ma Petrus bei dudu'a neu-mai, fo sangga bubuluk me'is ndia ndandaan. Nandaa no ledo-eik ndia, Kornelis ana mana tunggan nala losa Simon uman. Ala lambadeik lai lelesu bafan so. 18 Boe ma loke lae, “Ai sangga hataholi mana maik esa leo tataak nai uma ia. Nade Simon Petrus. Fama ama bubuluk, do?”

19 Faik ndia, Petrus bei dudu'a sangga bubuluk me'is ndia ndandaan, te Manetualain Dula-dale Malalaon nafadan nae, “Wei, Petrus! Hambu hataholi lai dae, mai sangga o.^a 20 O konda fo muu tungga sala leo. Boso dudu'a bali. Mae sila ndia ta hataholi Yahudi, tehuu o boso nunute sala ma tao sala hataholi manggenggeok tungga hataholi Yahudi hadan. Huu Au adenu sala fo mai lala o.” 21 Boe ma Petrus konda fo neu natonggo noo sala, de nae, “Au ia, ndia ei sanggak. Ei paluu hata?”

22 Boe ma lataa lae, “Soldadu Roma malanggan esa nadenu ai mini ia mai. Ndia ndia, malanggan neu soldadu natun esa. Ndia dalen ndoos ma dokodoe Manetualain. Hataholi Yahudi no'uk bubuluk hataholi ia dale malolen. Bei fo afik, Manetualain ata nusa sodan mai, fo nadenu ai malanggan noke ama neni ndia uman neu, fo ana sangga namanene neme ama mai.”

23 Petrus namanene leo ndiak, boe ma noke sala fo le'odaen ndia sunggu tataak nai ndia. Fo'a mai, boe ma ala fo'a de Petrus la'ok sama-sama noo sala. Hambu Lamatuak hataholin hida fo malai Yope, leu lanonoo lo sala.

24 Le'odaen ndia ala sunggu leme dalak, fo'a bei fo ala losa kota Kaisarea. Losa Kornelis uman, te ana nahani sala so. Ana nakabubua nala bobonggin nala ma nonoon nala fo eik esa lai ndia so. 25 Ledo-eik Petrus sangga neni uma ndia neu, Kornelis nalai mata neu, de sendek neu Petrus ein, fo nakaluku-nakatelen. 26 Tehuu Petrus nafofo'an nae, “Ka'a! Mambadeik leo. Boso makaluku-makatele neu au. Te au ia hataholi basa faik sama leo ka'a boe.”

27 Kornelis namanene leo ndiak, boe ma fo'a nambadeik. De dua sala mulai lakokola fo la'ok leni uma dale leu. Boe ma Petrus nita hataholi no'uk lakabubua lai ndia so, fo lahanin. 28 Boe ma ana suli ndule sala, de kokolak nae, “Tolanoo nggala ei! Ei bubuluk memak ai hataholi Yahudi hadan. Tungga ai hadan ndia, ai ta bole makabubua mia hataholi fe'ek kala. Nakalenak maso neni sila uman neu. Tehuu Manetualain natudu au so nae, mete ma Ndia kokolak so nae, hata esa malalaok, na, boso au ae ndia manggenggeok. De hatematak ia au ta bisa nunute hataholi fe'ek bali. Te au musi tao sala leo au bobonggi heheling. 29 Huu ndia de ledo-eik fo ei mai moke au, au mai tutik. Au ta aeok, huu Lamatuak nafada au leo ndiak so. Tehuu ei mafada sudik dei! Ei paluu au hata nai ia?”

30 Boe ma Kornelis tui basa-basan nae, “Faik haa maneuk, ledo bobok so, au hule-haladoi neme au umang ia. Kada nggengge neuk, touk esa nambadeik neu au matang. Balo'an manggadilak. 31 Boe ma noke au nae, ‘Kornelis! Manetualain namanene o huhule-haladoim mala so, ma nasaneda o dale malolem neu basa hataholi. 32 De hatematak ia, madenu hataholi neni kota Yope neu, fo noke hataholi esa nade Simon Petrus. Ana leo tataak nai uma esa nai tasi bifin, nai hataholi esa fo mana tao nalalao banda loun. Nade Simon boe.’ 33 Huu ndia de au adenu memak hataholi fo neu noke ama. Ai moke makasi malan seli, huu ama mai tutik. De hatematak ia, ai makabubua nai ia, fo ai nau mamanene basa hata fo Manetualain nadenu ama nafada ai!”

34 Boe ma Petrus kokolak nae, “Hatematak ia, bei fo au bubuluk ae, Manetualain ndia, tebe-tebe mete basa hataholi la sama. Ana ta mete matak nae ia hataholi Yahudi, ma fe'ek kala ta hataholi Yahudi.^b 35 Mete ma hambu hataholi neme sudi leo bee mai, fo dalen ndoos, ma nahiik hule-haladoi neu Manetualain, boe ma tungga Ndia hihiin, neu ko hataholi ndia tao namahoko Ndia dalen. 36 Ei bubuluk hata fo Manetualain nafada ai hataholi Israel so nae, Ndia nadenu Karistus so, fo ndia Yesus. Boe ma Yesus maten fo suek nakamomolek hataholi no Manetualain. Ma Ndia boe oo, naena haak palenda hataholi.

37 Ei boe oo mamanene hata fo mana dadik nai propensi Yudea katematuan so. Tutuik ndia mulai neme Yohanis nafada hataholi nae, ala musi hahae leme sila sala-singgon nala mai, ma ala musi salani boe, fo dadik tanda nae, sila malole lo Manetualain so. 38 Boe ma Manetualain fee Dula-dale Malalaon neu Yesus, hataholi Nasaret ndia. Manetualain boe oo, fee koasan neu Yesus. Basa boe ma Yesus maso-kalua nggolok kala, fo tao dede'a malole fee hataholi la. Ma Ana tulu-fali hataholi fo nitu la malangga ina-huun tao nakatoto'ak kasa. Ana tao leo ndiak, huu Manetualain sama-sama no Ndia taa-taa. 39 Ai ndia mita no ai mata de'e hehelin, hata fo Ana taon neme kota Yerusalem ma nai hataholi Yahudi dae katematuan so.

Mae leo ndiak boe oo, tehuu hataholi bei mbaku londan, neme ai ngganggek lain losa maten. 40 Ndia mate tebe-tebe, tehuu neu binesan, boe ma Manetualain tao nasoda falik kana. De Ana natudu aon fo hataholi bubuluk lae, Ndia tebe-tebe nasoda fali so. 41 Tehuu ta basa hataholi lita Ndia, kada ai. Neu faik fo Ndia nasoda fali ndia, ai mateme mi'a-minu sama-sama mia Ndia. Manetualain hele nala ai dadik sakasii, fo miu tui-bengga Yesus Tutui Malolen neu hataholi no'uk sudi nai bee.

42 De Manetualain nadenu ai miu mafada manggaledok la'e-neu Hataholi fo Ndia helu memak kana neme makahulun mai so, fo ndia Yesus. Ma Manetualain boe oo so'u nala Yesus dadik Mana Maketu Dede'ak nae, see fo dei fo nasoda nakandoo no Manetualain, ma see taa. Yesus ndia naketu dede'ak neu hataholi mana matek kala so ma hataholi bei kasodak kala. 43 Neme lele uluk mai, basa Manetualain mana kokolan nala boe oo, tudu lala Yesus ia lae, basa hataholi mana lamahele Ndia, dei fo Manetualain simbok kasa, ma Manetualain koka heni sila sala-singgon nala.”

44 Ledo-eik Petrus bei kokolak leo ndiak, boe ma kada nggengge neuk, Manetualain Dula-dale Malalaon maso neni basa hataholi fo mana namanene ndia. 45 Nai ndia boe oo hambu Petrus nonoon hataholi Yahudi la, mai sama-sama loon neme kota Yope mai, leni Kornelis uman nai kota Kaisarea. Ledo-eik lita hataholi no'uk simbok Manetualain Dulan, ala heran lalan seli, huu bei fo lita Manetualain fee Dulan neu hataholi ta Yahudi. 46 Ala lamanene hataholi malai Kornelis uman kokolak pake dede'a mata-matak, ma ala koa-kio Manetualain.

Boe ma Petrus kokolak nae, 47 “Ei mita matam leo! Hataholi la ia simbok Manetualain Dulan sama leo ita boe. De hatematak ia, mai fo ita salani sala leo. Ta hambu esa bisa ka'i bali.” 48 Boe ma Petrus nadenu fo ala salani Kornelis no hataholi malai ndia la, fo ala maso dadik Lamatuak Yesus hataholin. Basa boe ma, ala loke fo Petrus leo noo sala faik hida bali, bei fo ala mbo'in fali neni Yerusalem neu.